ရာထူးသက်တမ်းပြည့်သွားသည့် ကန်ဒုတိယသမ္မတ နေစရာအိမ်မရှိ ဖြစ်နေ

ဇန်နဝါရီ ၂၈၊ ၂၀၂၁
M-Media

-ရာထူးသက်တမ်း ပြီးဆုံးသွားပြီဖြစ်တဲ့ အမေရိကန်ဒုတိယသမ္မတဟောင်း မိုက်ပန့်စ်ဟာ အတည်တကျ နေစရာအိမ် မရှိဘဲဖြစ်နေတယ်လို့ သိရပါတယ်။

သမ္မတသစ်ကျမ်းကျိန်တဲ့ ဇန်နဝါရီ ၂၀ ရက်နေ့မှာ မိုက်စ်ပန့်စ်ရဲ့ ဒုတိယသမ္မတသက်တမ်းကုန်ဆုံးသွားတာပါ။ ဝါရှင်တန် ရေတပ်စခန်းက ဒုတိယသမ္မတ အိမ်တော်ကနေ ထွက်ခွာလာပြီးနောက် မိုက်ပန့်စ်ဟာ လက်ရှိမှာ နေစရာမရှိသေးပါဘူး။

ဇာတိ အင်ဒီယားနားပြည်နယ်ကအိမ်မှာ နေထိုင်မယ်လို့ နောက်ဆုံးမိန့်ခွန်းမှာ ပြောကြားခဲ့ပေမယ့် မှတ်တမ်းတွေအရ လွန်ခဲ့ ၈ နှစ်အတွင်း မိုက်ပန့်စ်တစ်ယောက် အင်ဒီယားနားပြည်နယ်မှာ နေအိမ်ပိုင်ဆိုင်ထားခြင်း မရှိပါဘူး။

အင်ဒီးယားနား အုပ်ချုပ်ရေးမှူး အဲရစ် ဟိုလ်ကွန့်ဘ် ခေတ္တတည်းခိုရာအဖြစ် အသုံးပြုတဲ့ အိမ်ငယ်လေးတစ်လုံးမှာ မိုက်ပန့်စ်တို့ဇနီးမောင်နှံ လက်ရှိ နေထိုင်နေရတယ်လို့ သတင်းထွက်နေသလို၊ သူနဲ့နီးစပ်တဲ့ ရီပက်ဘလစ်ကန် ပါတီဝင်နှစ်ဦးက မိုက်ပန့်စ်တစ်ယောက် ကိုလံဘတ်စ်မြို့က ညီဖြစ်သူရဲ့အိမ်မှာ နေထိုင်နေတယ်လို့ ဆိုပါတယ်။

ဒုတိယသမ္မတဟောင်း လက်ရှိ​ ဘယ်မှာနေထိုင်လဲဆိုတဲ့သတင်း အတိအကျ မထွက်လာတာဟာ လုံခြုံရေးအခြေအနေအရ ဖြစ်ပါတယ်။ ဇန်နဝါရီ ၆ ရက်နေ့က လွှတ်တော်ကို ထရမ့်ထောက်ခံသူတွေ ဝင်ရောက်စီးနင်းချိန် သမ္မတဘိုင်ဒန်ရဲ့ ရွေးကောက်ပွဲအောင်နိုင်မှုကို အတည်ပြုတဲ့ ပန့်စ်နဲ့ လွှတ်တော်ဥက္ကဌ နန်စီပီလိုစီတို့ကို သတ်ဖြတ်ဖို့အထိ စီးနင်းသူတွေက စီစဉ်ခဲ့တာပါ။

လက်ရှိအချိန်အထိ သူ့ရဲ့လုံခြုံရေးကို စိုးရိမ်နေရဆဲဖြစ်ပြီး အမေရိကန် ထောက်လှမ်းရေးက အနည်းဆုံး နောက်ထပ် ၆ လအထိ ကာကွယ်ပေးမှာဖြစ်ပါတယ်။

Ref: The Independent