ဒီဇင်ဘာ ၁၁၊ ၂၀၂၀
M-Media

အီတလီဂန္တဝင်တိုက်စစ်မှူး ပါအိုလို ရော့စီ ကွယ်လွန်

၁၉၈၂ ခုနှစ် ကမ္ဘာ့ဖလားချန်ပီယံ အီတလီအသင်းရဲ့ သူရဲ့ကောင်း ဂန္တဝင်တိုက်စစ်မှူး ပါအိုလိုရော့စီဟာမနေ့က ကွယ်လွန်သွားပါတယ်။
အသက် ၆၄ နှစ်အရွယ် ရော့စီဟာ နာတာရှည်ရောဂါဝေဒနာကို ခံစားနေရသူဖြစ်ပြီး ဘာ့ကြောင့် ကွယ်လွန်သွားလဲဆိုတာ မိသားစုက ထုတ်မပြောပါဘူး။
စပိန်မှာကျင်းပတဲ့ ၁၉၈၂ ခုနှစ် ကမ္ဘာ့ဖလားပြိုင်ပွဲမှာ အီတလီအသင်း ချန်ပီယံဖြစ်ခဲ့သလို ရော့စီဟာ ဂိုးအများဆုံးသွင်းသူ၊ ပြိုင်ပွဲတစ်လျှောက် အကောင်းဆုံးကစားသမား ဖြစ်ခဲ့ပါတယ်။ အဲဒီနှစ်မှာပဲ ဥရောပအကောင်းဆုံး ဘောလုံးသမားဆုကို ဆွတ်ခူးခဲ့ပါတယ်။
အီတလီအသင်းအတွက် ၄၈ ပွဲကစား ဂိုး ၂၀ သွင်းယူခဲ့ပြီး၊ ဗီဆန်ဇာ၊ ပီရူဂီယာ၊ ဂျူဗင်တပ်စ်၊ အေစီမီလန်နဲ့ ဗီရိုနာအသင်းတို့မှာကစားပြီး စီးရီးအေ ဂိုးပေါင်း ၁၀၀ ကျော် သွင်းယူခဲ့ပါတယ်။
၁၉၈၀ ပြည့်နှစ်တွေမှ​ ဘောလုံးလောကက အနားယူပြီး ဘောလုံးပွဲ သုံးသပ်သူအဖြစ် ဆောင်ရွက်ခဲ့ပါတယ်။ ရော့စီကွယ်လွန်မှုအတွက် အီတလီဘောလုံးအဖွဲ့ချုပ်က ဝမ်းနည်းခြင်းအထိမ်းအမှတ် အလံတိုင်တစ်ဝက် လွှင့်ထူခဲ့ပါတယ်။

ကိုယ်ပိုင်ဂျက်လေယာဉ်အသုံးပြုမှုအတွက် ဖီဖာဥက္ကဌ စစ်ဆေးခံရဖွယ်ရှိ

ဥက္ကဌ ဂီယန်နီ အင်ဖန်တီနိုကို ကိုယ်ပိုင်ဂျက်လေယာဉ် သုံးစွဲမှုအတွက် စုံစမ်းစစ်ဆေးဖို့ ဆွစ်ဇာလန်အစိုးရက ပြောဆိုနေတာတွေဟာ အခြေအမြစ်မရှိဘူးလို့ ကမ္ဘာ့ဘောလုံးအဖွဲ့ချုပ် ဖီဖာက တုန့်ပြန်ပြောကြားလိုက်ပါတယ်။
၂၀၁၇ ခုနှစ်တုန်းက ဆူရီနမ်ကနေ ဂျီနီဗာကို ပြန်အလာမှာ ဖြစ်ခဲ့တဲ့ ဒီအဖြစ်အပျက်ဟာ လက်မခံနိုင်ဖွယ်ရာဖြစ်ပြီး ရာဇဝတ်မှုမြောက်တယ်လို့ဆိုကာ စုံစမ်းစစ်ဆေးမှုလုပ်ဖို့ ဆွဇ်ဇာလန်အစိုးရကို တိုက်တွန်းခဲ့တာ ဖြစ်ပါတယ်။
ဖီဖာ ကျင့်ဝတ်ကော်မတီက ဒီကိစ္စကို စစ်ဆေးကာ အင်ဖန်တီနိုမှာ အပြစ်မရှိဘူးလို့ ဆုံးဖြတ်ခဲ့တာပါ။
ကယ်လာရဲ့ ထုတ်ပြန်ချက်အတွက် တုန်လှုပ်မိတယ်လို့ ဖီဖာက တုန့်ပြန်ပြောကြားခဲ့ပါတယ်။ ကယ်လာဟာ အင်ဖန်တီနိုနဲ့ ဖီဖာအရာရှိတွေ မသမာမှုလုပ်တယ်ဆိုတဲ့ သတင်းတွေကို စုံစမ်းဖို့ ဇွန်လမှာ ခန့်အပ်ခံရတာ ဖြစ်ပါတယ်။

ဆွစ်ဇာလန်ကို အနိုင်ပေးမှုအတွက် UEFA ကို ယူကရိန်း ကန့်ကွက်

ဆွစ်ဇာလန်အသင်းကို ၃ ဂိုး ဂိုးမရှိနဲ့ အနိုင်ပေးလိုက်တဲ့ Nations League ပွဲအတွက် ပြန်လည်သုံးသပ်ပေးဖို့ ယူကရိန်းဘောလုံးအဖွဲ့ချုပ်က ဥရောပဘောလုံးအဖွဲ့ချုပ် (UEFA) ကို အသနားခံစာ တင်လိုက်ပါတယ်။
နိုဝင်ဘာ ၁၇ ရက်နေ့က အဲဒီပွဲအတွက် ယူကရိန်းအသင်း ဆွစ်ဇာလန်ကို ရောက်သွားပေမယ့် ကစားသမားတစ်ချို့မှာ ကိုဗစ်တွေ့တာကြောင့် ဆွစ်ဇာလန်ဆရာ၀န်တွေက တစ်သင်းလုံး ကွာရန်တင်း ဝင်ခိုင်းခဲ့တာပါ။
ဒီကိစ္စမှာ ယူကရိန်းအသင်းက တာဝန်ရှိတယ်လို့ UEFA က ယူဆတဲ့အတွက် ဆွစ်ဇာလန်အသင်းကို အနိုင်ပေးလိုက်တာဖြစ်ပါတယ်။
ယူကရိန်းဘောလုံးချုပ်အဖွဲ့က ဒီပွဲကို ပြန်ကစားဖို့၊ ဒါမှမဟုတ် သရေအဖြစ်သတ်မှတ်ဖို့ တောင်းဆိုထားပါတယ်။ ဒီနှစ်သင်းပါဝင်တဲ့ အုပ်စု (၄) မှာ ၆ ပွဲကစားပြီးချိန် စပိန်က ၁၁ မှတ်၊ ဂျာမနီက ၉ မှတ်၊ ဆွစ်ဇာလန်နဲ့ ယူကရိန်းတို့က ၆ မှတ်စီ ရထားပါတယ်။