တရုတ်ထုတ် ကိုဗစ်ကာကွယ်ဆေး စမ်းသပ်မှုကို ပီရူးရပ်ဆိုင်း

ဒီဇင်ဘာ ၁၃၊ ၂၀၂၀
M-Media

-စမ်းသပ်ထားသူတစ်ယောက်မှာ အာရုံကြောဆိုင်ရာ ရောဂါတစ်ခု ဖြစ်လာခဲ့ပြီးတဲ့နောက် တရုတ်အစိုးရဆေးကုမ္ပဏီ Sinopharm က ထုတ်လုပ်တဲ့ ကိုဗစ်ကာကွယ်ဆေး စမ်းသပ်မှုကို ပီရူးနိုင်ငံက ရပ်ဆိုင်းလိုက်ပါတယ်။

ပီရူးဟာ ဒီကာကွယ်ဆေးကို လူ ၁၂၀၀၀ မှာ စမ်းသပ်ခဲ့ပြီး ရလဒ်ကို ဒီတစ်ပတ်မှာ သုံးသပ်မှာ ဖြစ်ပါတယ်။ ဒါပေမယ့် ထိုးထားသူလူတစ်ဦးဟာ လက်တွေ လှုပ်လို့မရတော့တဲ့အခြေအနေကို ကြုံတွေ့ခဲ့တာကြောင့် စမ်းသပ်မှုကို ရပ်ဆိုင်းလိုက်တယ်လို့ ကျန်းမာရေးဝန်ကြီးဌာနက ဒီဇင်ဘာ ၁၁ ရက်နေ့မှာ ထုတ်ပြန်ပါတယ်။

“ပြီးခဲ့တဲ့ရက်အနည်းငယ်က စမ်းသပ်မှုမှာပါဝင်သူတစ်ယောက်မှာ Guillain-Barre ဆင်ဒရုန်းဖြစ်နိုင်တဲ့ လက္ခဏာမျိုး တွေ့ရကြောင်း အာဏာပိုင်တွေဆီ ကျွန်တော်တို့ အကြောင်းကြားခဲ့ပါတယ်” လို့ စမ်းသပ်မှုဆိုင်ရာ အကြီးအကဲ ဂျာမန် မာလာဂါက သတင်းစာရှင်းလင်းပွဲမှာ ပြောကြာခဲ့ပါတယ်။

ပီရူးဟာ စမ်းသပ်မှုအောင်မြင်ရင် တရုတ်ထုတ်ကိုဗစ်ကာကွယ်ဆေး အလုံးရေ သန်း ၂၀ လောက် ဝယ်ယူဖို့ စီစဉ်ထားတာပါ။ Sinopharm ထုတ် ကာကွယ်ဆေးကို အာဂျင်တီးနားနဲ့ ဆော်ဒီအာရေဗျတို့ အပါအဝင် ကမ္ဘာတစ်ဝှမ်းက လူ ၆ သောင်းလောက်မှာ စမ်းသပ်နေတာပါ။

ကိုဗစ်ကူးစက်ပြီး သေဆုံးမှုနှုန်းမှာ ပီရူးနိုင်ငံက အမြင့်ဆုံးဖြစ်ပြီး ၃ သောင်း ၆ ထောင်ကျော် ရှိနေတာ ဖြစ်ပါတယ်။ ပြီးခဲ့တဲ့ ဇွန်လအတွင်း ကူးစက်မှု အလွန်အမင်းမြင့်တက်လာတာကြောင့် ပီရူးဟာ ဒေသ ၅ ခုမှာ ယာယီအရေးပေါ်အခြေအနေ ကြေငြာခဲ့ရပါတယ်။

Ref: CNA