သမ္မတထရမ့်ကို နော်ဝေလွှတ်တော်အမတ်က နိုဘယ်ငြိမ်းချမ်းရေးဆုအတွက် အမည်တင်သွင်း

စက်တင်ဘာ ၉၊ ၂၀၂၀
M-Media

-အစ္စရေးနဲ့ အာရပ်စော်ဘွားများပြည်ထောင်စု (ယူအေအီး) တို့အကြား ငြိမ်းချမ်းရေးသဘောတူညီချက်ရအောင် စွမ်းဆောင်ပေးနိုင်မှုအတွက် အမေရိကန်သမ္မတ ဒေါ်နယ်ထရမ့်ကို အခုနှစ် နိုဘယ်ငြိမ်းချမ်းရေးဆုအတွက် စဉ်းစားပေးဖို့ နော်ဝေလွှတ်တော်အမတ်တစ်ဦးက အမည်စာရင်း တင်သွင်းလိုက်ပါတယ်။

နေတိုးဆိုင်ရာ နော်ဝေကိုယ်စားလှယ်အဖွဲ့ခေါင်းဆောင်ဖြစ်ပြီး နော်ဝေလွှတ်တော်က သက်တမ်းလေးကြိမ်မြောက် လွှတ်တော်အမတ်လည်းဖြစ်တဲ့ Christian Tybring-Gjedde က နိုဘယ်ဆုရွေးချယ်ရေးကော်မတီကို ထရမ့်ရဲ့အမည် တင်သွင်းခဲ့တာပါ။

ထရမ့်ဟာ နိုင်ငံတွေအကြား ငြိမ်းချမ်းရေးကို နိုဘယ်ဆုရ အခြားသူတွေထက် ပိုမိုလုပ်ဆောင်ခဲ့တယ်လို့ သူက Fox News နဲ့ အင်တာဗျူးမှာ ထည့်သွင်းကြေားခဲ့ပါတယ်။

အမေရိကန်ရဲ့ကြားဝင်ပေးညှိနှိုင်းပေးမှုကြောင့် အစ္စရေးနဲ့ ယူအေအီးတို့ဟာ ပြီးခဲ့တဲ့လမှာ တရားဝင် သံတမန်ဆက်ဆံရေး ထူထောင်ခဲ့ပြီး ဂျော်ဒန်၊ အီဂျစ်တို့ပြီးတဲ့နောက် အရှေ့အလယ်ပိုင်းမှာ အစ္စရေးနဲ့ ဆက်ဆံတဲ့ တတိယမြောက်နိုင်ငံ ဖြစ်လာပါတယ်။

Christian Tybring-Gjedde ရဲ့ အမည်စာရင်းတင်သွင်းတဲ့ လျှောက်ထားလွှာမှာ နှစ်နိုင်ငံအကြား မကျေလည်မှုတွေ လျော့ပါးရေး ထရမ့်ဟာ အရေးပါတဲ့ အခန်းကဏ္ဍကနေ ပါဝင်ခဲ့ကြောင်း၊ အခြား အရှေ့အလယ်ပိုင်းနိုင်ငံတွေလည်း ဒီလမ်းကြောင်းကို ဆက်လျှောက်မယ်လို့ မျှော်လင့်ရတာကြောင့် ဒေသတွင်း ငြိမ်းချမ်းရေး၊ သာယာ၀ပြောရေးမှာ ဒီသဘောတူညီချက်က အလှည့်အပြောင်းတစ်ခု ဖြစ်လာနိုင်ကြောင်း ရေးသားဖော်ပြထားပါတယ်။

အိန္ဒိယနဲ့ ပါကစ္စတန်တို့အကြား ရှိနေတဲ့ ကက်ရှ်မီးယားကိစ္စ၊ တောင်-မြောက် ကိုရီးယားနှစ်နိုင်ငံ တင်းမာမှု လျော့ပါးရေးကိစ္စတွေမှာ ထရမ့်က ကြာင်းဝင်ဆောင်ရွက်ပေးခဲ့မှုတွေကို ဒီလျှောက်ထားလွှာမှာ ထောက်ပြထားသလို၊ အရှေ့အလယ်ပိုင်းဒေသမှာ အမေရိကန်တပ်ဖွဲ့တွေ လျော့ချမယ့် ထရမ့်ရဲ့အစီအစဉ်ကိုလည်း ချီးကျူးခဲ့ပါတယ်။

ထရမ့်အနေနဲ့ နိုဘယ်ငြိမ်းချမ်းရေးဆု အမည်စာရင်းတင်သွင်းခံရမှုဟာ ဒါက ပထမဆုံးအကြိမ် မဟုတ်ပါဘူး။ ကိုရီးယားကျွန်းဆွယ် နျူကင်းစင်ရေးအတွက် မြောက်ကိုရီးယားခေါင်းဆောင် ကင်ဂျုံအွန်နဲ့ သဘောတူညီချက်ရခဲ့တဲ့ ၂၀၁၈ ခုနှစ်ကလည်း ဂျပန်ဝန်ကြီးချုပ် ရှင်ဇိုအာဘေးက ထရမ့်ကို အမည်စာရင်းတင်သွင်းခဲ့ဖူးတယ်လို့ သတင်းထွက်ခဲ့ပါတယ်။

ထရမ့်ကို အမည်စာရင်းတင်သွင်းတာဟာ အရမ်းနှစ်သက်လို့မဟုတ်ကြောင်း၊ သူ့ရဲ့အပြုအမူထက် သူလုပ်ခဲ့တာတွေကို ကော်မတီက သုံးသပ်သင့်ကြောင်း၊ ပြီးခဲ့တဲ့နှစ်အနည်းငယ်အတွင်း ငြိမ်းချမ်းရေးနိုဘယ်ဆုရရှိခဲ့သူတွေဟာ ထရမ့်လောက် အလုပ်မလုပ်နိုင်ခဲ့ကြောင်း Tybring-Gjedde က Fox News နဲ့ အင်တာဗျူါ်မှာ ထည့်သွင်းပြောကြားခဲ့ပါတယ်။

Ref: The Hill