အစ္စရေးမှ အာရပ်မုန်းတီးရေး ဘောလုံးအသင်းကို ယူအေအီးက ဝယ်မည်

ဒီဇင်ဘာ ၄၊ ၂၀၂၀
M-Media

-အာရပ်လူမျိုးတွေအပေါ် လူမျိုးရေး စော်ကားတိုက်ခိုက်တဲ့ ပရိတ်သတ်တွေကြောင့် နာမည်ဆိုးနဲပကျော်ကြားတဲ့ အစ္စရေးဘောလုံးအသင်း Beitar Jerusalem ကို အာရပ်စော်ဘွားများပြည်ထောင်စု (ယူအေအီး) က ဝယ်ယူဖို့ ပြင်ဆင်နေတယ်လို့ သတင်းထွက်လာပါတယ်။

အသင်းပိုင်ရှင် မိုရှေး ဟိုဂက်နဲ့ အသင်းက ထိပ်တန်းပုဂ္ဂိုလ်တစ်ချို့ဟာ မနေ့က ယူအေအီးနိုင်ငံ ဒူဘိုင်းမျိုးကို သွားရောက်ပြီး ဆွေးနွေးခဲ့ပါတယ်။ ယူကရိန်းမှာမွေးပြီး ယူအေအီးမှာ အခြေစိုက်တဲ့ အစ္စရေး စီးပွားရေးလုပ်ငန်းရှင် နအွန်ကိုအင်က ဒီကိစ္စမှာ ကြားဝင် ညှိနှိုင်းပေးနေတာပါ။

ယူအေအီးအုပ်ချုပ်သူ မိသားစုထဲက တစ်ဦးဖြစ်တဲ့ ဟာမဒ် ဘင် ခါလီဖာ အလ်နဟ်ယန်ဟာ ဒေါ်လာ သန်း ၁၀၀ နဲ့ Beitar Jerusalem အသင်းရဲ့ ရှယ်ယာ ၅၀ ရာခိုင်နှုန်းနီးပါးကို ဝယ်ယူမှာ ဖြစ်ပါတယ်။ ယူအေအီးနဲ့ အစ္စရေးတို့ ပုံမှန် ဆက်ဆံရေးမတည်ဆောက်ခင် စက်တင်ဘာလကတည်းက ဒီသတင်း ထွက်နေခဲ့တာပါ။

အသင်းပိုင်ရှင် ဟိုဂတ်က ဟာမဒ် ဘင် ခါလီဖာရဲ့ အခုလို ၀ယ်ယူမှုဟာ ရေရှည်မှာ အသင်းအတွက် ကောင်းမွန်မှာဖြစ်ပြီး အပြီးသတ်လက်မှတ်ရေးထိုးမှုကို အခုနှစ်နှောင်းပိုင်းမှာ ပြုလုပ်နိုင်လိမ့်မယ်လို့ ပြောကြားခဲ့ပါတယ်။

Beitar Jerusalem ဘောလုံးအသင်းဟာ အစ္စရေးပရီးမီးယားလိဂ်မှာ ပါလက်စတိုင်းနွယ်ဖွားတွေ မပါဝင်တဲ့ တစ်ခုတည်းသော ဘောလုံးအသင်း ဖြစ်ပါတယ်။ အသင်းရဲ့ ပရိတ်သတ်တွေက ‘အာရပ်တွေကိုသတ်ပစ်’ စတဲ့ လူမျိုးရေးခွဲခြားတဲ့ ကျွေးကြော်မှုတွေ ကွင်းအတွင်းပြုလုပ်လေ့ရှိပြီး အသင်းဟာ အကြိမ်ကြိမ် အရေးယူခံခဲ့ရပါတယ်။

အသင်းရဲ့ အမာခံ ပရိတ်သတ်အဖွဲ့ La Familia ဟာ ပြိုင်ဘက်အသင်းကစားသမားတွေအပေါ် လူမျိုးရေးတိုက်ခိုက်တာ၊ တမန်တော်မိုဟာမက်ကို စော်ကားတဲ့ သီချင်းတွေ သီဆိုလွှင့်တင်တာမျိုးတွေလည်း ရှိပါတယ်။ ၂၀၁၃ ခုနှစ်တုန်းက ရုရှားမွတ်စလင် ကစားသမားနှစ်ဦးကို ခေါ်ယူဖို့ အသင်းက ကြိုးစားတာကြောင့် အသင်းရဲ့ ရုံးခန်းတစ်ချို့ကို ပရိတ်သတ်တွေက မီးရှို့ဖျက်ဆီးခဲ့ပါတယ်။

Beitar Jerusalem ဘောလုံးအသင်းဟာ အစ္စရေးဝန်ကြီးချုပ် နေတန်ယာဟုရဲ့ အာဏာရ လူကစ်ပါတီနဲ့ အနီးကပ်မဟာမိတ်လည်း ဖြစ်ပါတယ်။

Ref : Middle East Eye