အစ္စရေးအပေါ် စီးပွားရေး သပိတ်မှောက်ထားမှုကို ယူအေအီး ရုပ်သိမ်း

ဩဂုတ် ၃၁၊ ၂၀၂၀
M-Media

-အစ္စရေးအပေါ် စီးပွားရေး သပိတ်မှောက်ထားမှုကို အာရပ်စော်ဘွားများပြည်ထောင်စု (ယူအေအီး) က ဖယ်ရှားလိုက်ပြီး နှစ်နိုင်ငံ ကုန်သွယ်ရေးနဲ့ ဘဏ္ဏာရေးဆိုင်ရာ ပူးပေါင်းဆောင်ရွက်မှုတွေ လုပ်ဆောင်နိုင်တော့မှာ ဖြစ်ပါတယ်။

ယူအေအီးနဲ၌ အစ္စရေးတို့ဟာ အမေရိကန်ရဲ့ ညှိနှိုင်းမှုနဲ့ ဩဂုတ်လ ၁၃ ရက်နေ့က တရား၀င် သံတမန်ဆက်ဆံရေး ထူထောင်ခဲ့တာပါ။

တိုင်းပြည်စတင်တည်ထောင်တဲ့ ၁၉၇၂ ခုနှစ်ကစတင်ပြီး ယူအေအီးဟာ အစ္စရေးအပေါ် စီးပွားရေးအရ သပိတ်မှောက်ထားတာ ဖြစ်ပါတယ်။ ယူအေအီးခေါင်းဆောင် ရှိခ် ခါလီဖာ ဘင် ဇယဒ် အလ် နဟ်ယန်က အစ္စရေးအပေါ် ဒီသပိတ်မှောက်မှုကို မနေ့မှာ ပယ်ဖျက်လိုက်ပါတယ်။

ဒါ့ကြောင့် အစ္စရေးလုပ်ငန်းတွေဟာ ယူအေအီးမှာ အလုပ်လာလုပ်နိုင်မှာဖြစ်သလို၊ အစ္စရေးကုန်ပစ္စည်းတွေကိုလည်း ယူအေအီးက ၀ယ်ယူနိုင်မှာ ဖြစ်ပါတယ်။

ဒီလိုခွင့်ပြုလိုက်ခြင်းဟာ နှစ်နိုင်ငံ စီးပွားရေနဲ့ နည်းပညာဆိုင်ရာ ပူးပေါင်းဆောင်ရွက်မှု လုပ်ဆောင်နိုင်ဖို့အတွက် လမ်းစဉ်တစ်ခု ချမှတ်လိုက်တာ ဖြစ်တယ်လို့ ယူအေအီး နိုင်ငံပိုင်မီဒီယာ WAM က ဖော်ပြခဲ့ပါတယ်။ ဩဂုတ် ၃၁ ရက် တနင်္လာနေ့မှာ ယူအေအီးနဲ့ အစ္စရေးတို့အကြား ပထမဆုံး ကုန်သွယ်ရေးလေကြောင်းခရီးစဉ် ပြေးဆွဲမှာ ဖြစ်ပါတယ်။

အစ္စရေးနဲ့ ယူအေအီးတို့အကြား သံတမန်ဆက်ဆံရေး ထူထောင်မှုကို ပါလက်စတိုင်းခေါင်းဆောင်ပိုင်းနဲ့ ပြည်သူတွေက ကန့်ကွက်ခဲ့ကြပါတယ်။

Ref : Aljazeera