ဝီဂါမွတ်စလင်များ ညှင်းပမ်းခံရသည့် အထောက်အထားများကို ဂျပန်က အမေရိကန်ကိုပေး

ဒီဇင်ဘာ ၂၉၊ ၂၀၂၀
M-Media

-တရုတ်အစိုးရက ဝီဂါမွတ်စလင်တွေအပေါ် ဖိနှိပ်ညှင်းပမ်းမှုနဲ့ ပတ်သက်တဲ့ အထောက်အထားတွေကို ဂျပန်က အမေရိကန်နဲ့ ​ယူကေတို့ကို ပေးအပ်ခဲ့တယ်လို့ ဂျပန်-အမေရိကန် ဆက်ဆံရေး တာဝန်ရှိသူတစ်ဦးက တနင်္လာနေ့မှာ ဖွင့်ဟပြောကြားခဲ့ပါတယ်။

တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါမွတ်စလင်တွေ ဖိနှိပ်ညှင်းပမ်းခံရမှုအတွက် ပြီးခဲ့တဲ့လတွေအတွင်း အမေရိကန်က တရုတ်အပေါ် ဝေဖန်မှုတွေ၊ ပိတ်ဆို့မှုတွ​ေကျယ်ကျယ်​ပြန့်ပြန့်လုပ်ခဲ့တာဟာ ဂျပန်ထောက်လှမ်းရေးက ပေးအပ်တဲ့ အချက်အလက် အထောက်အထားကြောင့်လည်းပါတယ်လို့ ဒီရင်းမြစ်က ဆိုပါတယ်။

​တရုတ်နဲ့ မြောက်ကိုရီးယားတို့ရဲ့ ခြိမ်းခြောက်မှုကို တွန်းလှန်ရေး ရည်ရွယ်ပြီး ထောက်လှမ်းရေးအချက်အလက်တွေ မျှဝေတဲ့ အထူးအဖွဲ့ Five Eyes ထဲဝင်ဖို့ ဂျပန်အစိုးရအတွင်း ဆွေးနွေးမှုတွေ လုပ်နေပေမယ့် နောက်ကွယ်မှာ ထောက်လှမ်းရေးအချက်အလက်တွေ မျှဝေနေတယ်ဆိုတာ အခုသတင်းက ဖော်ပြနေပါတယ်။

Five Eyes အဖွဲ့မှာ ဩစတေးလျ၊ ဗြိတိန်၊ ကနေဒါ၊ နယူးဇီလန်နဲ့ အမေရိကန်တို့ ပါဝင်ပါတယ်။

ရှင်ကျန်းပြည်နယ်က ဝီဂါနဲ့ အခြား အစ္စလာမ်ဘာသာဝင် လူမျိုးစု အနည်းဆုံး ၁ သန်းလောက်ကို အကျဉ်းစခန်းတွေထဲမှာ ပိတ်လှောင်ထားပြီး တရုတ်ဇာတ်သွင်းနေတယ်လို့ ကုလနဲ့ လူ့အခွင့်အရေးအဖွဲ့တွေ၊ နိုင်ငံတကာမီဒီယာတွေက ကျယ်ကျယ်ပြန့်ပြန့် ဖော်ပြခဲ့ကြပါတယ်။

ဗြိတိန်နဲ့ အမေရိကန်တို့က တရုတ်အစိုးရရဲ့ ဒီလုပ်ရပ်ကို ပြင်းပြင်းထန်ထန် ဝေဖန်ခဲ့ပေမယ့် ဂျပန်ကတော့ အခြေအနေကို အနီးကပ်စောင့်ကြည့်နေတယ်လို့ပဲ ထုတ်ပြန်ပါတယ်။

တရုတ်ဟာ ဂျပန်ရဲ့ အကြီးဆုံး ကုန်သွယ်ရေးမိတ်ဖက်နိုင်ဖြစ်သလို၊ ပြီးခဲ့တဲ့နှစ်တွေအတွင်း နှစ်နိုင်ငံ ဆက်ဆံရေးကလည်း တိုးတက်လာပါတယ်။ ၂၀၂၀ နွေရာသီမှာ တရုတ်သမ္မတ ရှီကျင့်ဖျင့် ဂျပန်နိုင်ငံကို ပထမဆုံး သွားရောက်ဖို့ စီစဉ်ထားပေမယ့်လည်း ကိုဗစ်ကပ်ရောဂါကြောင့် ဒီအစီအစဉ်ကို ရပ်ဆိုင်းခဲ့ရပါတယ်။

EF: Kyodo News