ဇန်နဝါရီ ၁၃၊ ၂၀၂၁
M-Media

လီဗာပူးလ်နှင့်ပွဲ ကြီးကျယ်သည့်အခိုက်အတန့်ဖြစ်မည်ဟု ပေါ့ဘာပြော

လာမယ့်တနင်္ဂနွေနေ့ လီဗာပူးလ်နဲ့ ပရီးမီးယားလိဂ်ပွဲဟာ ‘ကြီးကျယ်တဲ့အခိုက်အတန့်တစ်ခု’ ဖြစ်လာမှာဖြစ်ပြီး ဒီအတွက် စိတ်တည်တည်ငြိမ်ငြိမ်ထားကြဖို့ မန်ယူကွင်းလယ်လူ ပေါလ်ပေါ့ဘာက အသင်းဖော်တွေကို တိုက်တွန်းလိုက်ပါတယ်။

ပေါ့ဘာရဲ့သွင်းဂိုးနဲ့ မနေ့က ဘန်လေကို အနိုင်ရခဲ့တဲ့မန်ယူဟာ လီဗာပူးလ်ကို ၃ မှတ်ဖြတ်ပြီး အမှတ်ပေးဇယားကို ဦးဆောင်နိုင်ခဲ့ကာ ဒါဟာ ၈ နှစ်အတွင်း ပထမဆုံးပါ။

လာမယ့် လီဗာပူးလ်နဲ့ပွဲဟာ ကောင်းမွန်တဲ့ပွဲတစ်ပွဲဖြစ်လိမ့်မယ်လို့လည်း ပေါ့ဘာက ထည့်သွင်းပြောဆိုခဲ့ပါတယ်။

နည်းပြ ဆိုးလ်ရှားကလည်း ပြီးခဲ့တဲ့ ၃ နှစ်အတွင်း မယုံနိုင်စရာခြေစွမ်းတွေကိုပြခဲ့တဲ့ လက်ရှိချန်ပီယံ လီဗာပူးလ်နဲ့ပွဲအတွက် အဆင်သင့်ဖြစ်နေပြီလို့ ဆိုပါတယ်။

ပရီးမီးယားလိဂ်တွင် ကိုဗစ်အနားပေးမှု ရှိမည်မဟုတ်

အသင်းတစ်ချို့က ရာသီဝက် ၃ ပတ် အားလပ်ရက်ပေးဖို့ တောင်းဆိုတာကို လိုက်လျောမှာမဟုတ်ဘူးလို့ ပရီးမီးယားလိဂ် တာဝန်ရှိသူ​တွေကပြောပါတယ်။

အင်္ဂလန်မှာ ကိုဗစ်ကူးစက်မှုမြင့်လာတာကြောင့် လော့ဒေါင်းချထားသလို ပရီးမီးယားလိဂ်အသင်းတစ်ချို့မှာလည်း ကိုဗစ်ကူးစက်မှုအရေအတွက် များလာပါတယ်။

ဇွန်လမှာ ဥရောပချန်ဖလားပြိုင်ပွဲ ရှိတဲ့အတွက် ရာသီဝက် ၃ ပတ်အနားပေးလိုက်ရင် ရာသီအဆုံးသတ်ဖို့ ခက်ခဲမှာကို တာဝန်ရှိသူတွေက ထောက်ပြပါတယ်။ အစိုးရက ရပ်ခိုင်းမှသာ ရပ်သွားမယ်လို့ ဆိုပါတယ်။

အင်္ဂလန်ဘောလုံးအဖွဲ့ချုပ် FA က ကိုဗစ်ထိန်းချုပ်ရေး တင်းတင်းကြပ်ကြပ်ကိုင်တွယ်ရမယ့် စည်းမျဉ်းသစ်ကို ကလပ်အသင်းတွေထံ ပေးပို့ထားပါတယ်။

Ref: BBC