ကမာရ် ဂူလ် (သို့) မိဘတွေအတွက် တာလီဘန်ကို လက်စားချေတဲ့ အာဂသတ္တိခဲ

ဇူလိုင် ၂၂၊ ၂၀၂၀
M-Media

-မိဘနှစ်ပါးကို သတ်ဖြတ်ခဲ့တဲ့ တာလီဘန်တွေကို တစ်ယောက်တည်း ရဲရဲဝံ့ဝံ့ ပြန်လည်တိုက်ခိုက်ခဲ့တဲ့ ဆယ်ကျော်သက် အမျိုးသမီးတစ်ဦးရဲ့ အကြောင်းဟာ အာဖဂန်ဆိုရှယ်မီဒီယာလောကမှာ အခုရက်ပိုင်းအတွင်း ရေပန်းစားလာပါတယ်။

ကမာရ်ဂူလ်ဆိုတဲ့ အဲဒီအမျိုးသမီးငယ်လေးဟာ အသက် ၁၅ နှစ်လောက်သာရှိပြီး နိုင်ငံအလယ်ပိုင်း ဂေါရ်ပြည်နယ်က ရွာတစ်ရွာမှာ နေထိုင်တာပါ။

သူမရဲ့ဖခင်ဟာ အစိုးရကို ထောက်ခံသူလို့ တာလီဘန်တွေက စွပ်စွဲပြီး အိမ်ပေါ်အထိ လာရောက်ဆွဲခေါ်တဲ့အချိန် ဇနီးဖြစ်သူက ဝင်တားခဲ့ပေမယ့် တာလီဘန်တွေက အိမ်အပြင်မှာပဲ နှစ်ယောက်စလုံးကို ပစ်သတ်ခဲ့ပါတယ်။

ဒီအဖြစ်အပျက်ကိုမြင်တဲ့ ကမာရ်ဂူလ်ဟာ အိမ်ထဲမှာရှိ​နေတဲ့ ​AK47 သေနတ်ကိုသွားယူကာ တာလီဘန်တွေကို ပစ်ခတ်ခဲ့တယ်လို့ ကျေးရွာရဲတပ်ဖွဲ့အကြီးအကဲ ဟာဘီဘွတ်ရဟ်မန် မာလက်ဇာဒါ က ပြောကြားခဲ့ပါတယ်။ ကမာရ်ဂူလ်ရဲ့ ပစ်ခတ်မှုကြောင့် သူမိဘတွေကိုသတ်သူ ၂ ဦး သေဆုံးခဲ့သလို အခြား တာလီဘန်တွေလည်း ဒဏ်ရာရသွားပါတယ်။

ဒီအဖြစ်အပျက်ပြီးနောက်ပိုင်းမှာ တာလီဘန်ဘန်တွေဟာ ကမာရ်ဂူလ်ရဲ့အိမ်ကို လာရောက်တိုက်ခိုက်ဖို့ ကြိုးစားပေမယ့် အစိုးရတပ်ဖွဲ့တွေနဲ့ ပြည်သူစစ်တွေက ပြန်လည်တိုက်ထုတ်နိုင်ခဲ့ပါတယ်။

တာလီဘန်တွေ လက်တုန့်ပြန်မှာကို စိုးရိမ်ရတဲ့အတွက် ကမာရ်ဂူလ်နဲ့ မောင်ဖြစ်သူတို့ကို အာဖဂန်လုံခြုံရေးတပ်ဖွဲ့တွေက ဘေးအန္တရာယ်ကင်းတဲ့နေရာကို ခေါ်ယူကာ ထိန်းသိမ်းစောင့်ရှောက်ထားပါတယ်။

ပုဝါဆောင်းကာ AK47 ကိုင်ထားတဲ့ ကမာရ်ဂူလ်ရဲ့ ဓာတ်ပုံနဲ့အတူ ဒီအဖြစ်အပျက်အကြောင်း အာဖဂန်ဆိုရှယ်မီဒီယာ အသုံးပြုသူတွေကြားမှာ အလျင်အမြန် ပြန့်နှံ့သွားခဲ့ပြီး ချီးကျူးမှုတွေလည်း ရှိနေပါတယ်။

အစိုးရနဲ့ အဆက်အသွယ်ရှိတယ်လို့ သူတို့ယူဆတဲ့သူတွေကို တာလီဘန်က ဖမ်းဆီးတာ၊ သတ်ဖြတ်တာတွေ ပုံမှန်လုပ်ဆောင်လေ့ရှိပါတယ်။ အမေရိကန်နဲ့ တာလီဘန်တို့အကြား အခုနှစ်အစောပိုင်းက အပစ်ရပ်ရေး သဘောတူညီချက်တစ်ချို့ ရခဲ့ပေမယ့် ပြီးခဲ့တဲ့ သီတင်းပတ်တွေအတွင်း တာလီဘန်ရဲ့ တိုက်ခိုက်မှုတွေ မြင့်တက်လာခဲ့ပါတယ်။

Ref: AP