ဆော်ဒီတွင် ပုဂ္ဂလိကလုပ်ငန်းများ၌ အမျိုးသား၊ အမျိုးသမီး တန်းတူလစာပေးရန် သတ်မှတ်

စက်တင်ဘာ ၁၆၊ ၂၀၂၀
M-Media

-နိုင်ငံအတွင်းက ပုဂ္ဂလိကလုပ်ငန်းတွေအနေနဲ့ အမျိုးသမီးတွေကို အမျိုးသားတွေနဲ့ တန်းတူ လုပ်ခလစာ ပေးရမှာဖြစ်ပြီး လစာပေးရာမှာ ကျား၊ မ ခွဲခြားတာမျိုး လက်ခံမှာ မဟုတ်ဘူးလို့ ဆော်ဒီအာရေဗျ အစိုးရက ပြောကြားလိုက်ပါတယ်။

“ပုဂ္ဂလိကလုပ်ငန်းတွေမှာ တူညီတဲ့တာဝန်တွေအတွက် အလုပ်ခန့်ထားရမှာ လုပ်ငန်းရှင်တွေက ကျား၊ မ၊ အသက်အရွယ်၊ မသန်စွမ်းမှု​တွေကို အခြေခံပြီး ခွဲခြားတာမျိုးကို လုံး၀ ခွင့်မပြုပါဘူး” လို့ ဆော်ဒီ လူ့စွမ်းအားအရင်းမြစ်နှင့် လူမှု့ ဖွဲ့ဖြိုးတိုးတက်ရေး ဝန်ကြီးဌာနရဲ့ အခုတစ်ပတ်အစောပိုင်းက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

ဒါဟာ အမျိုးသမီးတွေ အလုပ်အကိုင် ပိုမိုရရှိရေးအတွက် အခွင့်အလမ်း​တွေ ပိုမိုဖန်တီးပေးဖို့ ဖြစ်တယ်လို့ ဝန်ကြီးဌာနက ဆိုပါတယ်။

ဆော်ဒီဟာ စီးပွားရေးပြုပြင်ပြောင်းလဲဖို့အတွက် ၂၀၃၀ ရည်မှန်းချက်ကို ချမှတ်ထားပြီး တိုင်းပြည်မှာ အမျိုးသမီးလုပ်အား တိုးမြှင့်ရေးဟာ ဒီရည်မှန်းချက်ရဲ့ အဓိကကဏ္ဍ ဖြစ်ပါတယ်။ ပြီးခဲ့တဲ့ ၄ နှစ်အတွင်း ဆော်ဒီမှာ အလုပ်လက်မဲ့ အမျိုးသမီးအရေအတွက်ဟာ သိသိသာသာ ကျဆင်းလာခဲ့ပါတယ်။

ဆော်ဒီအာရေဗျရဲ့ ၂၀၃၀ ရည်မှန်းချက်မှာ လာမယ့် ၁၀ စုနှစ်တစ်ခုအတွင်း အမျိုးသမီး ၁ သန်းလောက်ကို အလုပ်အကိုင်ဖန်တီးပေးနိုင်ဖို့လည်း ပါဝင်ပါတယ်။

Ref: Alarabiya