လူမည်းအမျိုးသားကို ရုံသွင်းပြသမှုအတွက် အမေရိကန်တိရစ္ဆာန်ရုံ ပြန်တောင်းပန်

ဩဂုတ် ၂၈၊ ၂၀၂၀
M-Media

– လွန်ခဲ့တဲ့ နှစ်ပေါင်း ၁၀၀ ကျော်က လူမည်းတစ်ဦးကို ရုံသွင်းပြသခဲ့မှုအတွက် အမေရိကန် တိရစ္ဆာန်ရုံက ပြန်တောင်းပန်လိုက်ပါတယ်။

အိုတာဘန်ဂါဆိုတဲ့ ကွန်ဂိုနိုင်ငံက လူမည်းလူငယ်တစ်ဦးဟာ ၁၉၀၄ ခုနှစ်မှာ အမေရိကန် ကုန်သည်တစ်ဦးရဲ့ ခေါ်ဆောင်မှုကို ခံခဲ့ရပြီးတဲ့နောက် ၁၉၀၆ ခုနှစ်မှာတော့ နယူးယောက်မြို့က Bronx Zoo ရဲ့ မျောက်လှောင်အိမ်ထဲမှာ ပြသခံခဲ့ရတာပါ။

အဲဒီအချိန်က တက်ကြွလှုပ်ရှားသူတွေရဲ့ ၀ေဖန်မှုကြောင့် အိုတာဘန်ဂါကို ပြသမှုဟာ ရက်ပေါင်း ၂၀ သာ ကြာမြင့်ခဲ့ပါတယ်။

Bronx Zoo ကို စီမံတဲ့ သားရိုင်း တိရစ္ဆာန်ထိန်းသိမ်းရေးအဖွဲ့(WCS)က ဒီကိစ္စအတွက် ပြီးခဲ့တဲ့ ရက်ပိုင်းမှာ တောင်းပန်ခဲ့ပါတယ်။

ဥက္ကဌ ခရစ္စတီယန်ဆမ်ပါက လူမျိုးရေးခွဲခြားမှု အမြစ်တွယ်ခဲ့တဲ့ မိမိတို့အဖွဲ့ရဲ့ သမိုင်းကြောင်းကို ဖွင့်ဟပြောကြားဖို့ အရေးကြီးကြောင်း အိုတာဘန်ဂါကို ရုံသွင်းပြသခဲ့မှုအတွက် မိမိတိုမှာ အပြစ်မကင်းကြောင်း ပြောကြားခဲ့ပါတယ်။

အိုတာဘန်ဂါကို ရုံသွင်းပြသခဲ့တာ မဟုတ်ဘဲ သူဟာ တိရစ္ဆာန်ရုံ ၀န်ထမ်းတစ်ဦးသာ ဖြစ်တယ်လို့ WCS က အရင်တုန်းက ဖုံးကွယ်ခဲ့ဖူးပါတယ်။

အသက် ၁၃ နှစ်လောက်သာ ရှိသေပြီး ရက် ၂၀ ကြာ တိရစ္ဆာန်ရုံမှာ ပြသခံခဲ့ရတဲ့ အိုတာဘန်ဂါဟာ အာဖရိကန်-အမေရိကန် ခရစ်ယာန်တရားဟောဆရာရဲ့ ကယ်တင်မှုကြောင့် လွတ်မြောက်ခဲ့ပြီး ဗာဂျီးနီးယားပြည်နယ်က ခရစ်ယာန် သာသနာပြုကျောင်းတစ်ကျောင်းမှာ ပညာသင်ကြားခွင့် ရခဲ့ပါတယ်။

ဒါပေမယ့် နောက်ပိုင်းမှာ စိတ်ကျရောဂါ ခံစားခဲ့ရပြီး ၁၉၁၆ ခုနှစ အသက် ၂၅ နှစ်အရွယ်လောက်မှာ မိမိကိုယ်ကို သေနတ်နဲ့ပစ်ကာ အဆုံးစီရင်သွားခဲ့ပါတယ်။

Ref:BBC