မြန်မာနယ်စပ်ရှိ အိန္ဒိယသူပုန်များကို တရုတ်က ထောက်ပံ့ပေးနေသည်ဟု အိန္ဒိယစွပ်စွဲ

ဒီဇင်ဘာ ၇၊ ၂၀၂၀
M-Media

-မြန်မာနိုင်ငံနယ်စပ်မှာ အခြေစိုက်ပြီး မိမိတို့ကို တိုက်ခိုက်နေတဲ့ ခွဲထွက်ရေးသူပုန်တွေကို တရုတ်က ကူညီပံ့ပိုးပေးနေတယ်လို့ အိန္ဒိယအစိုးရက အမည်မဖော်လိုတဲ့ တာဝန်ရှိသူတွေရဲ့ ပြောကြားမှုကို ကိုးကားပြီး Bloomberg သတင်းဌာနက ဒီကနေ့မှာ ဖော်ပြပါတယ်။

တရုတ်ဟာ ၀,လက်နက်ကိုင်တပ်ဖွဲ့ (UWSA)၊ ရခိုင်လက်နက်ကိုင်တပ်ဖွဲ့ (AA) တို့လို မြန်မာနိုင်ငံက သူ့ဩဇာခံ အဖွဲ့တွေကနေတစ်ဆင့်အိန္ဒိယ အရှေ့မြောက်ပိုင်းက သူပုန်တွေကို လက်နက်ထောက်ပံ့တာ၊ ပုန်းခိုစရာပေး​တာလို့ ဆိုပါတယ်။

အိန္ဒိယအစိုးရက အလိုအရှိဆုံး သူပုန်ခေါင်းဆောင် အနည်းဆုံး ၄ ဦးကို တရုတ်နိုင်ငံတောင်ပိုင်း ကူမင်းမြို့မှာ နေထိုင်ခွင့်ပေးထားပြီး အောက်တိုဘာလအတွင်းမှာပဲ လက်နက်ထောက်ပံ့တာ၊ လေ့ကျင့်သင်ကြားပေးတာတွေ ရှိခဲ့တယ်လို့ လုံခြုံရေးအဖွဲ့တွေက အိန္ဒိယဝန်ကြီးချုပ် နရန်ဒရာမိုဒီကို မကြာခင်က သတိပေးခဲ့ပါတယ်။

ခွဲထွက်ကာ သီးခြားနိုင်ငံထူထောင်လိုတဲ့ နာဂအဖွဲ့ ၃ ဖွဲ့က ခေါင်းဆောင်တွေ ပါဝင်တဲ့ ဒီအဖွဲ့ကို တရုတ်စစ်တပ်က လက်ရှိအရာရှိတွေ၊ အရာရှိဟောင်းတွေ၊ ကြားပွဲစားတွေက တွေ့ဆုံဆွေးနွေးတာတွေ ရှိတယ်လို့လည်း အိန္ဒိယအစိုးရ တာဝန်ရှိသူတွေက Bloomberg ကို ထည့်သွင်းပြောကြားခဲ့ပါတယ်။

မြန်မာ-အိန္ဒိယ နယ်စပ်မှာ ခိုအောင်းနေတဲ့ အိန္ဒိယသူပုန်တွေဟာ အိန္ဒိယအစိုးရတပ်ဖွဲ့တွေကို မကြာခဏ နယ်စပ်ဖြတ်ကျော် တိုက်ခိုက်လေ့ရှိပြီး အောက်တိုဘာ ၂၁ ရက်နေ့ စစ်သားတစ်ယောက်သေဆုံးခဲ့တဲ့ ခြုံခိုတိုက်ခိုက်မှုအပြီးမှာတော့ အိန္ဒိယအစိုးရဟာ စစ်သားတစ်ထောင်လောက်ကို မြန်မာနယ်စပ်ဆီ ရွေ့ပြောင်းခဲ့ပါတယ်။

သက်ဆိုင်သူတွေ ငြင်းဆို

တရုတ်နိုင်ငံခြားရေးဝန်ကြီးဌာနက အိန္ဒိယရဲ့ ဒီပြောကြားမှုကို ငြင်းဆိုခဲ့ပြီး တစ်ခြားနိုင်ငံတွေရဲ့ ပြည်တွင်းရေးကို ဝင်မစွက်ရေးမူကို ထိန်းသိမ်းထားတယ်လို့ ပြောကြားခဲ့ပါတယ်။

“အချုပ်အခြာပိုင် နိုင်ငံတွေနဲ့ပဲ ကျွန်တော်တို့ စစ်ဖက်ကုန်သွယ်မှု လုပ်ပါတယ်။ အစိုးရမဟုတ်တဲ့ အခြားအဖွဲ့တွေကို လက်နက်မရောင်းပါဘူး”

မြန်မာနိုင်ငံရဲ့ အကြီးဆုံး တိုင်းရင်းသားလက်နက်ကိုင်အဖွဲ့ဖြစ်တဲ့ ၀,တပ်ဖွဲ့ (UWSA) ကလည်း တရုတ်ကိုယ်စား အိန္ဒိယသူပုန်တွေကို ကူညီပေးနေမှု မရှိဘူးလို့ ပြောကြားခဲ့ပြီး၊ သူတို့ဌာနချုပ်နဲ့ မြန်မာ-အိန္ဒိယနယ်စပ်တို့ မိုင်ပေါင်း ၅၀၀ လောက်ဝေးတာကို ထောက်ပြပါတယ်။

