ဘင်္ဂလားဒေ့ရှ်၏ တစ်ဦးချင်းဂျီဒီပီ အိန္ဒိယကို ကျော်တက်မည်

အောက်တိုဘာ ၁၅၊ ၂၀၂၀
M-Media

-၂၀၂၀ ခုနှစ်အတွင်း ဘင်္ဂလားဒေ့ရှ်ရဲ့ တစ်ဦးချင်း ဂျီဒီပီဟာ အိန္ဒိယနိုင်ငံကို ကျော်တက်ဖို့ရှိတယ်လို့ နိုင်ငံတကာ ငွေကြေးရန်ပုံငွေအဖွဲ့ IMF က ကမ္ဘာစီးပွားရေးသုံးသပ်ချက် အစီရင်ခံစာ (WEO) မှာ ဖော်ပြထားပါတယ်။

အိန္ဒိယရဲ့ တစ်ဦးချင်းဂျီဒီပီဟာ အခုနှစ်မှာ ၁၀.၅ ရာခိုင်နှုန်း ကျဆင်းကာ ၁၈၇၇ ဒေါ်လာသာ ရှိတော့မှာဖြစ်ပြီ ဘင်္ဂလားဒေ့ရှ်ကတော့ ၄ ရာခိုင်နှုန်းတက်ကာ ၁၈၈၈ ရှိလာမယ်လို့ IMF က ခန့်မှန်းပါတယ်။ ပြီးခဲ့တဲ့ ၅ နှစ်အရင်က IMF ရဲ့ အစီရင်ခံစာမှာ အိန္ဒိယက ဘင်္ဂလားဒေ့ရှ်ထက် တစ်ဦးချင်းဂျီဒီပီ ၄၀ ရာခိုင်နှုန်းလောက် မြင့်မားခဲ့တာပါ။

ဒီခန့်မှန်းချက်ကြောင့် အိန္ဒိယဟာ ပါကစ္စတန်နဲ့ နီပေါပြီးရင် အာရှမှာ တတိယအဆင်းရဲဆုံးတိုင်းပြည် ဖြစ်လာဖို့ ရှိနေပါတယ်။ ကိုဗစ်ကပ်ရောဂါကြောင့်လည်း အိန္ဒိယရဲ့ စီးပွားရေးဟာ အဆိုးဝါးဆုံးအနေအထားကို ရင်ဆိုင်ရမယ်လို့ IMF က ထည့်သွင်း သုံးသပ်ထားပါတယ်။

ပြီးခဲ့တဲ့ ၅ နှစ်အတွင်း ဘင်္ဂလားဒေ့ရှ်ရဲ့ တစ်ဦးချင်း ဂျီဒီပီဟာ ၉.၁ ရာခိုင်နှုန်း မြင့်တက်ခဲ့ပြီး ပို့ကုန်ကဏ္ဍ၊ ဘဏ်လုပ်ငန်းနဲ့ ရင်းနှီးမြှုပ်နှံမှုကဏ္ဍတွေမှာ သိသိသာသာ တိုးတက်လာတာကြောင့် ဖြစ်ပါတယ်။

ကိုဗစ်အလွန် လာမယ့်နှစ်မှာတော့ အိန္ဒိယရဲ့ စီးပွားရေးဟာ အခြားနိုင်ငံတွေထက် လျင်လျင်မြန်မြန်ပဲ ပုံမှန်အခြေအနေအတိုင်း ပြန်ရောက်လိမ့်မယ်လို့ WEO အစီရင်ခံစာမှာ IMF က ခန့်မှန်းထားပါတယ်။ ၂၀၂၁ ခုနှစ်မှာ အိန္ဒိယရဲ့ တစ်ဦးချင်းဂျီဒီပီဟာ ၈.၂ ရာခိုင်နှုန်းတက်ကာ ၂၀၃၀ ဒေါ်လာ ရှိလာမှာဖြစ်ပြီး ဘင်္ဂလားဒေ့ရှ်ကတော့ ၅.၄ ရာခိုင်နှုန်းတိုးကာ ၁၉၉၀ ရှိလာမယ်လို့လည်း IMF က ထည့်သွင်းသုံးသပ်ထားပါတယ်။

Ref: New Indian Express