ဦးနှောက်ထဲတွင် ကိုဗစ်ပိုးပုန်းအောင်းပြီး ဒုက္ခပြန်ပေးနိုင်ဟု သုတသေနတစ်ခုတွင် တွေ့ရှိ

ဇန်နဝါရီ ၂၄၊ ၂၀၂၁
M-Media

-ကိုဗစ်ပိုးဟာ ကူးစက်သူတွေရဲ့ ဦးနှောက်ထဲမှာ ပုန်းအောင်းနေပြီး သက်သာလာတဲ့အချိန်မှာ ဒီပိုးက ပြန်လည်ပြန့်နှံ့ကာ ကိုဗစ်ပြန်ဖြစ်နိုင်သလို၊ နောက်ဆက်တွဲရောဂါတွေလည်း ဖြစ်နိုင်တယ်လို့ အမေရိကန် လေ့လာမှုတစ်ခုမှာ တွေ့ခဲ့ရပါတယ်။

ဂျော်ဂျီယာတက္ကသိုလ်ကလုပ်တဲ့ အဲဒီလေ့လာမှုကို Viruses ဆိုတဲ့ ဆေးပညာဂျာနယ်မှာ အခုတစ်ပတ်အစောပိုင်းက ဖော်ပြခဲ့တာပါ။

ကြွက်တွေကို အသက်ရှုလမ်းကြောင်းကနေတစ်ဆင့် ပိုးကူးစေပြီး ကုသရာမှာ အဆုတ်ထဲက ကိုဗစ်ပိုးတွေ ကုန်သွားပေမယ့် ဦးနှောက်ထဲရောက်နေတဲ့ ကိုဗစ်ပိုးကြောင့် နောက်ပိုင်းမှာ လက္ခဏာပြန်ပြပြီး သေဆုံးသွားတာကို လေ့လာမှုမှာ တွေ့ခဲ့ရပါတယ်။

ကိုဗစ်ပျောက်တော့မယ့်လူနာတွေမှာ ရုတ်တရက် လက္ခဏာပြန်ပြပြီး ​သေဆုံးသွားရတဲ့ အကြောင်းအရင်းကို ဒီလေ့လာမှုကနေ အဖြေရှာနိုင်မယ်လို့ ပညာရှင်တွေက ယုံကြည်နေကြပါတယ်။

“ဦးနှောက်ဟာ ကိုဗစ်ဗိုင်းရပ်စ် ပုန်းအောင်းတတ်တဲ့ နေရာတစ်ခုပါ။ ဒါ့ကြောင့် ဆိုးရွားတဲ့ နောက်ဆက်တွဲရောဂါတွေ၊ နှလုံးရောဂါ၊ လေဖြတ်တာ၊ အနံ့ပျောက်တာ၊ အရသာပျောက်တာတွေကို တွေ့ရတာပါ။ ဒီရောဂါလက္ခဏာတွေဟာ အဆုပ်ထက် ဦးနှောက်ပိုးဝင်တာနဲ့ ဆိုင်ပါတယ်” လို့ သုတေသနမှာ ပါဝင်ခဲ့တဲ့ မူကက်ရှ် ကူးမားက ပြောကြားခဲ့ပါတယ်။

ကိုဗစ်ပိုးဟာ အခြားခန္ဓာကိုယ်အစိတ်အပိုင်းတွေထက် ဦးနှောက်ထဲမှာ ပုန်းအောင်းနိုင်ချေ ပိုမိုများပြားပြီး အဆုပ်ထဲရောက်တဲ့ပိုးက ၃ ရက်လောက်နေရင် သေသွားတတ်ပေမယ့် ဦးနှောက်ထဲမှာတော့ ၅ ရက်ကနေ ၆ ရက်လောက်အထိ အများအပြား ရှိနေနိုင်သေးတယ်လို့လည်း ဂျော်ဂျီယာတက္ကသိုလ်ရဲ့ လေ့လာမှုမှာ တွေ့ခဲ့ရပါတယ်။

“အသက်ရှူလမ်းကြောင်းဆိုင်ရာကိုပဲ ပိုပြီးအာရုံစိုက်နေတာ မမှန်ဘူးလို့ ကျွန်တော်တို့က မြင်တယ်။ ဦးနှောက်က အဆုပ်၊ နှလုံးနဲ့ အစိတ်အပိုင်းအားလုံးကို ထိန်းချုပ်ထားတာကြောင့် ဦးနှောက်ကို ပိုးရောက်သွားရင် ခန္ဓာကိုယ်က အစိတ်အပိုင်းအားလုံးကို ထိခိုက်နိုင်ပါတယ်” လို့ ကူးမားက ထည့်သွင်းပြောဆိုခဲ့ပါတယ်။

ဦးနှောက်ကိုရောက်သွားတဲ့ကိုဗစ်ပိုး သေသွားရင်တောင် နောက်ပိုင်းမှာ မှတ်ဉာဏ်ချို့ယွင်းတာလို ဦးနှောက်နဲ့အာရုံကြောဆိုင်ရာ ရောဂါတွေ၊ စိတ်ရောဂါ၊ ကိုယ်ခံစွမ်းအားက တိုက်ဖျက်မပေးနိုင်တဲ့ နာတာရှည်ရောဂါတွေ ဖြစ်ပွားနိုင်တယ်လို့လည်း ကူးမားက ဆိုပါတယ်။

“ကြောက်စရာဗျ။ ကိုဗစ်ကူးပြီး ပြန်ကောင်းသွားပြီဆိုရင် အန္တရာယ်ကင်းသွားပြီလို့ လူတော်တော်များများက ထင်ကြတယ်။ ဒါဟာ မမှန်ဘူးဆိုတာ ကျွန်တော်တို့အခု စတွေ့ပါပြီ။ ဘယ်တော့မှ အန္တရာယ်မကင်းတော့ပါဘူး”

Ref: News Week