အာဖဂန်နစ္စတန်နိုင်ငံတစ်ဝှမ်း တာလီဘန်က တိုက်ခိုက်မှုများ ပြုလုပ်

စက်တင်ဘာ ၂၂၊ ၂၀၂၀
M-Media

-တာလီဘန်အဖွဲ့နဲ့ အာဖဂန်အစိုးရတို့ကြား ဆွေးနွေးမှုတွေ စတင်ခဲ့တဲ့ပြီး စက်တင်ဘာ ၁၂ ရက်နေ့နောက်ပိုင်း အာဖဂန်နစ္စတန်နိုင်ငံတစ်ဝှမ်း တိုက်ခိုက်မှုတွေ အကြီးအကျယ်ဖြစ်ပွားခဲ့တာကြောင့် အနည်းဆုံး လုံခြုံရေးတပ်ဖွဲ့ဝင် ၅၇ ဦး သေဆုံးခဲ့ပါတယ်။

တနင်္ဂနွေနေ့ညက နိုင်ငံအလယ်ပိုင်း ​အူရူဇ်ဂန်ပြည်နယ်မှာ တာလီဘန်တွေက စစ်ဆေးရေးဂိတ်တွေကို တိုက်ခိုက်ခဲ့တာကြောင့် လုံခြုံရေးတပ်ဖွဲ့ဝင် ၂၄ ဦး သေဆုံးခဲ့ပါတယ်။ ဘဂ်လန်၊ တက်ဟာရ်၊ ဟဲလ်မန်၊ ကာပီဆာ၊ ဘော့လ်ခ်၊ မိုင်ဒန်ဝါရ်ဒက်၊ ကွန်ဒွဇ် စတဲ့ ပြည်နယ်တွေမှာလည်း တာလီဘန်တွေက အစိုးရနဲ့ လုံခြုံရေးတပ်ဖွဲ့တွေရဲ့ ပစ်မှတ်တွေကို တိုက်ခိုက်ခဲ့ပါတယ်။

အာဖဂန် ပြည်ထဲရေးဝန်ကြီး တာရစ် အာရီယန်က နိုင်ငံတစ်ဝှမ်းမှာ တာလီဘန်တွေရဲ့ တိုက်ခိုက်မှုကြောင့် ပြီးခဲ့တဲ့ သီတင်း ၂ပတ်အတွင်း အရပ်သား ၉၈ ဦး သေဆုံးခဲ့ပြီး၊ ၂၃၀ ဒဏ်ရာရခဲ့တယ်လို့ ပြောကြားခဲ့ပါတယ်။

တိုက်ခိုက်မှုတွေအတွင်း အနည်းဆုံး တာလီဘန်အဖွဲ့ဝင် ၈၀ လောက်သေဆုံးတယ်လို့လည်း အာဖဂန်တာဝန်ရှိသူတွေက ပြောကြားခဲ့ပါတယ်။ တာလီဘန်ကတော့ တိုက်ခိုက်မှုတွေနဲ့ပတ်သက်ပြီး ထုတ်မပြောသေးပါဘူး။

ကာတာနိုင်ငံ ဒိုဟာမြို့မှာ အာဖဂန်အစိုးရနဲ့ တာလီဘန်အဖွဲ့တို့အကြား ဆွေးနွေးမှုတွေပြုလုပ်လာတာ ၁၀ ရက် ကြာမြင့်ပြီဖြစ်ပေမယ့် ​တိုးတက်မှုအနည်းငယ်သာ ရှိနေပါတယ်။

Ref: Aljazeera