အိန္ဒိယတွင် ကိုဗစ်ကာကွယ်ဆေးထိုးမှု စတင်

ဇန်နဝါရီ ၁၇၊ ၂၀၂၁
M-Media

-နိုင်ငံတစ်ဝှမ်း ကိုဗစ်ကာကွယ်ဆေးထိုးနှံမှုကို အိန္ဒိယက မနေ့မှာ စတင်လိုက်ပြီး ကမ္ဘာအကြီးဆုံး ကိုဗစ်ကာကွယ်ဆေးထိုးမှုထဲက တစ်ခုလည်း ဖြစ်ပါတယ်။

ကိုဗစ်တိုက်ဖျက်ရေး ရှေ့တန်းကနေ ပါဝင်ဆောင်ရွက်နေတဲ့ သူနာပြုတွေ၊ ဆရာဝန်တွေနဲ့ အခြားကျန်းမာရေးဝန်ထမ်းတွေကို ဦးစားပေး ထိုးသွားမှာပါ။

ဝန်ကြီးချုပ် နရန်ဒရာမိုဒီက ဒီကာကွယ်ဆေးထိုးမှုဟာ အိန္ဒိယရဲ့လုပ်နိုင်စွမ်းကို ဖော်ပြတဲ့ ဆောင်ရွက်မှုတစ်ခုဖြစ်ပြီး ဆေးရဲ့ အန္တရာယ်ကင်းမှုနဲ့ပတ်သက်တဲ့ ကောလဟာလတွေကို မယုံကြဖို့ အွန်လိုင်းမိန့်ခွန်းမှာ ထည့်သွင်းပြောကြားခဲ့ပါတယ်။

“ကာကွယ်ဆေးထိုးပြီးသွားရင်လည်း နမော်နမဲ့မနေပါနဲ့။ နှားခေါင်းစည်းမချွတ်ပါနဲ့။ ခပ်ခွာခွာနေထိုင်ဖို့လည်း မမေ့ပါနဲ့”

အိန္ဒိယဟာ ယူကေထုတ် ကိုဗစ်ကာကွယ်ဆေး AstraZeneca နဲ့ ပြည်တွင်းကုမ္ပဏီ Bharat Biotech က ထုတ်လုပ်တဲ့ ကိုဗစ်ကာကွယ်ဆေးတို့ကို အရေးပေါ်အသုံးပြုခွင့် ပေးထားပြီး နိုင်ငံတစ်ဝှမ်းက မြို့ကြီးတွေကို ပြီးခဲ့တဲ့တစ်ပတ်က အလုံးရေ ၁၆.၅ သန်း ပို့ဆောင်ခဲ့ပါတယ်။

Ref: Aljazeera