ဆော်ဒီအာရေဗျတွင် ကိုဗစ်ကာကွယ်ဆေး စထိုး

​ဒီဇင်ဘာ ၁၇၊ ၂၀၂၀
M-Media

-ဆော်အာရေဗျနိုင်ငံမှာ မနေ့က Pfizer-BioNTech ထုတ် ကိုဗစ်ကာကွယ်ဆေး ပထမအသုတ် ရောက်ရှိလာခဲ့ပြီးတဲ့နောက် ဒီကနေ့မှာ စတင်ပြီး ကာကွယ်ဆေးထိုးနှံနေပြီ ဖြစ်ပါတယ်။

နိုင်ငံတစ်ဝှမ်း ကာကွယ်ဆေးထိုးနှံမယ့်စင်တာတွေကို နောက် ၃ ရက်အတွင်း ဝေငှ ဖြန့်ဖြူးပေးသွားမှာပါ။

ကာကွယ်ဆေးထိုးနှံရေးအတွက် အွန်လိုင်းက စာရင်းပေးမှုကို ဆော်ဒီက အင်္ဂါနေ့မှာ စတင် လက်ခံခဲ့တာဖြစ်ပြီး လက်ရှိ နိုင်ငံတစ်ဝှမ်း စာရင်းပေးထားသူ ၁ သိန်းခွဲလောက် ရှိနေပါတယ်။

ဆော်ဒီဟာ နိုင်ငံသားတွေနဲ့ နိုင်ငံအတွင်း ရှိနေသူအားလုံးကို အခမဲ့ ကာကွယ်ဆေး ထိုးပေးမယ်လို့ ကြေငြာထားတာပါ။ ဒါပေမယ့် မထိုးမနေရမဟုတ်ဘဲ ကိုယ့်ရဲ့သဘောဆန္ဒ​အတိုင်းပဲလို့ ဆော်ဒီအစိုးရက ပြောပါတယ်။

“ဆော်ဒီအာရေဗျက ဒေသအားလုံးမှာ ကိုရိုနာဗိုင်းရပ်စ် ကာကွယ်ဆေးထိုးနှံရေးစင်တာတွေ ထားရှိသွားမှာ ဖြစ်ပါတယ်” လို့ ကျန်းမာရေးဝန်ကြီး ဒေါက်တာ သောင်ဖစ်က် အလ် ရာဘီယာက ပြောကြားခဲ့ပါတယ်။

အခုရောက်လာတဲ့ Pfizer-BioNTech ကာကွယ်ဆေးဟာ အန္တရာယ်ကင်းတယ်လို့လည်း ဆော်ဒီကျန်းမာရေးဝန်ကြီးဌာနက ထုတ်ပြန်ထားပါတယ်။

Ref: Alarabiya