မုဒိမ်းမှုကျူးလွန်သူအား ကွပ်မျက်နိုင်မည့် ဥပဒေတစ်ခုကို ဘင်္ဂလားဒေ့ရှ် အတည်ပြု

အောက်တိုဘာ ၁၃၊ ၂၀၂၀
M-Media

-အဓမ္မကျင့်သူတွေကို အမြင့်ဆုံး သေဒဏ်အထိပေးနိုင်မယ့် ဥပဒေပြင်ဆင်ချက်တစ်ခုကို ဘင်္ဂလားဒေ့ရှ်အစိုးရက မနေ့မှာ အတည်ပြုလိုက်ပါတယ်။

နိုင်ငံတောင်ပိုင်း နိုခါလီဒေသမှာ အုပ်စုတစ်စုက အမျိုးသမီးတစ်ဦးကို လိင်ပိုင်းဆိုင်ရာစော်ကားတဲ့ ဗီဒီယိုတစ်ခု ပြီးခဲ့တဲ့သီတင်းပတ်က ဆိုရှယ်မီဒီယာမှာ ပြန့်နှံ့ခဲ့ပြီးတဲ့နောက် ဒီလိုကျူးလွန်သူတွေကို သေဒဏ်ချမှတ်တာအပါအဝင် ပြင်းပြင်းထန်ထန် အပြစ်ပေးရေးအတွက် ဘင်္ဂလားဒေ့ရှ်ပြည်သူတွေက အကြီးအကျယ် ဆန္ဒပြခဲ့ကြပါတယ်။

မနေ့ကကျင်းပပြုလုပ်တဲ့ အစိုးရဝန်ကြီးများအစည်းအဝေးမှာ ဒီအချက်ကို ဆွေးနွေးခဲ့ပြီး အဓမ္မကျင့်သူတွေကို ထိထိရောက်ရောက် အရေးယူနိုင်ရေး ဥပဒေပြင်ဆင်ဖို့ သဘောတူခဲ့ကြပါတယ်။

ဘင်္ဂလားဒေ့ရှ်အစိုးရတာဝန်ရှိသူ ခန်ကာ အန်ဝါရွလ် အစ္စလာမ်က မနေ့က အတည်ပြုခဲ့တဲ့ ‘အမျိုးသမီးများနှင့် ကလေးများအပေါ် စော်ကားဖိနှိပ်မှု တားဆီးရေးဥပဒေ ပြင်ဆင်ချက် ၂၀၂၀’ အရ အဓမ္မပြုကျင့်သူတွေကို အမြင့်ဆုံး သေဒဏ်၊ ပြင်းထန်တဲ့ထောင်ဒဏ်တွေ ပေးနိုင်လိမ့်မယ်လို့ ပြောကြားခဲ့ပါတယ်။

ဒီဥပဒေနဲ့ပတ်သက်တဲ့ အသေးစိတ်အချက်အလက်တွေ၊ စတင်အာဏာသက်ရောက်မယ့် ရက်တွေကို ဘင်္ဂလားဒေ့ရှ် သမ္မတရုံးက ဒီကနေ့မှာ ကြေငြာချက်ထုတ်ပြန်ဖို့ ရှိနေပါတယ်။

Ref: Aljazeera