“အိန္ဒိယနိုင်ငံရဲ့ လုံခြုံရေးနဲ့ ကျွန်တော်တို့ ဘာမှ မပတ်သက်ပါဘူး။ အိန္ဒိယကိုလည်း ထိခိုက်အောင် ကျွန်တော်တို့ မလုပ်ဘူး။ ဒီလိုစွပ်စွဲချက်တွေအတွက် ဖြေရှင်းချက်ပေးစရာ မလိုဘူးလို့ ကျွန်တော်တို့ ထင်ပါတယ်” လို့ UWSA ရဲ့ ပြောရေးဆိုခွင့်ရှိသူ ဦးညီရမ်းက ​ေ ပြောကြားခဲ့ပြီး တရုတ်ဩဇာခံအဖြစ် ဆောင်ရွက်နေတယ်ဆိုတဲ့ ပြောကြားချက်တွေကလည်း ‘အခြေအမြစ်မရှိဘူး’ လို့ ဆိုပါတယ်။

စက်တင်ဘာ ၂၈ ရက်နေ့မှာ အိန္ဒိယ နယ်ခြားစောင့်တပ်ဟာ အိန္ဒိယသူပုန်တွေဆီ ပေးပို့မယ့် လက်နက်အမြောက်အများနဲ့ သံသယရှိသူ ၃ ဦးကို အိန္ဒိယ-မြန်မာနယ်စပ်မှာ ဖမ်းမိခဲ့ပါတယ်။

ဒီလက်နက်တွေကို ရခိုင်လက်နက်ကိုင်အဖွဲ့ AA က ပေးပို့တာဖြစ်ပြီး၊ စစ်တွေဆိပ်ကမ်းကနေ ကူမင်းမြို့အထိ ရှည်လျားရဲ့ စီးပွားရေးစင်္ကြန်တစ်လျှောက်က ဓာတ်ငွေ့ပိုက်လိုင်းတွေ၊ လမ်းတွေလို တရုတ်အကျိုးစီးပွားကို ကာကွယ်ပေးတဲ့အတွက်AA က တရုတ်ထံကနေ လက်နက်တွေ ရရှိတာလို့ အိန္ဒိယအစိုးရ တာဝန်ရှိသူတွေက ပြောပါတယ်။ တရုတ်က အိန္ဒိယသူပုန်တွေကို လက်နက်ထောက်ပံ့တာ၊ နေစရာပေးတာတွေ ရှိတယ်လို့လည်း အဲဒီတုန်းက ထည့်သွင်းပြောကြားဖူးပါတယ်။

အိန္ဒိယပြည်ထဲရေးဝန်ကြီးဌာန၊ ခေါင်းဆောင်တွေ ကူမင်းမှာ ရှိနေတယ်လို့ ယူဆရတဲ့ နာဂပြည်အမျိုးသားဆိုရှယ်လစ်ကောင်စီရဲ့ အကြီးတန်းတာဝန်ရှိသူတွေ၊ မြန်မာစစ်တပ်က ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်းတို့ကို ဒီကိစ္စအတွက် ဆက်သွယ်မေးမြန်းခဲ့ပေမယ့် ပြန်မဖြေဘူးလို့ Bloomberg က ဖော်ပြပါတယ်။

အိန္ဒိယသူပုန်များ

အိန္ဒိယနိုင်ငံ အရှေ့မြောက်ပိုင်းဒေသတွေမှာ ခွဲထွက်ရေးလိုလားတဲ့ လူမျိုးစုလက်နက်ကိုင် အများအပြား ရှိနေပြီး တစ်ချို့တွေဟာ မြန်မာနိုင်ငံဖက်မှာ အခြေစိုက်ကာ အိန္ဒိယအစိုးရကို တိုက်ခိုက်နေတာ ဖြစ်ပါတယ်။

၁၉၅၀ ကျော်လောက်ကတည်းက အိန္ဒိယသူပုန်တွေ ပေါ်ပေါက်လာတာဖြစ်ပြီး ပထမပိုင်းမှာ အိန္ဒိယရဲ့ရန်ဖက် ပါကစ္စတန်က ဒီသူပုန်တွေကို ထောက်ပံ့ပေးခဲ့ပေမယ့် နောက်ပိုင်းမှာတော့ တရုတ်က ဒိုင်ခံထောက်ပံ့တာ၊ လေ့ကျင့်သင်ကြားပေးတာတွေ လုပ်လာတယ်လို့ အာရှဒေသအရေး ကျွမ်းကျင်သူ ဆွီဒင်ဂျာနယ်လစ် ဘာတေး လစ်တနာက ၂၀၁၂ ခုနှစ်က ထုတ်ဝေတဲ့ စာအုပ်တစ်အုပ်မှာ ရေးသားခဲ့ဖူးပါတယ်။ တရုတ်အစိုးရဟာ လူသိရှင်ကြား ထောက်ပံ့တာမျိုး မဟုတ်ဘဲ လက်နက်မှောင်ခိုစျေးကွက်ကနေတစ်ဆင့် ထောက်ပံ့တာလို့ ဘာတေးလစ်တနာက ဆိုပါတယ်။

တရုတ်နဲ့ ​အိန္ဒိယ နှစ်နိုင်ငံစလုံးဟာ မြန်မာနိုင်ငံမှာ မဟာဗျူဟာမြောက် အကျိုးစီးပွားကိုယ်စီ ရှိနေတာ ဖြစ်ပါတယ်။

Ref: Bloomberg