အာဖဂန်တွင် အမျိုးသမီးတရားသူကြီး ၂ ဦး လုပ်ကြံသတ်ဖြတ်ခံရ

ဇန်နဝါရီ ၁၈၊ ၂၀၂၁
M-Media

-အာဖဂန်နစ္စတန် တရားရုံးချုပ်မှာ တာဝန်ထမ်းဆောင်နေတဲ့ အမျိုးသမီး တရားသူကြီးနှစ်ဦး မနေ့က မြို့တော် ကဘူးလ်မှာ လုပ်ကြံသတ်ဖြတ်ခံလိုက်ရပါတယ်။

ရုံးတက်ဖို့ ကားမောင်းလာစဉ်မှာ အမည်မသိ သေနတ်သမားတွေက အကြမ်းဖက်တိုက်ခိုက်ခဲ့တယ်လို့ တရားရုံးချုပ် ပြောရေးဆိုခွင့်ရှိသူ ဖာဟင် ကာဝင်က ပြောပါတယ်။

တိုက်ခိုက်မှုကို ဘယ်အဖွဲ့လုပ်တယ်ဆိုတာ အတိအကျ မသိရသေးပါဘူး။ တာလီဘန်လက်နက်ကိုင်အဖွဲ့ရဲ့ ပြောရေးဆိုခွင့်ရှိသူ ဇဘီဟွလ္လာဟ် မူဂျာဟစ်က သူတို့လုပ်တာမဟုတ်ဘူးလို့ ငြင်းဆိုပါတယ်။

အာဖဂန်နစ္စတန်တရားရုံးချုပ်မှာ အမျိုးသမီးတရားသူကြီး ၂၀၀ ကျော် တာဝန်ထမ်းဆောင်နေတာပါ။

၂၀၁၇ ခုနှစ်က တရားရုံးချုပ်အဆောက်အဦး အသေခံကားဗုံးခွဲတိုက်ခိုက်ခံရပြီး အနည်းဆုံး ဝန်ထမ်း ၂၀ သေဆုံးခဲ့ကာ ၄၁ ဦး ဒဏ်ရာရရှိခဲ့ပါတယ်။

တာလီဘန်နဲ့ အာဖဂန်တို့အစိုးရတို့အကြား ငြိမ်းချမ်းရေး ဆွေးနွေးနေပေမယ့် နိုင်ငံတစ်ဝှမ်း တိုက်ခိုက်မှုတွေ မြင့်တက်နေပြီး ပြီးခဲ့တဲ့ လအနည်းငယ်အတွင်း နိုင်ငံရေးသမား၊ ဂျာနယ်လစ်၊ တက်ကြွလှုပ်ရှားသူတွေ၊ ဆရာဝန်တွေ၊ အစိုးရရှေ့နေတွေ အပါအဝင် ထင်ရှားသူတော်တော်များများ လုပ်ကြံသတ်ဖြတ်ခံခဲ့ရပါတယ်။

အာဖဂန်နစ္စတန်က အမေရိကန်တပ်ဖွဲ့ရဲ့ ပြောရေးဆိုခွင့်ရှိသူ ဗိုလ်မှူးကြီး ဆန်နီ လက်ဂက်က ဒီတိုက်ခိုက်မှုတွေကို တာလီဘန်အဖွဲ့က ပြုလုပ်တာလို့ အခုလအစောပိုင်းမှာ စွပ်စွဲပြောဆိုခဲ့ပါတယ်။

Ref: Aljazeera