၉၀ ရာခိုင်နှုန်း ထိရောက်မှုရှိသည့် ကိုဗစ်ကာကွယ်ဆေးကို ယူကေတွင် စတင်ထိုးနှံ

ဒီဇင်ဘာ ၈၊ ၂၀၂၀
M-Media

-အမေရိကန်-ဂျာမန် ဆေးကုမ္ပဏီ Pfizer/BioNTech က ထုတ်လုပ်ပြီး ၉၀ ရာခိုင်နှုန်း ထိရောက်မှုရှိတဲ့ ကိုဗစ်ကာကွယ်ဆေးကို ဒီကနေ့ ယူကေမှာ စတင် ထိုးနှံခဲ့ပါတယ်။

လာမယ့်တစ်ပတ်မှာ အသက် ၉၁ နှစ်ပြည့်မယ့် မာဂရတ် ကီနန်ကို စတင်ထိုးနှံခဲ့တာပါ။ ယူကေဟာ ပထမအသုတ်အဖြစ် ကာကွယ်ဆေး ၈ သိန်းကနေ လကုန်ပိုင်းမှာ ၄ သန်းအထိ ထိုးပေးဖို့ စီစဉ်ထားပါတယ်။

အသက် ၈၀ ကျော်အရွယ်တွေ၊ အချို့ ကျန်းမာရေးဝန်ထမ်းတွေကို ဦးစားပေးမှာ ဖြစ်ပါတယ်။

“ကိုဗစ်ကာကွယ်ဆေးကို ပထမဆုံး ထိုးနှံရသူဖြစ်တဲ့အတွက် အရမ်းကျေနပ်ပါတယ်။ အဘွား တောင့်တသမျှထဲက အကောင်းဆုံးနဲ့ အစောဆုံး မွေးနေ့လက်ဆောင်လည်း ဖြစ်ပါတယ်။ တစ်နှစ်လုံးတစ်ယောက်တည်း နေလာရပြီးတဲ့နောက် နှစ်သစ်မှာ မိသားစုနဲ့ အချိန်တွေကို ကုန်ဆုံးနိုင်တော့မှာပါ” လို့ မာဂရတ် ကီနန်က ပြောကြားခဲ့ပါတယ်။

Pfizer/BioNTech ကာကွယ်ဆေးကို ယူက​ကေ ပထမဆုံး အသုံးပြုတဲ့နိုင်ငံ ဖြစ်ပါတယ်။ ယူကေကျန်းမာရေးဝန်ကြီး မတ် ဟန်ကော့က သွားရမယ့်ခရီးလမ်းက ရှည်လျားလွန်းပြီး အခုမှ တာထွက်ပဲရှိသေးတယ်လို့ ပြောကြားခဲ့ပါတယ်။

“ဒီဗိုင်းရပ်စ်က ဆိုးရွားတယ်။ စည်းမျဉ်းစည်းကမ်းတွေအတိုင်း လိုက်နာဖို့ လိုအပ်ပါတယ်”

ယူကေဝန်ကြီးချုပ် ဘောရစ်ဂျွန်ဆင်က ကပ်ရောဂါကာလအတွင်း စွမ်းစွမ်းတမံ ဆောင်ရွက်ခဲ့ကြတဲ့ ကျန်းမာရေးဝန်ထမ်းတွေ၊ ကာကွယ်ဆေးရရှိအောင် အားထုတ်ကြိုးပမ်းခဲ့ကြသူတွေ၊ စေတနာ့ဝန်ထမ်းတွေကို ကျေးဇူးတင်တယ်လို့ ပြောကြားခဲ့ပါတယ်။

Pfizer/BioNTech ကာကွယ်ဆေးဟာ ၂ ကြိမ်ထိုးရမှာဖြစ်ပြီး ယူကေက လူ သန်း ၂၀ အတွက် ကာကွယ်ဆေးအလုံးရေ သန်း ၄၀ ဝယ်ယူထားပါတယ်။

Ref: BBC