ပါလက်စတိုင်းပြဿနာ၏အဖြေက အစ္စရေးနှင့် ဆက်ဆံရေးထူထောင်မှု မဟုတ်ဟု ကာတာပြော

စက်တင်ဘာ ၁၆၊ ၂၀၂၀
M-Media

-အစ္စရေးနဲ့ ဆက်ဆံရေးထူထောင်ခြင်းက ပါလက်စတိုင်း-အစ္စရေးပြဿနာကို ဖြေရှင်းနိုင်မှာ မဟုတ်တဲ့အတွက် အစ္စရေးနဲ့ အဆက်အသွယ်လုပ်မှာမဟုတ်ဘူးလို့ ကာတာနိုင်ငံက ပြောကြားလိုက်ပါတယ်။

ပင်လယ်ကွေ့နိုင်ငံတွေဖြစ်တဲ့ အာရပ်စော်ဘွားများပြည်ထောင်စု (ယူအေအီး) နဲ့ ဘာရိန်းတို့ဟာ အစ္စရေးနဲ့ တရား၀င်ဆက်ဆံရေး ထူထောင်ဖို့အတွက် မနေ့က အမေရိကန်မှာ လက်မှတ်ရေးထိုးခဲ့ကြပါတယ်။

ပင်လယ်ကွေ့က အခြားနိုင်ငံတွေလည်း ဒီလိုခြေလှမ်းမျိုး လှမ်းလာနိုင်တယ်လို့ သတင်းတွေ ထွက်နေပေမယ့် ကာတာကတော့ ငြင်းဆန်ပါတယ်။

“ဆက်ဆံရေးထူထောင်မှုဟာ ပြဿနာရဲ့ ရင်းမြစ်မဟုတ်တဲ့အတွက် ဒီလိုဆောင်ရွက်မှုကနေပြီး အဖြေလည်း ထွက်မှာမဟုတ်ပါဘူး။ ပြဿနာရဲ့ရင်းမြစ်က ပါလက်စတိုင်းတွေ ဆိုးရွားတဲ့ အခြေအနေမျိုးမှာ နေထိုင်နေရတာ၊ နိုင်ငံပျောက်နေတာ၊ ကျူးကျော်သိမ်းပိုက်ခံရတာတွေ ဖြစ်ပါတယ်” လို့ ကာတာနိုင်ငံခြားရေး၀န်ကြီး လို၀ါ အလ်-ခါတာရ်က ပြောကြားခဲ့ပါတယ်။

ယူအေအီးနဲ့ ဘာရိန်းတို့ဟာ အစ္စရေးနဲ့ သံတမန် ဆက်ဆံရေး ထူထောင်မှုအပြင် စီးပွားရေး၊ လုံခြုံရေးနဲ့ အခြားနယ်ပယ်တွေမှာပါ ပူးပေါင်းဆောင်ရွက်သွားမှာ ဖြစ်ပါတယ်။

ပါလက်စတိုင်းခေါင်းဆောင်ပိုင်းနဲ့ ပြည်သူတွေက ယူအေအီးနဲ့ ဘာရိန်းတို့ရဲ့ လုပ်ရပ်ကို ရှုတ်ချခဲ့ပြီး ဒါဟာ နောက်ကျောကို ဓားနဲ့ထိုးတာဖြစ်တယ်လို့ တုန့်ပြန်ခဲ့ပါတယ်။

Ref : Aljazeera