စီးပွားတိုးတက်ရေး ရည်ရွယ်သည့် ၅ နှစ်စီမံကိန်းသစ်ကို ဆော်ဒီ မိတ်ဆက်

ဇန်နဝါရီ ၂၅၊ ၂၀၂၁
M-Media

-​ဆော်ဒီအာရဗျရဲ့ ဘက်စုံဖွံ့ဖြိုးရေး ‘၂၀၃၀ အမျိုးသားစီမံကိန်း​’ ဖော်ဆောင်ရာမှာ အထောက်အကူဖြစ်စေမယ့် စီးပွားရေးဆိုင်ရာ ၅ နှစ်စီမံကိန်းသစ်ကို ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က မနေ့မှာ မိတ်ဆက်ခဲ့ပါတယ်။

၂၀၂၁ ကနေ ၂၀၂၅ ခုနှစ်အတွင်း အကောင်အထည်ဖော်မယ့် ဒီစီမံကိန်းအရ ဆော်ဒီအစိုးရရဲ့ ရင်းနှီးမြှုပ်နှံမှု ရံပုံငွေအဖွဲ့ (PIF) က ပြည်တွင်းစီးပွားရေး ဖွံ့ဖြိုးတိုးတက်ဖို့အတွက် အနည်းဆုံး ကန်ဒေါ်လာ ဘီလီယံ ၄၀ ရင်းနှီးမြှုပ်နှံသွားမှာ ဖြစ်ပါတယ်။

တိုင်းပြည်စီးပွားရေး ရေနံအပေါ် မှီခိုနေရမှုကို တစ်ဆင့်ချင်းစီ လျှော့ချသွားဖို့ ဆော်ဒီက ကြိုးပမ်းအားထုတ်နေတာပါ။

ရေနံမဟုတ်တဲ့ စီးပွားရေးကဏ္ဍတွေအတွက် ဒေါ်လာ ဘီလီယံ ၂၃၀ လောက် ရင်းနှီးမြှုပ်နှံမှာဖြစ်ကာ အလုပ်အကိုင်ပေါင်း ၁.၈ သန်းလောက် ဖန်တီးပေးနိုင်မယ်လို့ ​​ဘင် ဆလ်မန်က ပြောပါတယ်။

“ဆော်ဒီအာရေဗျအတွက် အရေးပါလာမယ့် လုပ်ငန်းတွေ၊ ရင်းနှီးမြှုပ်နှံမှု စီမံကိန်းတွေကို ဒီနေ့ ကျွန်တော်တို့ မိတ်ဆက်လိုက်တာပါ။ ပုဂ္ဂလိက စီးပွားရေးကဏ္ဍဟာ PIF အတွက် မဟာဗျူဟာကျတဲ့ လုပ်ငန်းလည်း ဖြစ်ပါတယ်”

နိုင်ငံရဲ့​မျှော်မှန်းချက်တွေ အောင်မြင်ရေးနဲ့ အလုံးစုံပြည့်၀တဲ့ ဖွံ့ဖြိုးတိုးတက်မှု ဖော်ဆောင်ရေးမှာ အခု ဗျူဟာသစ်က အဓိကဒေါက်တိုင်တစ်ခု ဖြစ်လာမယ်လို့လည်း ဘင် ဆလ်မန်က ပြောပါတယ်။

စီးပွားရေးကဏ္ဍသစ်တွေထူထောင်တာ၊ ပုဂ္ဂလိကလုပ်ငန်းကို အားပေးတာ၊ PIF ရဲ့ ပုံရိပ်ကို မြှင့်တင်တာ၊ စီးပွားရေးမောင်းနှင်အား ပြည်တွင်းမှာရှိဖို့ အားပေးလုပ်ဆောင်တာ၊ နိုင်ငံခြားတိုင်းပြည်တွေနဲ့ မဟာဗျူဟာမြောက် စီးပွားရေး မိတ်ဖက်ထူထောင်တာ စတာတွေ ဒီစီမံကိန်းမှာ ပါဝင်မှာပါ။

“ခေတ်သစ်လူ့အဖွဲ့အစည်းမှာ ကျွန်တော်တို့တိုင်းပြည်က ရှေ့​ဆောင်ရှေ့ရွက်ဖြစ်ဖို့ ရည်မှန်းထားတယ်။ နိုင်ငံအတွင်း ဖွံ့ဖြိုးတိုးတက်ဖို့နဲ့ စီးပွားရေး မျှခြေရှိဖို့ PIF က ပံ့ပိုးကူညီသွားမှာဖြစ်သလို ကမ္ဘာ့ရင်းနှီးမြှုပ်နှံမှု မိတ်ဖက်အဖွဲ့အစည်းတစ်ခုဖြစ်အောင်လည်း ကြိုးပမ်းအားထုတ်သွားမှာ ဖြစ်ပါတယ်”

ဒီစီမံကိန်းတွေကြောင့် PIF ရဲ့ ရင်းနှီးမြှုပ်နှံမှုဟာ ကန်ဒေါ်လာ ၁ ထရီလီယံ ကျော်လာမှာ ဖြစ်ပါတယ်။

Ref: Arab News