ဒီဇင်ဘာ ၁၁၊ ၂၀၂၀
M-Media

ကိုဗစ်ကာကွယ်ရေး လေယာဉ်အမှုထမ်းတွေ ဒိုက်ပါဝတ်ဖို့ တရုတ်လေကြောင်းလိုင်း အကြံပြု

တရုတ်လေကြောင်းလိုင်း CAAC က ကိုဗစ်ရောဂါကာကွယ်ရေး စည်းကမ်းချက်တွေ ထုတ်ပြန်ရာမှာ လေယာဉ်အမှူးထမ်းတွေအနေနဲ့ ခရီးစဉ်အတွင်း တစ်ခါသုံးဒိုက်ပါတွေ ဝတ်ဆင်ဖို့ အကြံပြုထားပါတယ်။

နှာခေါင်းစည်း၊ လက်အိတ်၊ ခြေအိတ်၊ မျက်မှန်လို အကာအကွယ်ပစ္စည်း အကုန်သုံးဖို့ ညွှန်ကြားထားတဲ့အပြင် လေယာဉ်အိမ်သာမသုံးဖို့ ဒိုက်ပါဝတ်ဖို့ပါ တိုက်တွန်းထားတာပါ။

ဩဂုတ်လတုန်းက အီတလီကနေ တောင်ကိုရီးယားကို ခရီးသွားခဲ့တဲ့ အမျိုးသမီးဟာ ခရီးစဉ်အတွင်း ကိုဗစ်ကူးစက်ခဲ့ပါတယ်။ သူမဟာ အဲဒီခရီးမှာ လေယာဉ်အိမ်သာသွားတဲ့အချိန် တစ်ခုတည်း နှာခေါင်းစည်းမတပ်ခဲ့ဘဲ အဲဒီကနေတစ်ဆင့် ကူးစက်ဖို့များတယ်လို့ ကျွမ်းကျင်သူတွေက သုံးသပ်ခဲ့ပါတယ်။

ဂျပန်လေကြောင်းလိုင်း ANA ကလည်း အခုနှစ်အစောပိုင်းမှာ လေယာဉ်ပေါ်မှာ လက်နဲ့ဖွင့်စရာမလိုတဲ့ အိမ်သာစနစ်ကို မိတ်ဆက်ခဲ့ပါတယ်။

ကိုဗစ်မြင့်တက်လာသည့် တောင်ကိုရီးယားတွင် ကွန်တိန်နာနှင့် ဆေးခန်းဆောက်

တောင်ကိုရီးယားနိုင်ငံတစ်ဝှမ်းမှာ ကိုဗစ်ကူးစက်မှု သိသိသာသာ ပြန်လည်မြင့်တက်လာတာကြောင့် အာဏာပိုင်တွေဟာ ကွန်တိန်နာတွေနဲ့ ယာယီဆေးခန်းတွေဆောက်ပြီး ကြိုတင်ပြင်ဆင်နေကြပါတယ်။

မနေ့က ကူးစက်သူ ၆၈၂ ဦး ရှိခဲ့ပြီး ဗုဒ္ဓဟူးနေ့က ကူးစက်တဲ့ ၆၈၈ ဦးဟာ ဇန်နဝါရီနောက်ပိုင်းမှာ တစ်ရက်တာ အများဆုံးပါ။ ကူးစက်မှု ထပ်မံမြင့်တက်လာနိုင်တာကြောင့် ဆေးရုံမှာ ကုတင်မလုံလောက်မှုတွေ ဖြစ်နိုင်တယ်ဆိုတဲ့ စိုးရိမ်မှုတွေလည်း ရှိလာပါတယ်။

ကိုဗစ်သီးသန့်ကုတဲ့ ဒေသန္တသရဆေးခန်း​တွေ၊ ကိုဗစ်စမ်းသပ်တဲ့ စင်တာတွေကိုလည်း တိုးမြှင့်ဖွင့်လှစ်သွားဖို့ ​အစိုးရက စီစဉ်နေပါတယ်။

ဓာတ်မတည့်ရောဂါရှိသူများ Pfizer-BioNTech ထုတ် ကိုဗစ်ကာကွယ်ဆေးနှင့် မတည့်

အစားအစာ၊ ဆေးဝါးတွေနဲ့ ဓာတ်မတည့်သူတွေဟာ အမေရိကန်ဆေးကုမ္ပဏီ Pfizer-BioNTech ထုတ် ကိုဗစ်ကာကွယ်ဆေးကို မထိုးသင့်ဘူးလို့ ယူကေ ကျန်းမာရေးပညာရှင်တွေက မနေ့မှာ ပြောကြားလိုက်ပါတယ်။

၉၀ ရာခိုင်နှုန်း ထိရောက်မှုရှိတယ်ဆိုတဲ့ ဒီဆေးကို တနင်္လာနေ့က ယူကေမှာ စထိုးခဲ့ပြီး အနည်းဆုံး လူ ၂ ဦး ဓာတ်မတည့်တဲ့ရောဂါကို ခံစားရပါတယ်။

ယူကေအစိုးရရဲ့ ဆေးဝါးထိန်းချုပ်ရေးအဖွဲ့ MHRA က ​ဒီဆေးကို အရည်အသွေး၊ အန္တရာယ်ကင်းမှု၊ ထိရောက်မှု စံချိန်စံညွှန်းတွေနဲ့ တိတိကျကျစစ်ဆေးထားတာကြောင့် ယုံယုံကြည်ကြည်ထိုးနှံနိုင်တယ်လို့ ထုတ်ပြန်ခဲ့ပါတယ်။

Ref: BBC, CNN