ဒိန်းမတ် လက်ယာစွန်းရောက်ပါတီက တမန်တော်မိုဟာမက်ကို လှောင်ပြောင်ရေးကမ်းပိန်း စတင်

အောက်တိုဘာ ၃၁၊ ၂၀၂၀
M-Media

-ပြင်သစ်သရော်စာမဂ္ဂဇင်း Charlie Hebdo က ထုတ်ဝေခဲ့တဲ့ တမန်တော်မိုဟာမက်ကို လှောင်ပြောင်တဲ့ကာတွန်းတွေ မီဒီယာမှာ ပြန်လည်ပုံနှိပ်ဖော်ပြရေး ကမ်ပိန်းတစ်ခုကို ဒိန်းမတ် လက်ယာစွန်းရောက်ပါတီ Nye Borgerlige က မနေ့မှာ စတင်လိုက်ပါတယ်။

ဒီကာတွန်းကို စာသင်ချိန်မှာ အသုံးပြုခဲ့တဲ့ ပြင်သစ်ကျောင်းဆရာတစ်ဦး အခုလအစောပိုင်းက အကြမ်းဖက်သတ်ဖြတ်ခံလိုက်ရပြီး နောက်ဆက်တွဲ တင်းမာမှုတွေ ဖြစ်လာချိန်မှာ ဒီလှုပ်ရှားမှု ပေါ်ထွက်လာတာ ဖြစ်ပါတယ်။

ကျောင်းဆရာ ဆမ်မြူယဲလ် ပါတီဟာ ကျောင်းကနေ အိမ်ကိုအပြန်မှာ သတ်ဖြတ်ခံခဲ့ရတာပါ။ဘာသာရေးခေါင်းဆောင်တွေအပေါ် ရုပ်ပြောင်ရေးဆွဲ လှောင်ပြောင်မှုကို ဆက်လက်ခွင့်ပြုသွားမယ်လို့ ပြင်သစ်သမ္မတ မာခရွန်က ပြောကြားခဲ့ပြီးတဲ့နောက် မွတ်စလင်ကမ္ဘာနဲ့ ပြင်သစ်တို့အကြား ထိပ်တိုက်တွေ့မှုတွေလည်း မြင့်တက်လာပါတယ်။

Nye Borgerlige ပါတီဟာ ဒိန်းမတ်လွှတ်တော်မှာ အမတ်နေရာ ၁၇၉ နေရာ ရရှိထားပါတယ်။ တမန်တော်မိုဟာမက်ကို​ လှောင်ပြောင်တဲ့ ကာတွန်းတွေ ဖော်ပြရေး လှုပ်ရှားမှုဟာ ပြင်သစ်ကျောင်းဆရာရဲ့ မိသားစုတွေကို စာနာကြောင်းနဲ့ လွတ်လပ်စွာထုတ်ဖော်ပြောဆိုခွင့်ကို အားပေးကြောင်း ပြသဖို့ ဖြစ်တယ်လို့ ပါတီခေါင်းဆောင် ပါနီလီ ဗာမွန်းက ပြောကြားခဲ့ပါတယ်။

Charlie Hebdo ထုတ် တမန်တော်ရုပ်ပြောင်ကာတွန်းတွေကို မီဒီယာမှာ ​ကြော်ငြာထည့်သွင်းရေး ရန်ပုံငွေတစ်ရပ်ကိုလည်း Nye Borgerlige ပါတီရဲ့ ဝဘ်ဆိုက်မှာ ထူထောင်ထားပါတယ်။

ဒိန်းမတ်မီဒီယာအသိုင်းအဝိုင်းမှာတော့ ဒီကမ်ပိန်းအပေါ် တုန့်ပြန်မှု အမျိုးအမျိုး ရှိနေပါတယ်။

Extrabladet စာစောင်ရဲ့အယ်ဒီတာ ပေါလ်မဒ်ဆန်က ဒီလိုကြော်ငြာမျိုး လာအပ်မှသာလျှင် ထည့်သင့်မထည့်သင့် စဉ်းစားသွားမယ်လို့ ပြောကြားခဲ့ပါတယ်။

“အကြမ်းဖက်ဝါကို ကျွန်တော်တို့ ရှုတ်ချပြီး ပြင်သစ်နိုင်ငံကိုလည်း အားပေးထောက်ခံပါတယ်။ ဒါပေမယ့် ကျွန်တော်တို့ရဲ့ ဝန်ထမ်းတွေ၊ ထိခိုက်ခံစားလွယ်သူတွေနဲ့ ပတ်သက်လာရင်တော့ အမြဲတမ်း အသေအချာ စဉ်းစားသွားမှာပါ”

Nye Borgerlige ပါတီခေါင်းဆောင် ဗာမွန်းက ဒီကာတွန်းတွေဖော်ပြရေး အမှန်တကယ် ဖြစ်လာမလားဆိုတာ မသေချာပေမယ့် လူ့အဖွဲ့အစည်းအတွင်းမှာ လွတ်လပ်စွာဖော်ပြမှု ပိုမိုအားကောင်းလာရေး ဆောင်ရွက်ဖို့ဟာ နိုင်ငံရေးသမားတစ်ယောက်ရဲ့တာဝန် ဖြစ်တယ်လို့ ထည့်သွင်းပြောကြားခဲ့ပါတယ်။

၂၀၀၅ ခုနှစ်တုန်းက ဒိန်းမတ်နေ့စဉ်သတင်းစာ Jyllands-Posten မှာ တမန်တော်မိုဟာမက် ရုပ်ပြောင်ကာတွန်းတစ်ခု ပုံနှိပ်ဖော်ပြခဲ့ပြီး နောက်ဆက်တွဲအဖြစ် အစ္စလာမ်ကမ္ဘာမှာ အကြီးအကျယ် ဆန့်ကျင်ဆန္ဒပြမှုတွေ ဖြစ်ခဲ့ပါတယ်။

ဒီကာတွန်းကိုပဲ ၂၀၀၆ ခုနှစ်မှာ Charlie Hebdo မဂ္ဂဇင်းက ဖော်ပြခဲ့ပြီး ၂၀၁၅ ခုနှစ်မှာတော့ ဂျာနယ်တိုက် တိုက်ခိုက်ခံရကာ ဂျာနယ်လစ်တွေ၊ ကာတွန်းဆရာတွေအပါအအဝင် လူ ၁၂ ဦး သေဆုံးခဲ့ပါတယ်။

Ref: Alarabiya