လူအုပ်ကဖျက်ဆီးခဲ့သည့် ဟိန္ဒူဘုရားကျောင်း ပြန်ဆောက်ရန် ပါကစ္စတန်အစိုးရက ရန်ပုံငွေပေးမည်

ဇန်နဝါရီ ၂၊ ၂၀၂၀
M-Media

-အခုတစ်ပတ်အစောပိုင်းက မွတ်စလင်လူအုပ်ရဲ့ ဖျက်ဆီးမှုကို ခံလိုက်ရတဲ့ ဟိန္ဒူဘုရားကျောင်း ပြန်လည်တည်ဆောက်ရေး ပါကစ္စတန်အစိုးရက ရန်ပုံငွေထောက်ပံ့ပေးမယ်လို့ သိရပါတယ်။

နိုင်ငံအနောက်မြောက်ပိုင်း ခိုင်ဘာ ပက်သွန်ခွါပြည်နယ် ကာရက်မြို့မှာ ဗုဒ္ဓဟူးနေ့က Shri Paramhans Ji Maharaj Samadhi ဘုရားကျောင်းကို ဒေသတွင်းက မွတ်စလင်ဘာသာရေးခေါင်းဆောင်တစ်ချို့နဲ့ အမျိုးသားဘာသာစောင့်ရှောက်ရေးဟစ်ကြွေးတဲ့ နိုင်ငံရေးပါတီတစ်ခုက ပါတီဝင်တွေ ဦးဆောင်တဲ့ လူအုပ်က ဖျက်ဆီးခဲ့တာပါ။

ဘေးနားကအိမ်ကိုဝယ်ယူပြီး ဘုရားကျောင်းတိုးချဲ့​ဆောက်လုပ်ဖို့ စီစဉ်မှုကို ဒေသခံတွေက မကျေနပ်ရာကနေ ဒီလို တိုက်ခိုက်ဖျက်ဆီးမှု ဖြစ်ခဲ့တာလို့ ရဲတပ်ဖွဲ့က ပြောပါတယ်။ ပါကစ္စတန် သာသနာရေးဝန်ကြီးနဲ့ ဝန်ကြီးချုပ်က ဒီလုပ်ရပ်ကို ပြင်းပြင်းထန်ထန် ရှုတ်ချခဲ့ပါတယ်။ ရဲတပ်ဖွဲ့ကလည်း မွတ်စလင်ဘာသာရေးခေါင်းဆောင်တွေအပါအ၀င် တိုက်ခိုက်မှုနဲ့ဆက်စပ်ပြီး အနည်းဆုံး လူ ၅၀ လောက်ကို ဖမ်းဆီးထားပါတယ်။

အမေရိကန်ရဲ့ ဘာသာရေးလွတ်လပ်ခွင့်ချိုးဖောက်တဲ့ နိုင်ငံတွေစာရင်းမှာ မြန်မာနိုင်ငံနည်းတူ ပါကစ္စတန်လည်း ပါဝင်ပါတယ်။

ဖျက်ဆီးခံလိုက်ရတဲ့ ဘုရားကျောင်း ပြန်လည်ဆောက်လုပ်ရေးအတွက် ရန်ပုံငွေ ထောက်ပံ့သွားမယ်လို့ ပြည်နယ်အစိုးရက ထုတ်ပြန်ခဲ့ပါတယ်။

“တိုက်ခိုက်မှုကြောင့် ပျက်ဆီးဆုံးရှုံးမှုတွေအတွက် ကျွန်တော်တို့ ၀မ်းနည်း စိတ်မကောင်း ဖြစ်ရပါတယ်။ ဘုရားကျောင်းနဲ့ ဘေးနားကအိမ်ကို ပြန်ဆောက်ဖို့အတွက် ပြည်နယ်ဝန်ကြီးချုပ်က အမိန့်ပေးခဲ့ပါတယ်” လို့ ခိုင်ဘာ ပက်သွန်ခွါပြည်နယ် ပြန်ကြားရေးဝန်ကြီး ကမ်မရန် ဘန်ဂက်ရှ်က ပြောကြားခဲ့ပါတယ်။

ကာရက်မြို့က ဟိန္ဒူအသိုင်းအဝိုင်းဟာ ဘုရားကျောင်းဆောက်လုပ်ရေးလုပ်ငန်းကို မကြာခင် ပြန်စမှာဖြစ်ပြီး အစိုးရက ဘုရားကျောင်းလုံခြုံရေးကို တာဝန်ယူသွားမယ်လို့လည်း ဝန်ကြီးက ထည့်သွင်းပြောဆိုခဲ့ပါတယ်။

ဒီဟိန္ဒူဘုရားကျောင်းကို ဖျက်ဆီးဖို့ အဓိကလှုံ့ဆော်သူဟာ ကာရက်မြို့က မွတ်စလင်ဘာသာရေးခေါင်းဆောင် မွလ္လာ ရှရီးဖ်ဖြစ်ပြီး ရဲတပ်ဖွဲ့က သူ့ကို ဖမ်းထားပါတယ်။ အမျိုးဘာသာသာသနာ စောင့်ရှောက်ရေးပါတီ ဂျာမီအသ် အိုလမာ-အီ-အစ္စလာမ် (JUI-F) ရဲ့ ခေါင်းဆောင် မွလ္လာ မရီဇာ အကီန်းကိုလည်း ရဲတပ်ဖွဲ့က ရှာဖွေနေပါတယ်။

ဘုရားကျောင်း ဖျက်ဆီးခံရမှုနဲ့ပတ်သက်ပြီး အသေးစိတ်အစီရင်ခံစာ တင်သွင်းဖို့အတွက် ပါကစ္စတန်တရားရုံးချုပ်က အုပ်ချုပ်ရေးအာဏာပိုင်တွေကို အမိန့်ပေးထားပါတယ်။

Ref: Aljazeera