တာလီဘန်ကိစ္စ ပြန်သုံးသပ်မည့် ဘိုင်ဒန်အစိုးရကို အာဖဂန်နစ္စတန် ကြိုဆို

ဇန်နဝါရီ ၂၄၊ ၂၀၂၁
M-Media

-ထရမ့်လက်ထက် တာလီဘန်နဲ့ ရရှိထားတဲ့ ငြိမ်းချမ်းရေးသဘောတူညီချက် ပြန်လည်ဆန်းစစ်သွားမယ်ဆိုတဲ့ ကန်အစိုးရသစ်ရဲ့ အစီအစဉ်ကို ကြိုဆိုတယ်လို့ အာဖဂန်အစိုးရက ပြောပါတယ်။

ထရမ့်အစိုးရနဲ့ တာလီဘန်တို့ လျှို့ဝှက်ဆွေးနွေးပြီး ၂၀၂၀ ခုနှစ် ဖေဖော်ဝါရီလမှာ ရရှိခဲ့တဲ့ ဒီသဘောတူညီချက်မှာ အမေရိကန်တပ်ဖွဲ့တွေကို ၂၀၂၁ ခုနှစ် မေလ နောက်ဆုံးထားကာ အာဖဂန်ကနေ ဆုတ်ခွာပေးမယ်ဆိုတဲ့အချက် ပါဝင်ပြီး အပြန်အလှန်အားဖြင့် တာလီဘန်က တိုက်ခိုက်မှုတွေလျှော့ချကာ အာဖဂန်အစိုးရနဲ့ ဆွေးနွေးရမှာ ဖြစ်ပါတယ်။

ဒီသဘောတူညီချက်ကြောင့် အာဖဂန်အစိုးရဟာ တာလီဘန်အကျဉ်းသား ထောင်ချီ လွှတ်ပေးခဲ့ရပြီး နိုင်ငံတစ်ဝှမ်း တိုက်ခိုက်မှုတွေလည်း ပြန်လည်မြင့်တက်လာတဲ့အတွက်အာဖဂန်အစိုးရနဲ့ အမေရိကန်တို့အကြား မကျေမလည်မှုတွေ ရှိလာပါတယ်။

သမ္မတသစ်ဘိုင်ဒန်ရဲ့ နိုင်ငံတော်လုံးခြုံရေးအကြံပေး ဂျိတ် ဆူလီဘန်က ဒီသဘောတူညီချက်ကို ပြန်လည်သုံးသပ်သွားမယ်လို့ အာဖဂန်အစိုးရကို မနေ့မှာ ပြောကြားခဲ့ပါတယ်။

“၂၀၂၀ ဖေဖော်ဝါရီက အမေရိကန်-တာလီဘန် သဘောတူညီချက်ကို ပြန်လည်သုံးသပ်မယ်ဆိုတဲ့ အမေရိကန်အစိုးရရဲ့ အစီအစဉ်ကို ကျွန်တော်တို့ ကြိုဆိုပါတယ်။ ဒီသဘောတူညီချက်ဟာ အာဖဂန်က အကြမ်းဖက်မှုတွေ အဆုံးသတ်ရေးဆိုတဲ့ ရည်ရွယ်ချက်ကို အထောက်အကူ မဖြစ်သလို အာဖဂန်တွေအလိုရှိတဲ့ အပစ်ရပ်ရေးကိုလည်း မဆောင်ကျဉ်းပေးနိုင်ပါဘူး။ တာလီဘန်တွေဟာ ကတိအတိုင်း မဆောင်ရွက်ပါဘူး” လို့ အာဖဂန်အစိုးရရဲ့ ဒုတိယပြည်ထဲရေးဝန်ကြီး ဆာဒစ် ဆာဒစ်ကီက ပြောကြားခဲ့ပါတယ်။

မနေ့က အမေရိကန်အစိုးရသစ်နဲ့ ဆွေးနွေးမှုအတွင်း အပစ်ရပ်ရေး၊ ငြိမ်းချမ်းရေး၊ ဒီမိုကရက်တစ် အာဖဂန်နစ္စတန်နိုင်ငံဖြစ်လာရေး၊ လွန်ခဲ့တဲ့ နှစ် ၂၀ အတွင်း ရရှိခဲ့တဲ့ တိုးတက်မှုတွေကို ထိန်းသိမ်းရေး ဆွေးနွေးခဲ့ပြီး၊ လုံခြုံရေး၊ ငြိမ်းချမ်းရေး၊ အကြမ်းဖက်တိုက်ဖျက်ရေး၊ ဒေသတွင်းစေ့စပ်ဆွေးနွေးရေး စတဲ့ကိစ္စတွေကို အမေရိန်ကနဲ့ ပူးပေါင်းဆောင်ရွက်လိုကြောင်း ပြောကြားခဲ့တယ်လိုအာဖဂန်အစိုးရ တာဝန်ရှိသူတွေက ထုတ်ပြန်ပါတယ်။

တာလီဘန်ကတော့ အစိုးရဟောင်းရဲ့ သဘောတူညီချက်အတိုင်း ကန်အစိုးရသစ်က လိုက်နာဆောင်ရွက်လိမ့်မယ်လို့ မျှော်လင့်ကြောင်း တုန့်ပြန်ပြောကြားခဲ့ပါတယ်။

ဒီသဘောတူညီချက်ရပြီးနောက်ပိုင်း တာလီဘန်ဟာ အမေရိကန်တပ်ဖွဲ့တွေအပေါ် တိုက်ခိုက်မှုတွေ မလုပ်တော့ဘူးလို့ ထရမ့်အစိုးရက ထုတ်ပြန်ခဲ့ပါတယ်။

Ref : Arab News