လာမယ့်နှစ်အစပိုင်းတွင် မလေးရှားလူဦးရေ ၃၀ ရာခိုင်နှုန်းကို ကိုဗစ်ကာကွယ်ဆေး ထိုးပေးမည်

နိုဝင်ဘာ ၂၈၊ ၂၀၂၀
M-Media

-လာမယ့်နှစ်မှာ နိုင်ငံအတွင်းက လူ ၉.၆ သန်းလောက်ကို ကိုဗစ်ကာကွယ်ဆေး ထိုးပေးနိုင်လိမ့်မယ်လို့ မလေးရှားဝန်ကြီးချုပ် မုဟ်ယစ်ဒင် ယာစင်က ဒီကနေ့မှာ ပြောကြားလိုက်ပါတယ်။

ဒါဟာ မလေးရှားလူဦးရေရဲ့ ၃၀ ရာခိုင်နှုန်း ဖြစ်ပါတယ်။ ဝန်ကြီးချုပ်က ကိုဗစ်ကာကွယ်ရေး ရရှိဖို့အတွက် အစိုးရဟာ သဘောတူညီချက် ၂ ခုကို လက်မှတ်ရေးထိုးထားတယ်လို့ သူဦးဆောင်တဲ့ Bersatu ပါတီရဲ့ နှစ်ပတ်လည်မိန့်ခွန်းမှာ ထည့်သွင်းပြောဆိုပါတယ်။

အမေရိကန် ဆေးဝါးကုမ္ပဏီ Pfizer၊ WHO က ဦးဆောင်ပြီး ကမ္ဘာတစ်ဝှမ်း ကာကွယ်ဆေးဖြန့်မယ့် COVAX အစီအစဉ် စတာတွေကနေ လာမယ့်နှစ် ပထမ ၃ လပတ်အတွင်း ကာကွယ်ဆေးရဖို့အတွက် မလေးရှားက သဘောတူညီချက် ရထားတာဖြစ်ပါတယ်။

ဝန်ကြီးချုပ် မုဟ်ယစ်ဒင်က လက်ရှိ ဆောင်ရွက်နေတဲ့ ကာကွယ်ရေး အစီအမံတွေ၊ မကြာခင်ရမယ့် ကာကွယ်ဆေး ပေါင်းရင် ကိုဗစ်ကပ်ရောဂါကို ထိန်းချုပ်နိုင်မှာဖြစ်ကြောင်း၊ ကိုဗစ်အလွန် စီးပွားရေး ပြန်လည်ဦးမော့ရေး၊ ကာကွယ်ဆေး တန်းတူရရှိရေးအတွက် ဒေသတွင်းနိုင်ငံတွေ ပူးပေါင်းဆောင်ရွက်ဖို့ လိုအပ်ကြောင်း ထည့်သွင်းပြောဆိုခဲ့ပါတယ်။

ကာကွယ်ဆေးရတဲ့အခါ နိုင်ငံသားတွေကို အခမဲ့ထိုးပေးမှာဖြစ်ပြီး ကိုဗစ်တိုက်ဖျက်ရေး ရှေ့တန်းကနေ ဆောင်ရွက်သူတွေ၊ သက်ကြီးရွယ်အိုတွေနဲ့ ရောဂါအခံရှိသူတွေကို ဦးစားပေးသွားမယ်လို့လည်း ဝန်ကြီးချုပ်က ဆိုပါတယ်။

မလေးရှားဟာ အခုနှစ်အလယ်ပိုင်းမှာ ကိုဗစ်ကူးစက်မှုကို သိသိသာသာ ထိန်းချုပ်နိုင်ခဲ့ပေမယ့် စက်တင်ဘာလမှာတော့ ၄ ဆအထိ ပြန်လည်မြင့်တက်လာခဲ့ပါတယ်။

Ref: CNA