ပုံပြောင်းကိုဗစ် ပိုမိုပြန့်နှံ့လာမှုကြောင့် ယူကေတွင် တစ်နိုင်ငံလုံး လော့ဒေါင်းပြန်လုပ်

ဇန်နဝါရီ ၅၊ ၂၀၂၁
M-Media

-ပုံပြောင်း ကိုရိုနာဗိုင်းရပ်စ် ကူးစက်ပြန့်နှံ့မှုဟာ အလွန်အမင်း မြန်ဆန်လာတဲ့အတွက် ယူကေမှာ မနေ့ကစတင်ပြီး လော့ဒေါင်းပြန်လုပ်လိုက်ပါတယ်။

ယူကေတစ်ဝှမ်း Pfizer-BioNTech နဲ့ AstraZeneca ကိုဗစ်ကာကွယ်ဆေးတွေကို ထိုးပေးနေပေမယ့် လူအများအပြားဆီ မရောက်သေးပါဘူး။

ဝန်ကြီးချုပ် ဘောရစ်ဂျွန်ဆင်က​ ပုံပြောင်းကိုဗစ်က ကျန်းမာရေးစနစ်ကို ခြိမ်းခြောက်လာတဲ့အတွက် တစ်နိုင်ငံလုံးကို လော့ဒေါင်းလုပ်ဖို့ လိုအပ်လာတယ်လို့ မနေ့က ရုပ်သံမိန့်ခွန်းမှာ ထည့်သွင်း ပြောကြားခဲ့ပါတယ်။

“တစ်နိုင်ငံလုံးကို လော့ဒေါင်း လုပ်ကိုလုပ်ရပါတော့မယ်။ ဒါမှသာလျှင် ပုံပြောင်းကိုဗစ်ကို ထိန်းနိုင်မှာပါ။ လူတွေအားလုံး အိမ်ထဲမှာပဲနေဖို့ အစိုးရက ညွှန်ကြားမှာ ဖြစ်ပါတယ်”

အခု လော့ဒေါင်းအသစ်မှာ ​စျေးဝယ်တာ၊ ကျန်းမာရေးလုပ်တာနဲ့ အခြား အခြေအနေတစ်ချို့ကလွဲပြီး လူတွေအားလုံး အိမ်ထဲမှာ နေရမှာဖြစ်သလို၊ ကျောင်းတွေ၊ အများပြည်သူနဲ့ သက်ဆိုင်တဲ့နေရာတွေလည်း ပိတ်ထားမှာ ဖြစ်ပါတယ်။

ကာကွယ်ဆေးထိုးမှု စီစဉ်ထားတဲ့အတိုင်းဖြစ်ပြီး၊ ကူးစက်မှု၊ သေဆုံးမှုတွေ လျော့လာရင် ဖေဖော်ဝါရီလ အလယ်ပိုင်းလောက်မှာ လော့ဒေါင်း ပြန်ဖွင့်ပေးနိုင်လိမ့်မယ်လို့ မျှော်လင့်ကြောင်း ​ဝန်ကြီးချုပ် ဂျွန်ဆင်က ထည့်သွင်း ပြောဆိုခဲ့ပါတယ်။

Ref: Aljazeera