ဒီဇင်ဘာ ၃၊ ၂၀၂၀
M-Media

ကိုဗစ်ပျောက်ကင်းသူများ လနှင့်ချီ အဆုပ်အားနည်းနိုင်

ကိုဗစ်ကူးစက်ပျောက်ကင်းသွားသူတွေမှာ နောက်ထပ် ၃ လအထိ အဆုတ် အားနည်းနေတာ၊ ပုံမှန်အလုပ်မလုပ်တာတွေ ဖြစ်တတ်တယ်လို့ အောက်စဖို့ဒ်တက္ကသိုလ်ရဲ့ လေ့လာမှုမှာ တွေ့ရပါတယ်။
ဒီလို အဆုပ်အားနည်းတာမျိုးကို သာမန်နည်းလမ်းနဲ့ စမ်းသပ်ရင် မတွေ့နိုင်ဘဲ MRI စကန်နဲ့ ဖတ်ကြည့်မှာသာ အဆုအတွင်း ​သွေးကောင်းကောင်း လှည့်ပတ်မှုမရှိတာကို တွေ့ရတာ ဖြစ်ပါတယ်။
ကိုဗစ်ပျောက်သွားတဲ့ လူနာတွေမှာ လအတော်ကြာတဲ့အထိ တွေ့ရတဲ့ အဆုတ်အားနည်းမှု လက္ခဏာတွေကတော့ အသက်ရှုမ၀တာ၊ မောပန်းတာတွေ​ ဖြစ်ပါတယ်။
အောက်စဖို့တက္ကသိုလ်ဟာ ကနဦးအနေနဲ့ လူ ၁၀ ဦးကို လေ့လာခဲ့တာဖြစ်ပြီး အခုရလဒ် ထွက်ပေါ်ပြီ နောက်မှာ နောက်ထပ် ကိုဗစ်ပျောက်သွားသူ လူ ၁၀၀ လောက်ကို ထပ်ပြီး လေ့လာဖို့ ရှိနေပါတယ်။
ကိုဗစ်နောက်ဆက်တွဲ အဆုအားနည်းမှုဟာ အသက် ၆၀ ​ကျော်အရွယ်တွေမှာ အသက်အန္တရာယ် ထိခိုက်နိုင်တဲ့အထိ ဆိုးရွားနိုင်တယ်လို့ ပညာရှင်တွေက ပြောကြားခဲ့ပါတယ်။

သတင်းအမှားကြောင့် ကိုဗစ်ကာကွယ်ဆေးကို ယုံကြည်မှုလျော့နိုင်

ကိုဗစ်ကာကွယ်ဆေး ဘေးအန္တရာယ်ကင်းမှုနဲ့ ပတ်သက်ပြီး အွန်လိုင်းပေါ်က သတင်းမှားတွေကြောင့် လူတွေဟာ ကာကွယ်ဆေးကို ရှောင်ရှားတာတွေ ရှိလာနိုင်တယ်လို့ ကမ္ဘာ့ကျန်းမာရေးအဖွဲ့ WHO က သတိပေးလိုက်ပါတယ်။
၉၀ ရာခိုင်နှုန်း ထိရောက်မှုရှိတဲ့ ကာကွယ်ဆေး အနည်းဆုံး ၂ မျိုးလောက် ပေါ်လာပြီး အဲဒီထဲကတစ်မျိုးကို ယူကေမှာ အခုတစ်ပတ်အတွင်း ပြည်သူတွေကို စပြီး ထိုးပေးတော့မှာပါ။
ပုံမှန်အားဖြင့် ၁၀ နှစ်လောက်ကြာနိုင်တဲ့ ကာကွယ်ဆေးထုတ်လုပ်မှုဟာ ၁၀ လလောက်အတွင်း အကောင်အထည်​ပေါ်လာတဲ့အတွက် အန္တရာယ်ကင်းမှုနဲ့ပတ်သက်ပြီး သံသယတွေလည်း ရှိနေပါတယ်။
Facebook လို ဆိုရှယ်မီဒီယာတွေကတော့ ကိုဗစ်နဲ့ပတ်သက်တဲ့ သတင်းအမှားတွေကို ဖယ်ရှားနေတယ်လို့ ထုတ်ပြန်ထားပါတယ်။

အကြွေးပေးရန်မေ့ခြင်းက အသိဉာဏ်ချို့ယွင်းမှုရောဂါ၏ လက္ခဏာဖြစ်နိုင်

အကြွေးဝယ်ကဒ်၊ ဒါမှမဟုတ် အရစ်ကျဝယ်ယူမှုတွေအတွက် ငွေပြန်ဆပ်ဖို့​ မေ့နေတာဟာ မှတ်ဉာဏ်ချို့ယွင်းမှုရောဂါ(Dementia) ရဲ့ အစောဆုံး လက္ခဏာ ဖြစ်နိုင်တယ်ဆိုတာ အမေရိကန် ဂျွန်ဟော့ပ်ကင်း တက္ကသိုလ်ရဲ့ လေ့လာမှုတစ်ရပ်မှာ တွေ့ခဲ့ရပါတယ်။
ကိုယ့်ရဲ့ ဘဏ္ဍာရေးအခြေအနေ မမှတ်မိတော့တဲ့ ဒီလက္ခဏာဟာ Dementia ရောဂါရှိကြောင်း မသိခင် ၆ နှစ်လောက်၊ တစ်ချို့လူတွေမှာ ၂ နှစ်ခွဲလောက်အရင် ကြိုတွေ့ရလေ့ရှိပြီး ဒီအချက်ကြောင့် ပိုင်ဆိုင်မှုတွေ ဆုံးရှုံးတာ၊ စုဆောင်းထားတဲ့ငွေတွေ အလိမ်ခံရတာတွေ ဖြစ်နိုင်တယ်လို့ ပညာရှင်တွေက သတိပေးခဲ့ပါတယ်။
အမေရိကန်မှာ အသက် ၆၅ နှစ်နဲ့အထက် Dementia ရောဂါခံစားနေရသူ ၅.၈ သန်းလောက်ရှိပြီး ၂၀၅၀ ရောက်ရင် ၁၃.၈ သန်းလောက်ရှိမယ်လို့ ခန့်မှန်းထားပါတယ်။
Ref: BBC, CNN