၉၀ ရာခိုင်နှုန်းကျော်ထိရောက်သည့် ကိုဗစ်ကာကွယ်ဆေး လာပြီ

နိုဝင်ဘာ ၁၁၊ ၂၀၂၀
M-Media

-မိမိတို့ထုတ်လုပ်တဲ့ ကိုဗစ်ကာကွယ်ဆေးဟာ ကနဦးစမ်းသပ်မှုအရ ၉၀ ရာခိုင်နှုန်းကျော် ​ထိရောက်တာကို တွေ့ရတယ်လို့ အမေရိကန် ဆေးဝါးထုတ်လုပ်ရေးကုမ္ပဏီ Pfizer Inc က ပြော​ကြားလိုက်ပါတယ်။

Pfizer နဲ့ ဂျာမနီက မိတ်ဖက်ကုမ္ပဏီ BioNtech SE တို့ဟာ နိုင်ငံပေါင်း ၆ နိုင်ငံမှာ လူပေါင်း ၄၄၀၀ လောက်ကို စမ်းသပ်ခဲ့တာ ဖြစ်ပါတယ်။ စမ်းသပ်မှုအတွင်း ဘေးအန္တရာယ်ကင်းရေးနဲ့ပတ်သက်တဲ့ စိုးရိမ်စရာအချက် တစ်ခုမှ မတွေ့ခဲ့ရဘဲ အခုလကုန်ပိုင်းမှာ တရားဝင် ထုတ်လုပ်ဖြန့်ဖြူးခွင့်ရမယ်လို့ မျှော်လင့်ထားကြောင်း ကုမ္ပဏီက ပြောကြားခဲ့ပါတယ်။

“ဒီနေ့ဟာ သိပ္ပံနယ်ပယ်နဲ့ လူသားထုအတွက် ကြီးကျယ်တဲ့ နေ့တစ်ခုပါ။ ကူးစက်မှု စံချိန်တင်မြင့်တက်ပြီး၊ ဆေးရုံတွေ ကုတင်မလောက်ဖြစ်ကာ၊ စီးပွားရေးပြန်လည်ဦးမော့ဖို့ ရုန်းကန်နေရတဲ့ ဒီလိုအချိန်မျိုးမှာ ကာကွယ်ဆေးထုတ်လုပ်ရေးနယ်ပယ်ရဲ့ အရေးပါတဲ့ သမိုင်းမှတ်တိုင်တစ်ခုလည်း ဖြစ်ပါတယ်” လို့ Pfizer ကုမ္ပဏီနဲ့ ဥက္ကဌဖြစ်သူ အဲလ်ဘတ် ဘူလာက ပြောကြားခဲ့ပါတယ်။

အသက် ၁၆ နှစ်ကနေ ၈၅ နှစ်အရွယ်တွေအတွက် အရေးပေါ်အသုံးပြုခွင့်ရဖို့ ကြိုးပမ်းသွားမယ်လို့လည်း သူက ထည့်သွင်းပြောကြားခဲ့ပါတယ်။

အမေရိကန်အစိုးရဟာ ကာကွယ်ဆေးအလုံးရေ သန်း ၁၀၀ ရရှိနိုင်ဖို့အတွက် Pfizer and BioNTech ကုမ္ပဏီနဲ့ အခုနှစ်အစောပိုင်းမှာ စာချုပ် ချုပ်ဆိုထားသလို၊ ဥရောပသမဂ္ဂ၊ ယူကေ၊ ကနေဒါနဲ့ ဂျပန်တို့ကလည်း ဆေးဝယ်ဖို့ စာချုပ်တွေ ချုပ်ဆိုထားပါတယ်။

အခုနှစ်မကုန်ခင် လူသန်း ၂၅ သန်း၊ လာမယ့်နှစ်အတွင်း ၁.၃ ဘီလီယံ ထုတ်လုပ်ဖို့ ကုမ္ပဏီက စီစထားပါတယ်။

Ref: The Star