အမုန်းစကားပြဿနာကြောင့် Facebook အိန္ဒိယ၏ မူဝါဒဆိုင်ရာအကြီးအကဲ ရာထူးမှ နှုတ်ထွက်

အောက်တိုဘာ ၂၈၊ ၂၀၂၀
M-Media

-အာဏာရပါတီ တာဝန်ရှိသူတွေရဲ့ အမုန်းစကားရေးသားမှုကို Facebook ဖယ်ရှားခြင်းမရှိဘဲ တမင်လွှတ်ပေးထားတယ်လို့ သတင်းတွေထွက်လာပြီးနောက်ပိုင်း Facebook ရဲ့ အိန္ဒိယရုံးခွဲက မူဝါဒဆိုင်ရာအကြီးအကဲ အန်ခီဒက်စ်တစ်ယောက် ရာထူးကနေ နှုတ်ထွက်သွားခဲ့ပါတယ်။

ဟိန္ဒူအမျိုးသားရေးပါတီ BJP တာဝန်ရှိသူတွေဟာ Facebook စာမျက်နှာမှာ အစ္စလာမ်ဘာသာဝင်တွေအပေါ်တိုက်ခိုက်တဲ့ အမုန်းစကားရေးသားမှုတွေရှိခဲ့ပြီး အန်ခီဒက်စ်ကတော့ နိုင်ငံရေးဘက်လိုက်တဲ့စိတ်နဲ့ ဒါတွေကို မဖျက်ဖို့ ဆုံးဖြတ်ခဲ့တယ်လို့ Wall Street ဂျာနယ်က လွန်ခဲ့တဲ့ ၂ လမှာ ရေးသားဖော်ထုတ်ခဲ့ပါတယ်။

နောက်ဆက်တွဲအဖြစ် Facebook India ရဲ့ စီးပွားရေးဆိုင်ရာအကြီးအကဲ အဂျစ်မိုဟန်ဟာ အိန္ဒိယလွှတ်တော်ရဲ့ ခေါ်ယူ စစ်ဆေးမေးမြန်းခြင်းကို ခံခဲ့ရပါတယ်။

အန်ခီဒက်စ်ဟာ BJP တာဝန်ရှိသူတွေရဲ့ ပို့စ်အပြင် ပါတီထောက်ခံသူတွေက ရေးသားတဲ့ အမုန်းဝါဒဖြန့်ပို့စ်တွေကိုပါ မဖယ်ရှားဖို့ စီစဉ်ခဲ့တယ်လို့ ဆိုပါတယ်။ BJP ပါတီနဲ့ သမ္မတမိုဒီကိုထောက်ခံတဲ့ သူမဟာ ရုံးတွင်းစာပေးပို့မှုတွေမှာ အတိုက်အခံပါတီတွေကို နစ်နစ်နာနာ ပြောဆိုခဲ့ကြောင်းကိုလည်း Wall Street ဂျာနယ်က ဖော်ထုတ်ခဲ့ပါတယ်။

Facebook က သူတို့ဟာ ဘယ်နိုင်ငံရေးပါတီကိုမှ ပ,စားပေးတာမရှိဘူး ထုတ်ပြန်ခဲ့ပါတယ်။

စီးပွားရေးဆိုင်ရာအကြီးအကဲ မိုဟန်က အန်ခီဒက်စ်ဟာ အိန္ဒိယရုံးခွဲရဲ့ ပထမဆုံးဝန်ထမ်းတွေထဲက တစ်ဦးဖြစ်ပြီး ကုမ္ပဏီကို အကျိုးပြုခဲ့ကြောင်း၊ ပြည်သူ့ဝန်ထမ်းဘ၀ကို စိတ်ဝင်စားတဲ့အတွက်ကြောင့် အခုလို အလုပ်ထွက်သွားတာဖြစ်ကြောင်း ထုတ်ပြန်ခဲ့ပါတယ်။

အိန္ဒိယနိုင်ငံမှာ Facebook ဟာ လူကြိုက်များတဲ့ ဆိုရှယ်မီဒီယာတစ်ခုဖြစ်ပြီး သုံးစွဲသူ သန်း ၃၀၀ ကျော် ရှိပါတယ်။ Facebook က ပိုင်ဆိုင်တဲ့ WhatsApp စာတို​ဆော့ဖ်ဝဲကို သုံးစွဲသူက သန်း ၄၀၀ လောက် ရှိနေပါတယ်။

အိန္ဒိယပြည်သူတွေအပေါ် ဒီလိုလွှမ်းမိုးမှုမျိုး ရှိနေပေမယ့် Facebook ဟာ သတင်းမှားတွေ၊ လူ့အဖွဲ့အစည်းအတွင်း အဆိပ်အတောက်ဖြစ်စေတာတွေကို အချိန်မီ ဖယ်ရှားတာ မရှိဘူးလိုရင် စွပ်စွဲခံရလေ့ရှိပြီး ကုမ္ပဏီဖက်ကတော့ ဒါတွေကို ငြင်းဆိုပါတယ်။

Ref: BBC