ဆိုလိုင်မာနီနှင့် မူဟန်ဒစ် ပြည်တွင်းဖြစ်ဒုံးကျည်သစ် ၂ မျိုးကို အီရန်ထုတ်ပြ

ဩဂုတ် ၂၁၊ ၂၀၂၀
M-Media

-ကျဆုံးသွားတဲ့ ထိပ်တန်းခေါင်းဆောင်တွေအမည်ပေးထားတဲ့ ပြည်တွင်းဖြစ် ဒုံးကျည်သစ် နှစ်မျိုးကို အီရန်က မနေ့မှာ ထုတ်ပြလိုက်ပါတယ်။

ဒုံးကျည်သစ်တွေဟာ တိုက်ချင်းပစ်ဒုံးကျည်နဲ့ ခရုဇ်ဒုံးကျည်အမျိုးအစား ဖြစ်ပါတယ်။ ကာစင်ဆိုလိုင်မာနီလို့ အမည်ပေးထားတဲ့ တိုက်ချင်းပစ်ဒုံးကျည်ဟာ မိုင် ၆၀၀ အကွာအဝေးအထိ ပစ်ခတ်နိုင်ပြီး အဘူ မဟ်ဒီ အလ် မူဟန်ဒစ်လို့ အမည်ပေးထားတဲ့ ခရုဇ်ဒုံးကျည်က​ မိုင် ၄၀၀ အဝေးအထိ ပစ်ခတ်နိုင်ပါတယ်။

ဗိုလ်ချုပ် ကာစင် ဆိုလိုင်မာနီဟာ အီရန်တော်လှန်ရေးအစောင့်တပ်ဖွဲ့ အကြီးအကဲဖြစ်ပြီး၊ အလ် မူဟန်ဒစ်က အီရတ်ပြည်သူ့စစ်ခေါင်းဆောင်ဖြစ်ပါတယ်။ သူတို့ ၂ ဦးစလုံးဟာ ဇန်နဝါရီလက အီရတ်နိုင်ငံ ဘဂ္ဂဒတ်မြို့မှာ အမေရိကန်ရဲ့ လုပ်ကြံသတ်ဖြတ်ခြင်းကို ခံခဲ့ရပါတယ်။

သမ္မတ ဟာဆန်ရူဟာနီက ပြည်တွင်းဖြစ်ဒုံးကျည်တွေရဲ့ အကွာအဝေးကို ၂ နှစ်အတွင်း ​သိသိသာသာ မြင့်တက်လာအောင် တိုးမြှင့်နိုင်တာဟာ ကြီးမားတဲ့ အောင်မြင်မှုဖြစ်ပြီး မိမိတို့ရဲ့ စစ်အင်အားနဲ့ ဒုံးကျည်စီမံကိန်းဟာ ကာကွယ်ရေးအတွက်သာ ဖြစ်တယ်လို့ ရုပ်သံမိန့်ခွန်းမှာ ပြောကြားခဲ့ပါတယ်။

မနေ့က ကာကွယ်ရေးနေ့မှာ အီရန်ဟာ ဒရုန်းတွေမှာအသုံးပြုနိုင်မယ့် ပြည်တွင်းဖြစ် အပေါ့စား အင်ဂျင်တွေ၊ ​ပြည်တွင်းဖြစ် Kowsar တိုက်လေယာဉ်မှာအသုံးပြုနိုင်မယ့် Owj အင်ဂျင်ထုတ်လုပ်ရေးစက်ရုံတွေကိုလည်း ထုတ်ပြခဲ့ပါတယ်။

Ref: Aljazeera