ဆွီဒင်လက်ယာစွန်းရောက်အဖွဲ့က ကုရ်အာန်မီးရှို့ပွဲလုပ်

စက်တင်ဘာ ၁၀၊ ၂၀၂၀
M-Media

-ဆွီဒင်နိုင်ငံက လယ်ယာစွန်းရောက် အဖွဲ့တစ်ခုရဲ့ အဖွဲ့ဝင်တွေဟာ မြို့တော်စတော့ဟုမ်းမှာ ကုရ်အာန်မီးရှို့ပွဲအခမ်းအနားတစ်ခုကို ဒီကနေ့ လုပ်ဆောင်ခဲ့ပါတယ်။

​Stram Kurs ဆိုတဲ့ လက်ယာစွန်းရောက်အဖွဲ့ဖြစ်ပြီး အဖွဲ့ခေါင်းဆောင် Rasmus Paludan က ကုရ်အာန်မီးရှို့တဲ့ ဗီဒီယိုကို သူ့ရဲ့ ဆိုရှယ်မီဒီယာမှာ လွှင့်တင်ခဲ့ပါတယ်။ ကုရ်အာန်မီးရှို့ပွဲလုပ်ဖို့အတွက် ဒီအဖွဲ့က ရဲတပ်ဖွဲ့ထံမှာ ခွင့်ပြုချက်တောင်းခဲ့ပေမယ့် ရဲတပ်ဖွဲ့က မပေးပါဘူး။

စက်တင်ဘာ ၁၂ ရက်နေ့ကျရင် စတော့ဟုမ်းမြို့က နေရာ ၅ ခုမှာ ဒီလို မီးရှို့ပွဲတွေလုပ်ဖို့လည်း ဒီအဖွဲ့က စီစဉ်ထားပါတယ်။

ဆွီဒင်က မွတ်စလင်လူ့အဖွဲ့အစည်းကတော့ ဒီအခြေအနေတွေကို ဘယ်လိုရင်ဆိုင်မလဲဆိုတာ ဆွေးနွေးတိုင်ပင်နေကြပါတယ်။

“တည်တည်ငြိမ်ငြိမ်နဲ့ ရန်သူကိုမိတ်ဆွေအဖြစ်ပြောင်းဖို့ ကျွန်တော်တို့က တိုက်တွန်းအားပေးရမှာပါ။ စိတ်လိုက်မာန်ပါ လုပ်တာမျိုးထက် ဥပက္ခာပြုလိုက်ရမှာ ဖြစ်ပါတယ်” လို့ စတော့ဟုမ်းဗလီက ရှေ့ဆောင်အီမာမ်တစ်ဦးဖြစ်တဲ့ မဟ်မူးဒ် ခါလ်ဖီက ပြောပါတယ်။

စနနေ့ကျရင် စတော့ဟုမ်းမြို့တွင်းက ဗလီတွေမှာ လုံခြုံရေးတိုးမြှင့်ပေးဖို့အတွက်လည်း မွတ်စလင်အဖွဲ့က ရဲတပ်ဖွဲ့ထံ တောင်းဆိုထားပါတယ်။

ပြီးခဲ့တဲ့တစ်ပတ်ကလည်း ​Stram Kurs အဖွဲ့ဟာ နိုင်ငံတောင်ပိုင်း မာလ်မိုမြို့မှာ ဝက်အူချောင်းတွေနဲ့ ချည်နှောင်ထားတဲ့ ကုရ်အာန်ကို မီးရှို့ပွဲလုပ်ခဲ့ပါတယ်။ ဒီပွဲကို အဖွဲ့ခေါင်းဆောင် ​Rasmus Paludan လာရောက်ဖို့ စီစဉ်ထားပေမယ့် ဆွီဒင်အစိုးရက ပြည်ဝင်ခွင့်မပေးခဲ့ဘဲ နောက်ပိုင်းမှာ ပြည်ဝင်ခွင့် ၂ နှစ် ပိတ်ပင်ခဲ့ပါတယ်။

ဒီကနေ့ မီးရှို့ပွဲအပြီး နာရီပိုင်းအကြာမှာပဲ ဒီကိစ္စကို ဆန့်ကျင်တဲ့ ဆန္ဒပြပွဲတစ်ခုကို ဆွီဒင်ပြည်သူတွေက လုပ်ဆောင်ခဲ့ပါတယ်။ လူ ၃၀၀ လောက်ပါဝင်တဲ့ ဒီဆန္ဒပြပွဲမှာ ရဲတပ်ဖွဲ့နဲ့ ထိပ်တိုက်တွေ့ခဲ့ပြီး အနည်းဆုံး လူ ၁၀ ဦး ဖမ်းဆီးခံရကာ ရဲတပ်ဖွဲ့ဝင်တွေလည်း ဒဏ်ရာရခဲ့ပါတယ်။

Ref: Aljazeera