၂၀၀၈ မွမ်ဘိုင်းအကြမ်းဖက်မှု စီစဉ်သူတစ်ဦးကို ပါကစ္စတန်က ထောင်ချ

ဇန်နဝါရီ ၉၊ ၂၀၂၁
M-Media

-၂၀၀၈ ခုနှဝစ် မွန်ဘိုင်းအကြမ်းဖက်မှုကို နောက်ကွယ်က ကြိုးကိုင်သူလို့ အိန္ဒိယနဲ့ အမေရိကန်တို့က စွပ်စွဲထားသူတစ်ဦးကို ပါကစ္စတန်က အကြမ်းဖက်မှုအတွက် ငွေကြေးထောက်ပံ့မှုနဲ့ ​ထောင်ဒဏ် ၅ နှစ် ချမှတ်လိုက်ပါတယ်။

ဇာကီအွရ်ရဟ်မန် လက်ခ်ဗီဆိုသူဖြစ်ပြီး လက်နက်ကိုင်အဖွဲ့ လက်ခ်ရှာအီတိုင်ဘာ (LeT) က အကြီးတန်း တာဝန်ရှိသူတစ်ဦးပါ။

လူပေါင်း ၁၆၀ လောက်သေဆုံးခဲ့တဲ့ မွန်ဘိုင်းဟိုတယ် အကြမ်းဖက်တိုက်ခိုက်မှုကို LeT အဖွဲ့က လုပ်ဆောင်တာဖြစ်ပြီး လက်ခ်ဗီကို တရားစွဲဖို့အတွက် အိန္ဒိယက ပါကစ္စတန်ကို အရင်ကတည်းက တိုက်တွန်းခဲ့တာပါ။

၂၀၀၈ ခုနှစ်မှာ လက်ခ်ဗီကို ပါကစ္စတန်က ဖမ်းဆီးခဲ့ပေမယ့် တရားစွဲဖို့ လုံလောက်တဲ့ သက်သေအထောက်အထား မရှိတဲ့အတွက် နောက်ပိုင်းမှာ အာခံနဲ့ ပြန်လွှတ်ပေးခဲ့ပါတယ်။ ဒါပေမယ့် အကြမ်းဖက်ဝါဒအပေါ် ငွေကြေးထောက်ပံ့မှုနဲ့ မနေ့က ပြန်လည်ဖမ်းဆီးကာ ဒီကနေ့မှာ ထောင်ဒဏ် ၅ နှစ်နဲ့ ဒဏ်ငွေ ရူပီးတစ်သိန်း ချမှတ်ခဲ့ပါတယ်။

အမေရိကန်က ပါကစ္စတန်ရဲ့ ဆောင်ရွက်မှုကို ကြိုဆိုခဲ့ပြီ မွမ်ဘိုင်းအကြမ်းဖက်မှုအတွက်ပါ လက်ခ်ဗီကို တရားစွဲဖို့ တိုက်တွန်းခဲ့ပါတယ်။

ကုလလုံခြုံရေးရေးကောင်စီ ပိတ်ဆို့အရေးယူရေး ကော်မတီက လက်ခ်ဗီဟာ ချေချင်းညာ၊ ဘော့စနီးယား ဟာဇီဂိုဗီနာ၊ အီရတ်နဲ့ အာဖဂန်နစ္စတန်တို့အပါအဝင် နိုင်ငံတော်တော်များများက တိုက်ခိုက်မှုတွေမှာ ပါဝင်ပတ်သက်ခဲ့တယ်လို့ ပြောကြားထားပါတယ်။

မွမ်ဘိုင်းတိုက်ခိုက်မှုကို ကြိုးကိုင်စီစဉ်ခဲ့သူတွေထဲမှာ ပါဝင်တယ်လို့ အိန္ဒိယက ပြောကြားထားတဲ့ ဟာဖစ်ဇ် ဆအီးဒ်ကို ပါကစ္စတန်တရားရုံးက အကြမ်းဖက်ဝါဒ ငွေကြေးထောက်ပံ့မှုနဲ့ ပြီးခဲ့တဲ့နှစ်မှာ ထောင်ချခဲ့ပါတယ်။

စအီးဒ်ကတော့ မွမ်ဘိုင်းတိုက်ခိုက်မှုမှာ မပါဝင်ခဲ့ဘူးလို့ ငြင်းဆိုပါတယ်။

Ref: Reuters