ပြင်သစ်တွင် ဓားကိုင်အကြမ်းဖက်တိုက်ခိုက်မှု ထပ်ဖြစ်

အောက်တိုဘာ ၂၉၊ ၂၀၂၀
M-Media

-ပြင်သစ်နိုင်ငံ နိုက်စ်မြို့က ခရစ်ယာန်ဘုရားကျောင်းတစ်ခုနားမှာ ဓားနဲ့တိုက်ခိုက်မှုတစ်ခု ဒီကနေ့မနက်ပိုင်းက ဖြစ်ပွားခဲ့ပြီး အနည်းဆုံး လူ ၃ ဦး သေဆုံးကာ ပြင်သစ်အာဏာပိုင်တွေကတော့ အကြမ်းဖက်တိုက်ခိုက်မှုအဖြစ် သတ်မှတ်ထားပါတယ်။

နိုက်စ်မြို့တော်ဝင် ခရစ္စတီယန် အက်စ်ထရိုစီက တိုက်ခိုက်မှုဖြစ်ကြောင်းအတည်ပြုခဲ့ပြီး အမျိုးသမီးတစ်ဦး ခေါင်းဖြတ်ခံလိုက်ရတယ်လို့လည်း ပြောကြားခဲ့ပါတယ်။ တိုက်ခိုက်မှုနောက်ကွယ်က အကြောင်းအရင်းကို မသိရသေးဘူးလို့ ဆိုပါတယ်။ ပြင်သစ်မီဒီယာတွေကတော့ တိုက်ခိုက်သူဟာ ‘အလာဟုအက္ကဘာရ်’ အော်ဆိုခဲ့တယ်လို့ ဖော်ပြကြပါတယ်။

ကျူးလွန်သူကို ရဲတပ်ဖွဲ့က ပစ်ခတ်ဖမ်းဆီးခဲ့ပြီး ဒဏ်ရာရရှိခဲ့တာကြောင့် ဆေးရုံမှာ ဆေးကုသမှု ပေးထားပါတယ်။

စာသင်ချိန်မှာ တမန်တော်မိုဟာမက်ကို ရုပ်ပြောင်ကာတွန်းနဲ့ လှောင်ပြောင်ခဲ့တဲ့ ကျောင်းဆရာ ဆမ်မြူယဲလ်ပါတီ အခုအစောပိုင်းက ပဲရစ်မှာ အသတ်ခံခဲ့ရပါတယ်။ ပါတီရဲ့ ဈာပနအခမ်းအနားမှာ ပြင်သစ်သမ္မတ မာခရွန်က ဘာသာရေးခေါင်းဆောင်တွေအပေါ် ရုပ်ပြောင်ရေးဆွဲလှောင်ပြောင်မှုကို ပိတ်ပင်မှာမဟုတ်ဘဲ ဆက်လက်ခွင့်ပြုသွားမယ်လို့ ပြောကြားခဲ့ပြီး၊ ဒီမှတ်ချက်အတွက် ကမ္ဘာတစ်ဝှမ်းမှာရှိတဲ့ အစ္စလာမ်ဘာသာဝင်တွေက မာခရွန်ကို ဆန္ဒပြခဲ့ကြပါတယ်။

နိုက်စ်မြို့က တိုက်ခိုက်မှုအပြီး နာရီပိုင်းအတွင်းမှာပဲ ပြင်သစ်နိုင်ငံတောင်ပိုင်း အေဗီဂွန်မြို့မှာနားမှာ အမျိုးသားတစ်ဦးက​ ပစ္စတိုကိုင်ပြီး လမ်းသွားလမ်းလာတွေကို ပစ်မယ်လို့ ခြိမ်းခြောက်တာကြောင့် အသေပစ်ခတ်ဖမ်းဆီးခဲ့တယ်လို့ ရဲတပ်ဖွဲ့က ထုတ်ပြန်ပါတယ်။

ဝန်ကြီးချုပ် ဂျန်ကက်စ်တက်စ်က နိုင်ငံရဲ့ လုံခြုံရေးအခြေအနေကို အမြင့်ဆုံးတပ်လှန့်ထားပြီး အစိုးရကလည်း တိတိကျကျနဲ့ ပြင်းပြင်းထန်ထန် ကိုင်တွယ်​ဆောင်ရွက်သွားမယ်လို့ ပြောကြားခဲ့ပါတယ်။

ဆော်ဒီနိုင်ငံ ဂျစ်ဒါမြို့က ပြင်သစ်ကောက်စစ်ဝန်ရုံးမှာလည်း ဒီကနေ့မနက်ပိုင်းက ဓားနဲ့တိုက်ခိုက်မှုတစ်ခု ဖြစ်ပွားခဲ့ပြီး လုံခြုံရေးအစောင့်တစ်ဦး ဒဏ်ရာရခဲ့ပါတယ်။

Ref: Reuters