နောက်ဆုံးတွင် မိမိသာ သမ္မတဖြစ်မည်ဟု ဂျိုးဘိုင်ဒန်ပြော

နိုဝင်ဘာ ၇၊ ၂၀၂၀
M-Media

-မဲရေတွက်နေစဉ်အတွင်း တည်တည်ငြိမ်ငြိမ်ရှိကြဖို့ ဒီမိုကရက်တစ်ပါတီရဲ့ သမ္မတလောင်း ဂျိုးဘိုင်ဒန်က ထောက်ခံသူတွေကို တိုက်တွန်းလိုက်ပြီး နောက်ဆုံးမှာ မိမိသာလျှင် အနိုင်ရလိမ့်မယ်လို့ ပြောကြားခဲ့ပါတယ်။

အမေရိကန်ရဲ့ သမ္မတရွေးကောက်ပွဲကို နိုဝင်ဘာ ၃ ရက်နေ့မှာ ပြုလုပ်ခဲ့တာဖြစ်ပြီး ၇ ရက်နေ့အထိ မဲရေတွက်မှု မပြီးသေးပါဘူး။ ထောက်ခံမဲ ၂၇၀ ရတဲ့သူက သမ္မတဖြစ်လာမှာ ဖြစ်ပါတယ်။ ဒီမိုကရက်တစ်သမ္မတလောင်း ဂျိုးဘိုင်ဒန်က လက်ရှိမှာ ၂၆၄ မဲ ရထားပြီး လက်ရှိသမ္မတ ဒေါ်နယ်ထရမ့်က ၂၁၄ မဲ ရထားပါတယ်။

“တစ်နိုင်ငံလုံးက အရေအတွက်ကို ကြည့်မယ်ဆိုရင် ဒီရွေးကောက်ပွဲမှာ ကျွန်တော်တို့ မဲအသာနဲ့ ပြတ်ပြတ်သားသား အနိုင်ရတော့မှာပါ။ တစ်နိုင်ငံလုံးက ကျွန်တော်တို့နောက်မှာရှိနေတယ်။ ထောက်ခံမဲ ၇၄ သန်း ကျော်လည်း ရထားပါတယ်” လို့ မနေ့က မိန့်ခွန်းမှာ ဘိုင်ဒန်က ပြောကြားခဲ့ပါတယ်။

အရီဇိုးနားနဲ့ ဂျော်ဂျီယာပြည်နယ်တွေမှာ နှစ်ပေါင်း ၂၀ ကျော်အတွင်း ပထမဆုံးအကြိမ် ဒီမိုကရက်တစ်ပါတီက သမ္မတလောင်း အနိုင်ရတာကိုလည်း ဘိုင်ဒန်က ထောက်ပြခဲ့ပါတယ်။ မိမိတို့အစိုးရဖွဲ့တဲ့အခါ ကိုဗစ်ကပ်ရောဂါကို ကိုင်တွယ်ဖို့နဲ့ စီးပွားရေးကို ပြန်ထိန်းဖို့အတွက် ဒုတိယသမ္မတလောင်းအဖြစ် ဝင်ရောက်အရွေးခံထားတဲ့ ကာရ်မာလာ ဟာရစ်က ဆေးဘက်ဆိုင်ရာ ကျွမ်းကျင်သူတွေ၊ စီးပွားရေးကျွမ်းကျင်သူတွေနဲ့ ဆွေးနွေးမှုတွေ လုပ်ဆောင်နေတယ်လို့လည်း သူက ဆိုပါတယ်။

ထရမ့်ကတော့ ရွေးကောက်ပွဲမှာ မသမာမှုတွေရှိတယ်လို့ တစ်စိုက်မတ်မတ် စွပ်စွဲထားပြီး တရားရုံးကို တိုင်ကြားမှုတွေ ပြုလုပ်ထားပါတယ်။ ဘိုင်ဒန်အနေနဲ့ ရွေးကောက်ပွဲ အနိုင်ရပြီလို့ ကြွေးကျော်တာမျိုး မလုပ်ဖို့လည်း မနေ့က Twitter မှာ ရေးသားခဲ့ပါတယ်။

ဒီတိုင်ကြားမှုတွေက ရွေးကောက်ပွဲရလဒ်ကို ပြောင်းလဲနိုင်မှာ မဟုတ်ဘူးလို့ နိုင်ငံရေးကျွမ်းကျင်သူတွေက သုံးသပ်နေကြပြီး ပြည်နယ်တစ်ချို့မှာလည်း ထရမ့်ရဲ့ တိုင်ကြားမှုတွေကို တရားရုံးက ပယ်ချခဲ့ပါတယ်။

Ref: Aljazeera