သမ္မတရွေးကောက်ပွဲတွင် ရလဒ်ပြောင်းလောက်သည့် မဲမသမာမှုမျိုး မတွေ့ဟု ကန်ရှေ့နေချုပ် ထုတ်ပြန်

ဒီဇင်ဘာ ၂၊ ၂၀၂၀
M-Media

-၂၀၂၀ သမ္မတရွေးကောက်ပွဲမှာ ရလဒ်ပြောင်းလဲသွားစေမယ့် မဲမသမာမှုမျိုး မတွေ့ရဘူးလို့ အမေရိကန် ပြည်ထောင်စု ရှေ့နေချုပ် ဝီလီယံ ဘားရ်က မနေ့မှာ ပြောကြားလိုက်ပါတယ်။

နိုင်ဝင်ဘာ ၃ ရက်နေ့မှာ ပြုလုပ်ခဲ့တဲ့ သမ္မတရွေးကောက်ပွဲမှာ ဒီမိုကရက်တစ် သမ္မတလောင်း ဂျိုးဘိုင်ဒန်က အနိုင်ရခဲ့ပေမယ့် လက်ရှိသမ္မတ ဒေါ်နယ်ထရမ့်က မဲမသမာမှုတွေ ရှိတယ်လို့ဆိုကာ အရှုံးကို လက်မခံပါဘူး။ ထရမ့်ရဲ့ ရွေးကောက်ပွဲအောင်နိုင်ရေးအဖွဲ့ဟာ ပြည်နယ်တစ်ချို့မှာ ဒီကိစ္စအတွက် တရားရုံးကို တိုင်ကြားခဲ့ပေမယ့် သက်သေ ခိုင်ခိုင်လုံလုံ မပြနိုင်တာကြောင့် ပယ်ချခံခဲ့ရပါတယ်။

မနေ့က AP သတင်းဌာနနဲ့ အင်တာဗျူးမှာ မဲမသမာမှုရှိတယ်ဆိုတဲ့ သတင်းတွေ၊ တိုင်ကြားမှုတွေကို ရှေ့နေချုပ်ရုံးနဲ့ FBI က တာဝန်ရှိသူတွေ စုံစမ်းစစ်ဆေးခဲ့ကြပြီး ရွေးကောက်ပွဲရလဒ်ကို ပြောင်းလဲနိုင်မယ့် မသမာမှု အထောက်အထားတွေ မတွေ့ခဲ့ဘူးလို့ ရှေ့နေချုပ် ဝီလီယံ ဘားရ်က ပြောကြားခဲ့ပါတယ်။

ဘားရ်ဟာ သမ္မထရမ့်ရဲ့ အမာခံ မဟာမိတ်တစ်ဦး ဖြစ်ပါတယ်။ ကိုဗစ်ကပ်ရောဂါ ဖြစ်ပွားနေတာကြောင့် အမေရိကန်ပြည်သူတွေဟာ မဲရုံတွေကို မသွားဘဲ စာတိုက်ကနေ မဲပေးမယ့် အနေအထားတွေ ရှိနေတာကြောင့် စာတိုက်ကပေးတဲ့ မဲတွေဟာ မသမာမှုတွေ ဖြစ်နိုင်တယ်လို့ ရွေးကောက်ပွဲမတိုင်ခင် ဝီလီယံ ဘားရ်က ပြောကြားခဲ့ဖူးပါတယ်။

ဒါ့အပြင် ရွေးကောက်ပွဲမှာ မသမာမှုတွေ ရှိတယ်တယ်ဆိုတဲ့ စွပ်စွဲချက်တွေပေါ်လာရင် စုံစမ်းစစ်ဆေးဖို့လည်း နိုင်ငံတစ်ဝှမ်း ပြည်နယ်တွေက ရှေ့နေချုပ်တွေကို ပြီးခဲ့တဲ့လမှာ ညွှန်ကြားချက် ထုတ်ပြန်ခဲ့ပါတယ်။

ဝီလီယံဘားရ်က ရွေးကောက်ပွဲမှာ မဲမသမာမှုတွေ မရှိဘူးလို့ အခုလို တရားဝင်ထုတ်ပြောတကြောင့် ထရမ့်ရဲ့ စွပ်စွဲချက်တွေဟာ အရာမထင်တော့ဘဲ ရွေးကောက်ခံသမ္မတ ဂျိုးဘိုင်ဒန်ကို အာဏာလွှဲပြောင်းပေးရတော့မှာ ဖြစ်ပါတယ်။

Ref: Aljazeera