အလ်ကိုင်းဒါးဒုတိယခေါင်းဆောင်ကို အီရန်တွင် အစ္စရေးက လုပ်ကြံဟု နယူးယောက်တိုင်းမ်စ်ဖော်ပြ

နိုဝင်ဘာ ၁၄၊ ၂၀၂၀
M-Media

-အလ်ကိုင်းဒါးအဖွဲ့ရဲ့ ဒုတိယခေါင်းဆောင် အလ်ဒူလာ အဟ်မဒ် အဘ်ဒူလာ ဩဂုတ်လက အီရန်မြို့တော် တီဟီရန်မှာ သတ်ဖြတ်ခံရမှုဟာ အစ္စရေးထောက်လှမ်းရေးတွေရဲ့ လက်ချက်ဖြစ်တယ်လို့ နယူးယောက်တိုင်းမ်စ်သတင်းစာက မနေ့မှာ ဖော်ပြပါတယ်။

အဟ်မဒ် အဘ်ဒူလာဟာ အဘူ မိုဟာမက် အလ်-မက်စ်ရီအဖြစ် လူသိများပြီး လက်ရှိခေါင်းဆောင် အေမန် အလ် ဇာဝါဟီရီကို ဆက်ခံမယ့်သူအဖြစ် မှတ်ယူခံရသူဖြစ်ပါတယ်။ ဩဂုတ်လ ၇ ရက်​နေ့ တီဟီရန်မြို့က လမ်းမတစ်ခုမှာ သေနတ်သမား ၂ ဦးက အလ်မဒ် အဘ်ဒူလာကို ဆိုင်ကယ်ပေါ်ကနေ ပစ်ခတ်သတ်ဖြတ်ခဲ့တာ ဖြစ်ပါတယ်။

၁၉၉၈ ခုနှစ် အာဖရိကမှာရှိတဲ့ အမေရိကန်သံရုံး ၂ ခု ဗုံးခွဲတိုက်ခိုက်ခံရမှုမှာ စီစဉ်သူတွေကို အလ်မဒ် အဘ်ဒူလာက ကူညီပေးခဲ့တယ်လို့ သတင်းတွေ ထွက်ထားတာပါ။ အခုသတ်ဖြတ်မှုကို အမေရိကန်ရဲ့ ခိုင်းစေမှုကြောင့် အစ္စရေးက လုပ်ပေးတာလို့ ထောက်လှမ်းရေး သတင်းရင်းမြစ်တွေကို ကိုးကားပြီး နယူးယောက်တိုင်းမ်စ် သတင်းဌာနက ဖော်ပြပါတယ်။

အမေရိကန်ဟာ အဟ်မဒ်အဘ်ဒူလာနဲ့ အီရန်မှာရှိနေတဲ့ အခြား အလ်ကိုင်းဒါး တာဝန်ရှိသူတွေကို နှစ်နဲ့ချီ ခြေရာခံနေပြီး အခုကိစ္စမှာ အမေရိကန်ကိုယ်တိုင် ပါဝင်ခဲ့ခြင်း ရှိ၊ မရှိကို ရှင်းရှင်းလင်းလင်း မသိရသေးဘူးလို့လည်း ဆိုပါတယ်။

အလ်ကိုင်းဒါးအဖွဲ့ကတော့ အဟ်မဒ်အဘ်ဒူလာ သေဆုံးမှုကို ထုတ်ပြန်ကြေ​ငြာခြင်း မပြုသေးပါဘူး။

နယူးယောက်တိုင်းမ်စ်သတင်းဌာနရဲ့ ဒီဖော်ပြချက်ကို အီရန်က ငြင်းဆိုခဲ့ပြီး မိမိတို့ရဲ့မြေမှာ အလ်ကိုင်းဒါး အကြမ်းဖက်သမားတွေကို လက်ခံမထားဘူးလို့ တုန့်ပြန်ပြောကြားခဲ့ပါတယ်။

အီရန်နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ စအီးဒ် ခါသစ်ဘ်ဇာဒါဟ်က အမေရိကန်နဲ့ အစ္စရေးတို့ဟာ ဒေသတွင်းမှာရှိတဲ့ အလ်ကိုင်းဒါးနဲ့ အခြား အကြမ်းဖက်အဖွဲ့တွေရဲ့ လုပ်ရပ်တွေအတွက် သူတို့မှာ တာဝန်ရှိမှုကို ရှောင်လွှဲဖို့ မီဒီယာတွေကို သတင်းအမှားပေးကာ အီရန်နဲ့ ဒီအဖွဲ့တွေ ချိတ်ဆက်သယောင်ယောင် ဖန်တီးနေကြတယ်လို့ ပြောကြားခဲ့ပါတယ်။

Ref: Reuters