မွတ်စလင်နိုင်ငံအများစုအပါအဝင် ၁၃ နိုင်ငံကို ယူအေအီးက ဗီဇာထုတ်ပေးမှု ရပ်ဆိုင်း

နိုဝင်ဘာ ၂၆၊ ၂၀၂၀
M-Media

-အာရပ်စော်ဘွားများပြည်ထောင်စု (ယူအေအီး) နိုင်ငံဟာ နိုင်ငံ ၁၃ နိုင်ငံက နိုင်ငံသားတွေကို ဗီဇာထုတ်ပေးမှု ရပ်ဆိုင်းလိုက်ပြီး ဒီစာရင်းထဲမှာပါဝင်တဲ့ နိုင်ငံအများစုဟာ မွတ်စလင်နိုင်ငံတွေ ဖြစ်ပါတယ်။

နိုင်ငံပိုင် စက်မှုဇုန်က ကုမ္ပဏီတွေကို ပေးပို့တဲ့ အသိပေးစာမှာ ဒီကိစ္စကို ဖော်ပြထားတာပါ။ ဒီကိစ္စနဲ့ပတ်သက်နေတဲ့ ယူအေအီးအစိုးရ တာဝန်ရှိသူအချို့က လုံခြုံရေးဆိုင်ရာ အကြောင်းအရင်းတွေကြောင့် ဗီဇာထုတ်ပေးမှု ယာယီရပ်ဆိုင်းတာဖြစ်တယ်လို့ Reuters သတင်းဌာနကို ဖြောကြားခဲ့ပါတယ်။ ဒါပေမယ့် အသေးစိတ်ကို ပြောကြားခြင်း မရှိပါဘူး။

ယူအေအီးက ဗီဇာထုတ်ပေးမှု ရပ်ဆိုင်းလိုက်တဲ့ နိုင်ငံတွေဟာ အာဖဂန်၊ အလ်ဂျီးရီးယား၊ အီဂျစ်၊ အီရတ်၊ ကင်ညာ၊ လက်ဘနွန်၊ လစ်ဗျား၊ ပါကစ္စတန်၊ ဆိုမာလီယာ၊ ဆီးရီးယား၊ တူနီးရှား၊ တူရကီနဲ့ ယီမင်တို့ ဖြစ်ပါတယ်။

ဒီအမိန့်ဟာ နိုဝင်ဘာ ၁၈ ရက်နေ့က စတင်သက်ရောက်တာပါ။ ဗီဇာပိတ်ပင်မှုမှာ အခြားခြွင်းချက်တွေ ရှိလားဆိုတာလည်း မသိရသေးပါဘူး။

ဆော်ဒီအာရေဗျနိုင်ငံမှာ IS အကြမ်းဖက်အဖွဲ့က သံတမန်တွေကို ပစ်မှတ်ထား ဗုံးခွဲတိုက်ခိုက်တာကြောင့် ယူအေအီးနိုင်ငံမှာရှိတဲ့ မိမိတို့နိုင်ငံသားတွေ သတိဝိရိယရှိကြဖို့ ပြင်သစ်သံရုံးက သတိပေးချက်ထုတ်ပြန်ပြီး တစ်ပတ်အကြာမှာ ယူအေအီးရဲ့ အခုဆုံးဖြတ်ချက် ပေါ်ပေါက်လာတာ ဖြစ်ပါတယ်။

ဒီကိစ္စနဲ့ နီးစပ်သူတစ်ချို့က အခုလို လုပ်ဆောင်တာဟာ အစ္စရေးနဲ့ ဆက်ဆံရေးပြန်လည်တည်ဆောက်မှုနဲ့ မပတ်သက်ဘူးလို့ ပြောပါတယ်။ ယူအေအီးနဲ့ အစ္စရေးတို့ဟာ လွန်ခဲ့တဲ့ ၂ လအရင်ကမှ သံတမန်ဆက်ဆံရေး ပြန်လည်ထူဖောင်ခဲ့တာပါ။

တူရကီလို ယူအေအီးနဲ့ ဆက်ဆံရေးတင်းမာတဲ့ နိုင်ငံလည်း ဗီဇာပိတ်ခံရတဲ့ စာရင်းမှာ ပါဝင်လာပါတယ်။ ယူအေအီးက မိမိတို့နိုင်ငံသားတွေကို ဗီဇာထုတ်ပေးမှု ရပ်ဆိုင်းလိုက်ကြောင်း ပါကစ္စတန်နိုင်ငံခြားရေးဝန်ကြီးဌာနက ပြီးခဲ့တဲ့တစ်ပတ်မှာ ထုတ်ပြန်ခဲ့ပါတယ်။

Ref: Reuters