ပါလက်စတိုင်းကိစ္စကို လစ်လျူမရှုဘူးလို့ ယူအေအီးပြော

စက်တင်ဘာ ၁၊ ၂၀၂၀
M-Media

– အစ္စရေးနဲ့ ဆက်ဆံရေးထူထောင်မှုဟာ ပါလက်စတိုင်းကိစ္စကို လစ်လျူရှုပြီး ဆောင်ရွက်ခဲ့တာ မဟုတ်ဘူးလို့ အာရပ်စော်ဘွားများပြည်ထောင်စု (ယူအေအီး) နိုင်ငံရဲ့ အိမ်ရှေ့မင်းသား ရှိခ် မိုဟာမက် ဘင် ဇယဒ် အလ် နဟ်ယန်က မနေ့မှာ ပြောကြားလိုက်ပါတယ်။

ယူအေအီးဟာ အစ္စရေးနဲ့ ဆက်ဆံရေးထူထောင်ပြီး ပူးပေါင်းဆောင်ရွက်မှုတွေ ပြုလုပ်ဖို့အတွက် သြဂုတ်လ ၁၃ ရက်နေ့မှာ သဘောတူညီချက် ရခဲ့ပါတယ်။

ဂျော်ဒန်နဲ့ အီဂျစ်တို့ ပြီးတဲ့နောက် အစ္စရေးနဲ့ ဆက်ဆံတဲ့ အရှေ့အလယ်ပိုင်းက တတိယမြောက်နိုင်ငံ ဖြစ်လာတာပါ။ ဒီသဘောတူညီချက််ကို ပါလက်စတိုင်း ခေါင်းဆောင်ပိုင်းနဲ့ ပြည်သူတွေက ကန့်ကွက်ထားပါတယ်။

အိမ်ရှေ့မင်းသား အလ် နဟ်ယန်က ယူအေအီးဟာ ပါလက်စတိုင်းတွေရဲ့ ဒုတိယနိုင်ငံဖြစ်ပြီး၊ အရှေဂျေရုစလင်ကို မြို့တော်ထားမယ့် ပါလက်စတိုင်းနိုင်ငံ ထူထောင်ရေးကို ဆက်လက်ထောက်ခံနေတုန်းပဲလို့ မနေ့မှာ ပြောကြားခဲ့ပါတယ်။

“ငြိမ်းချမ်းရေးဆိုတာ မဟာဗျူဟာကျတဲ့ ရွေးချယ်မှု ဖြစ်ပါတယ်။ ဒါပေမယ့် ပါလက်စတိုင်း ကိစ္စကိုတော့ ကျွန်တော်တို့ လစ်လျူ မရှုပါဘူး”

သဘောတူညီချက်ကြောင့် ပါလက်စတိုင်းပိုင် အနောက်ဖက်ကမ်းရဲ့ ၃၀ ရာခိုင်နှုန်း ပိုင်နက်ထဲ သွတ်သွင်းမယ့် အစ္စရေးရဲ့ အစီအစဥ်ကို ဟန့်တားနိုင်ခဲ့တယ်လို့ ယူအေအီးက ထုတ်ပြန်ခဲ့ပါတယ်။

အစ္စရေး၀န်ကြီးချုပ် နေတန်ယာဟုက အနောက်ဖက်ကမ်းက ဒေသတွေထပ်မံသိမ်းပိုက်မယ့် အစီအစဥ်ကို မစွန့်လွှတ်ဘူးလို့ ယူအေအီးနဲ့ သဘောတူညီချက်ရပြီး နာရီပိုင်းအတွင်းမှာပဲ ထုတ်ပြောခဲ့ပါတယ်။

Ref: Alarabiya