ဆဌမမျိုးဆက် တိုက်လေယာဥ်ကို အမေရိကန်က လျှို့၀ှက်တည်ဆောက်ကာ စမ်းသပ်ပျံသန်းပြီးစီး

စက်တင်ဘာ ၁၇၊ ၂၀၂၀
M-Media

-ဆဌမမြောက် တိုက်လေယာဥ်မျိုးဆက်ဖြစ်လာမယ့် နည်းပညာမြင့် တိုက်လေယာဥ်ကို အမေရိကန်က လျှို့၀ှက်တည်ဆောက်ကာ အောင်မြင်စွာ စမ်းသပ်နိုင်ခဲ့တယ်လို့ သိရပါတယ်။

အမေရိကန် လေတပ်က နည်းပညာဆိုင်ရာ ဒုတိယအကြီးအကဲ ဒေါက်တာ ၀ီလ်ရိုပါက ဒီလျှို့၀ှက် စီမံကိန်းကို အာကာသနည်းပညာပြပွဲတစ်ခုဖြစ်တဲ့ 2020 Air, Space and Cyber ညီလာခံမှာ ထုတ်ပြောခဲ့တာပါ။

သမရိုးကျ တိုက်လေယာဥ်တည်ဆောက်မှု၊ လက်နက်၊ ဆင်ဆာတပ်ဆင်မှု စတာတွေမှာ လုံ၀ကွဲထွက်သွားမယ့် မျိုးဆက်သစ် လေကြောင်းကာကွယ်ရေးစီမံကိန်း NGAD ကို အမေရိကန်က အကောင်အထည်ဖော်နေပြီး တိုက်လေယာဥ်သစ်က ဒီစီမံကိန်းရဲ့ တစ်စိတ်တစ်ပိုင်း ဖြစ်ပါတယ်။

ရိုပါက တိုက်လေယာဥ်သစ်ကို ကနဦးက ဒစ်ဂျစ်တယ်ကမ္ဘာမှာ တပ်ဆင်၊ တည်ဆောက် စမ်းသပ်ခဲ့ပြီးတဲ့နောက် မကြာခင်ကပဲ တကယ့်အပြင်မှာ တည်ဆောက်ကာ စမ်းသပ်ပျံသန်းနိုင်ခဲ့တယ်လို့ ​​ပြောပါ​တယ်။

လေယာဥ်ကို သာမန်တည်ဆောက်မှု ပုံစံမျိုးမဟုတ်ဘဲ ပိုပြီး ပြောင်းလွယ်ပြင်လွယ်နိုင်တဲ့ Digital Engineering နည်းပညာကို အသုံးပြု တည်ဆောက်တာ ဖြစ်တယ်လို့ ရို ပါက ဆိုပြီး အသေးစိတ်ကို ထုတ်မပြောခဲ့ပါဘူး။

ဒီ ဆဌမ တိုက်လေယာဥ်မျိုးဆက်ဟာ လက်ရှိ ရှိနေတဲ့ နောက်ဆုံးပေါ် F-22၊ F-35 တိုက်လေယာဥ်တွေနေရာကို ဆက်ခံမှာ ဖြစ်ပါတယ်။

Ref; Asia Times

(ဓာတ်ပုံ – အနာဂတ်တွင်ဖြစ်လာနိုင်သည့် တိုက်လေယာဉ်ပုံစံကို ဘိုးအင်းကုမ္ပဏီက စိတ်ကူးပုံဖော်ထားမှု)