ကက်ရှ်မီးယားတွင် အရပ်သားများကိုသတ်ပြီး အကြမ်းဖက်သမားအသွင်ဖြစ်အောင် အိန္ဒိယစစ်တပ်က ဖန်တီး

ဒီဇင်ဘာ ၂၈၊ ၂၀၂၀
M-Media

-ဇူလိုင်လက ကက်ရှ်မီးယားဒေသမှာ အရပ်သား ၃ ဦးကို သတ်ဖြတ်ပြီး အကြမ်းဖက်သမား​တွေအဖြစ် ပုံဖော်ခဲ့တဲ့ ဗိုလ်ကြီးတစ်ဦးနဲ့ အရပ်သားနှစ်ဦးကို တရားစွဲထားတယ်လို့ အိန္ဒိယရဲတပ်ဖွဲ့က မနေ့မှာ ထုတ်ပြန်ပါတယ်။

ကက်ရှ်မီးယားဒေသ တောင်ပိုင်း အမ်ရှီဖိုရာရွာမှာ အပြန်အလှန် ပစ်ခတ်မှု ဖြစ်ပွားပြီးနောက် စစ်သားတွေဟာ အမျိုးသား ၃ ဦးကို အသေပစ်ခတ် ဖမ်းဆီးခဲ့ပြီး သူတို့ထံမှာ လက်နက်တွေ တွေ့ခဲ့ရတယ်လို့ အိန္ဒိယစစ်တပ်က ကနဦး သတင်းထုတ်ပြန်ခဲ့ပါတယ်။ စစ်သားတွေဟာ ဒီလူ ၃ ဦးကို တောထဲမှာ မြန်မြန်ဆန်ဆန်ပဲ မြှုပ်နှံခဲ့ပါတယ်။

ရဲတပ်ဖွဲ့ရဲ့ မနေ့က ထုတ်ပြန်ချက်မှာတော့ အသတ်ခံရသူတွေဟာ ပန်းသီးခြံမှာ အလုပ်လုပ်ဖို့ အလုပ်လာရှာသူတွေဖြစ်ပြီး စစ်သားတွေက သတ်ဖြတ်ခဲ့ပြီးတဲ့နောက်၊ တရားမဝင်ရထားတဲ့ လက်နက်တွေ၊ ဖောက်ခွဲရေးပစ္စည်းတွေကို အလောင်းပေါ်မှာ တပ်ဆင်ကာ အကြမ်းဖက်သမားတွေအဖြစ် ပုံဖျက်ခဲ့တယ်လို့ ဖော်ပြထားပါတယ်။

ဒီကိစ္စအတွက် ဗိုလ်ကြီး ဘိုပန်ဒရာဆင်းကို လူသတ်မှု၊ လီဆည်မှု၊ အခြားပြစ်မှုတွေနဲ့ တရားစွဲဆိုထားပြီး လက်ရှိမှာ စစ်တပ်က ဆင်းကို ထိန်းသိမ်းထားကြောင်း၊ သူနဲ့အတူ ကျူးလွန်မှုမှာ ပါဝင်တဲ့ အရပ်သား ၂ ဦးကို ရဲတပ်ဖွဲ့က ထိန်းသိမ်းထားကြောင်း ကြေငြာချက်က ဆိုပါတယ်။

ကက်ရှ်မီးယားဒေသရဲ့ ကိုယ်ပိုင်အုပ်ချုပ်ခွင့်ကို ၂၀၁၉ ခုနှစ် ဩဂုတ်လမှာ အိန္ဒိယအစိုးရက ရုပ်သိမ်းခဲ့ပြီး ဗဟိုအစိုးရရဲ့ အုပ်ချုပ်အောက်ကို ထည့်သွင်းခဲ့ပါတယ်။ လှုပ်ရှားသွားလာခွင့်အပါအဝင် ကက်ရှ်မီးယားပြည်သူတွေရဲ့ အခြေခံလွတ်လပ်ခွင့်ကို အိန္ဒိယအစိုးရက ပိုမို ချုပ်ချယ်ကန့်သတ်ခဲ့သလို အစိုးရ လုံခြုံရေးတပ်ဖွဲ့တွေကလည်း ပြည်သူတွေအပေါ် တရားလက်လွတ် ပြုကျင့်မှုတွေ၊ ညှမ်းပမ်းနှိပ်စက်မှုတွေ လုပ်တယ်လို့ သတင်းတွေ ကျယ်ကျယ်ပြန့်ပြန့် ထွက်ပေါ်ခဲ့ပါတယ်။

လက်နက်ကိုင်တပ်ဖွဲ့ အထူးအာဏာအက်ဥပဒေ (AFSPA) အောက်မှာ မိမိတို့တပ်ဖွဲ့တွေဟာ အင်အားအလွန်အကျွံသုံးတာ၊ အာဏာ အလွဲသုံးစားလုပ်တာတွေ ရှိတယ်လို့ အိန္ဒိယစစ်တပ်က စက်တင်ဘာလမှာ ဝန်ခံခဲ့တယ်။

ဇူလိုင်လက အခုအဖြစ်အပျက်အတွက် ဗီဒီယိုသက်သေရထားပြီး အရေးယူမှုတွေ လုပ်မယ်လို့ စစ်တပ်က ထုတ်ပြန်ပါတယ်။ အသတ်ခံလိုက်ရတဲ့ အရပ်သား ၃ ဦးရဲ့အလောင်းကို စက်တင်ဘာလမှာ ပြန်ဖေါ်ကာ မိသားစုထံ ပြန်အပ်ခဲ့ပါတယ်။

စစ်သားတွေရဲ့ တရားလက်လွတ်ကျူးလွန်မှုကို ရဲတပ်ဖွဲ့က စုံစမ်းစစ်ဆေးတာဟာ အိန္ဒိယမှာ ရှားရှားပါးပါး အဖြစ်အပျက်ပါ။

ကျူးလွန်ခဲ့တဲ့ စစ်သားကို အရပ်ဖက်ခုံရုံမှာ တရားစွဲရမလား၊ စစ်ခုံရုံးကပဲ စီရင်မလားဆိုတာ အဖြေ​ပေးဖို့အတွက် ကက်ရှ်မီးယား တရားရုံးက စစ်တပ်ကို အကြောင်းကြားထားပါတယ်။

AFSPA အက်ဥပဒေအရ ဒီဥပဒေ ကျင့်သုံးတဲ့ဒေသတွေမှာ စစ်တပ်ရဲ့ ကျူးလွန်မှုတွေနဲ့ပတ်သက်ပြီး အစိုးရက သဘောမတူရင် အရက်ဖက်တရားရုံးက တရားစွဲ အရေးယူလို့ မရပါဘူး။ လွန်ခဲ့တဲ့ နှစ် ၃၀ အတွင်း ရဲတပ်ဖွဲ့က ရာဇဝတ်မှုကျူးလွန်တဲ့စစ်သားကို အရေးယူဖို့ တောင်းဆိုမှုတစ်ချို့ ရှိခဲ့ဖူးပေမယ့် ခွင့်ပြုချက် မရခဲ့ပါဘူး။

Ref: Reuters