ဟိန္ဒူဘာသာကို စော်ကားသည့် အမျိုးသမီးတစ်ဦးကို ဘာရိန်း တရားစွဲ

ဩဂုတ် ၂၁၊ ၂၀၂၀
M-Media

-ဟိန္ဒူနတ်ရုပ်ကို ရိုက်ချိုးခဲ့တဲ့ အမျိုးသမီးတစ်ဦးကို သာသနာညှိုးနွမ်းစေမှုနဲ့ တရားစွဲဆိုလိုက်တယ်လို့ ဘာရိန်း ပြည်ထဲရေး၀န်ကြီးဌာနက ထုတ်ပြန်လိုက်ပါတယ်။

အသက် ၅၄ နှစ်အရွယ် အဲဒီအမျိုးသမီးဟာ စျေးဆိုင်တစ်ခုကို စျေးသွား၀ယ်ရာမှာ ဟိန္ဒူနတ်ဘုရားရုပ်ကို တွေ့ပြီး ဒေါသထွက်ကာ ရိုက်ချိုးဖျက်ဆီးခဲ့တာပါ။

အဲဒီဗီဒီယိုဟာ ဆိုရှယ်မီဒီယာမှာ ပြန့်နှံ့သွားခဲ့ပြီး ဘာရိန်းပြည်သူတွေက ကန့်ကွက်ရှုတ်ချခဲ့ကြပါတယ်။

ဒီအမျိုးသမီးကို တစ်ပါးသူရဲ့ပစ္စည်း ဖျက်ဆီးမှု ဘာသာသာသနာညှိုးနွမ်းစေမှုနဲ့ တရားစွဲဆိုထားတယ်လို့ ရဲတပ်ဖွဲ့က ပြောကြားခဲ့ပါတယ်။

နိုင်ငံခြားရေး၀န်ကြီးဟောင်းဖြစ်ပြီး လက်ရှိ ဘာရိန်းဘုရင်ရဲ့ အကြံပေး ရှိခ် ခါလစ် အလ်-ခါလီဖာက ဒီလိုလုပ်ရပ်မျိုးဟာ လက်မခံနိုင်စရာ ဖြစ်တယ်လို့ ပြောကြားခဲ့ပါတယ်။

“ဘာသာရေးအမှတ်သညာတွေကို ဖျက်ဆီးတာဟာ ဘာရိန်းပြည်သူတွေရဲ့ အမူအကျင့်မျိုး မဟုတ်ပါဘူး။ ဒါဟာ ရာဇ၀တ်မှု၊အမုန်းတရားသာဖြစ်ပြီး ဒါမျိုးကို လက်မခံပါဘူး။ ဘာရိန်းမှာ ဘာသာတရားပေါင်းစုံ၊ လူမျိုးပေါင်းစုံ အတူယှဥ်တွဲနေထိုင်နေကြပါတယ်”

ပင်လယ်ကွေ့နိုင်ငံငယ်တစ်ခုဖြစ်တဲ့ ဘာရိန်းဟာ အစ္စလာမ်ဘာသာ၀င်အများစုရှိရာ နိုင်ငံဖြစ်ပြီး ကမ္ဘာတစ်၀ှမ်းက ဘာသာစုံ၊ လူမျိုးစုံ လာရောက်အလုပ်လုပ်ကိုင်တဲ့ နိုင်ငံတစ်ခုလည်း ဖြစ်ပါတယ်။

Ref : Alarabiya