တရုတ်၏ ဒုံးကျည်စမ်းသပ်မှုမှာ ဒေသအတွင်း ခြိမ်းခြောက်မှုဟု ကန်ပြော

သြဂုတ် ၂၈၊ ၂၀၂၀
M-Media

-တောင်တရုတ်ပင်လယ်မှာ တရုတ်က တိုက်ချင်းပစ် ဒုံးကျည်တွေ စမ်းသပ်ပစ်လွှတ်မှုဟာ ဒေသတွင်း ငြိမ်းချမ်းရေးနဲ့ လုံခြုံရေးကို ခြိမ်းခြောက်မှုတစ်ခု ဖြစ်တယ်လို့ အမေရိကန် ကာကွယ်ရေး၀န်ကြီးဌာနက ပြောကြားလိုက်ပါတယ်။

ပြီးခဲ့ရက်ပိုင်းက စစ်ရေးလေ့ကျင့်မှုအတွင်း တရုတ်ဟာ ပိုင်ဆိုင်မှု အငြင်းပွားနေတဲ့ ပါရာဆဲလ်ကျွန်းနားကို ဒုံးကျည် ၄ လုံးထက်မနည်း ပစ်လွှတ်ခဲ့တာပါ။

မနေ့က အမေရိကန် ကာကွယ်ရေး၀န်ကြီးဌာနရဲ့ ထုတ်ပြန်ချက်မှာ တရုတ်ဟာ အငြင်းပွားဧရိယာတွေမှာ ရန်လိုတဲ့ လုပ်ရပ်တွေ မလုပ်ရဘူးဆိုတဲ့ ၂၀၀၂ ခုနှစ် ကတိက၀တ်ကို လိုက်နာမှု မရှိဘူးလို့ ဖော်ပြထားပါတယ်။

“တောင်တရုတ်ပင်လယ်က အငြင်းပွား နယ်မြေတွေမှာ စစ်ရေးလေ့ကျင့်မှု လုပ်ဆောင်တာဟာ တင်းမာမှုလျော့ချရေး၊ တည်ငြိမ်အေးချမ်းမှု ထိန်းသိမ်းရေးတွေနဲ့ ပြဒါတစ်လမ်း သံတစ်လမ်းပါပဲ”

ပတ်၀န်းကျင် နိုင်ငံတစ်ချို့နဲ့ ပိုင်ဆိုင်မှု အငြင်းပွားနေတဲ့ တောင်တရုတ်ပင်လယ်က ဒေသတစ်ချို့မှာ ပြီးခဲ့တဲ့ ၁၀ နှစ်အတွင်း တရုတ်က စစ်စခန်းတွေ၊ ကျွန်းတုတွေ ဆောက်လုပ်လာပါတယ်။

ဗုဒ္ဓဟူးနေ့က တရုတ်ရဲ့ ဒုံးကျည်ပစ်ခတ်စမ်းသပ်မှုမှာ လေယာဥ်တင်သဘ်ောဖျက် ဒုံးကျည်လည်း ပါ၀င်ပါတယ်။ တရုတ်က ဒီပစ်ခတ်မှုဟာ တောင်တရုတ်ပင်လယ်က လေယာဥ်မပျံရဇုန်အတွင်း အမေရိကန် ထောက်လှမ်းရေးလေယာဥ် ပျံသန်းမှုကို တုန့်ပြန်တာဖြစ်တယ်လို့ ထုတ်ပြန်ခဲ့ပါတယ်။

Ref: Aljazeera