ဘာသာရေးခေါင်းဆောင်များအား လှောင်ပြောင်မှုကို ပိတ်ပင်မည်မဟုတ်ဟု ပြင်သစ်ပြော

အောက်တိုဘာ ၂၂၊ ၂၀၂၀
M-Media

-ဘာသာရေးခေါင်းဆောင်တွေကို ရုပ်ပြောင်ရေးဆွဲမှုအပေါ် မိမိတို့တိုင်းပြည်က ပိတ်ပင်သွားမှာ မဟုတ်ဘူးလို့ ပြင်သစ်သမ္မတ အီမန်နျူယဲလ် မာခရွန်က ပြောကြားလိုက်ပါတယ်။

ပြီးခဲ့တဲ့တစ်ပတ်က အကြမ်းဖက်သတ်ဖြတ်ခံလိုက်ရတဲ့ ကျောင်းဆရာ ဆမ်မြူယဲလ် ပါတီရဲ့ မနေ့က ဈာပနအခမ်းအနားမှာ မာခရွန်က ဒီလိုပြောကြားလိုက်တာပါ။ ​ပါတီဟာ သင်ခန်းစာတစ်ခုမှာ တမန်တော်မိုဟာမက်ကို လှောင်ပြောင်တဲ့ကာတွန်း အသုံးပြုသင်ကြားခဲ့ပြီးတဲ့နောက် အခုလို အသတ်ခံလိုက်ရတာ ဖြစ်ပါတယ်။

“ရုပ်ပြောင်ကာတွန်း ရေးဆွဲမှုကို ကျွန်တော်တို့ စွန့်လွှတ်သွားမှာ မဟုတ်ပါဘူး” လို့ မာခရွန်က ဈာပနအခမ်းအနားမှာ ပြောကြားခဲ့ပါတယ်။

ပါတီဟာ ပြင်သစ်ရဲ့ ဘာသာရေးမစွက်တဲ့ နိုင်ငံရေးစနစ်၊ ဒီမိုကရေစီတန်ဖိုးတွေကို ကိုယ်စားပြုတဲ့အတွက်သူရဲဘောကြောင်သူတွေရဲ့ သတ်ဖြတ်မှုကို ခံခဲ့ရတာဖြစ်တယ်လို့လည်း မာခရွန်က ဆိုပါတယ်။

ကျောင်းဆရာပါတီကို အကြမ်းဖက်သတ်ဖြတ်ခဲ့သူဟာ အသက် ၁၈ နှစ်အရွယ် ရုရှားနွယ်ဖွားတစ်ဦးဖြစ်ပြီး ဆီးရီးယား အစ္စလာမ့်မစ်အစွန်းရောက်တွေရဲ့ လှုံ့ဆော်သွေးထိုးမှုကို ခံခဲ့ရတယ်လို့ စုံစမ်းစစ်ဆေးမှုနဲ့ နီးစပ်သူတွေက ပြောကြားခဲ့ပါတယ်။ သတ်ဖြတ်သူကို ရဲတပ်ဖွဲ့က အသေပစ်ခတ်ဖမ်းဆီးခဲ့ပါတယ်။

ဒီအကြမ်းဖက်သတ်ဖြတ်မှုနဲ့ပတ်သက်ပြီး လက်ရှိမှာ လူ ၇ ဦးကို ပြင်သစ်ရဲတပ်ဖွဲ့က ဖမ်းဆီးစစ်ဆေးနေပါတယ်။

Ref: France24