မလေးရှားရှိ နိုင်ငံခြားသားအလုပ်သမားအားလုံး ကိုဗစ်စစ်ရမည်

နိုဝင်ဘာ ၂၆၊ ၂၀၂၀
M-Media

-နိုင်ငံခြားသားအလုပ်သမားတွေမှာ ကိုဗစ်တွေ့ရှိမှု များလာတာကြောင့် နိုင်ငံအတွင်းမှာရှိနေတဲ့ နိုင်ငံခြားအလုပ်သမား ၁.၇ သန်းစလုံး ကိုဗစ်စစ်ရမယ်လို့ မလေးရှားအစိုးရက ထုတ်ပြန်ကြေငြာလိုက်ပါတယ်။

ဒီအမိန့်ဟာ နိုဝင်ဘာ ၂၆ ရက် (ဒီကနေ့) မှာ စတင်သက်ရောက်မှာပါ။ ပထမအသုတ်အဖြစ် ကွာလာလမ်ပူ၊ ဆီလန်ဂေါ၊ ပီနန်နဲ့ နီဂရီ ဆမ်ဘီလန်ဒေသက နိုင်ငံခြားအလုပ်သမား ၉ သိန်းကို စပြီး ကိုဗစ်စစ်မှာ ဖြစ်ပါတယ်။

လုပ်ငန်းရှင်တွေက နိုင်ငံခြားအလုပ်သမားတွေအတွက် နေထိုင်စရာ စီစဉ်ပေးထားတဲ့ နေရာတွေကို အာဏာပိုင်တွေက ဝင်ရောက်စစ်ဆေးဖို့ရှိနေပြီး ကိုဗစ်စည်းမျဉ်းစည်းကမ်းနဲ့မညီရင် ရင်းဂစ် ၅ သောင်းအထိ ဒဏ်ရိုက်မယ်လို့ မလေးရှား လုံခြုံရေးဆိုင်ရာဝန်ကြီး အစ္စမာအီလ် ဆာဘရီ ယာကွဘ်က မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

ဒီစစ်ဆေးမှုကို ​ကိုဗစ်ကြောင့် အသွားအလာကန့်သတ်မှု (CMCO) အမိန့်ထုတ်ပြန်ထားတဲ့ ဒေသတွေမှာ ပြုလုပ်မှာပါ။

“နိုင်ငံခြားသားအလုပ်သမားအားလုံးကို တို့ဖတ်နမူနာယူ စစ်ဆေးမယ်။ တကယ်လို့ နက်ဂတစ်ဖြစ်ရင် ကွာရန်တင်းဝင်ခိုင်းမယ်။ ပေါ့စတစ်ဖြစ်ရင်တော့ ဆေးရုံပို့ပါမယ်” လို့ ဆာဘရီ ယာကွဘ်က ပြောပါတယ်။

လိုအပ်လာရင် နိုင်ငံခြားအလုပ်သမားတွေကို ၂ ပတ်တစ်ကြိမ် ပုံမှန်စစ်ဆေးတာမျိုးအထိ လုပ်ဆောင်ဖို့လည်း မလေးရှားအစိုးရက စီစဉ်ထားပါတယ်။

Ref: The Star