ပါလက်စတိုင်းများကို ကူညီမှုအား ယူအေအီးက သိသိသာသာ လျှော့ချ

ဖေဖော်ဝါရီ ၆၊ ၂၀၂၁
M-Media

-အစ္စရေးရဲ့ကျူးကျော်မှုတွေကြောင့် ဒုက္ခရောက်နေတဲ့ ပါလက်စတိုင်းပြည်သူတွေအပေါ် ကူညီမှုကို အရပ်စော်ဘွားများပြည်ထောင်စု (ယူအေအီး) က သိသိသာသာ လျှော့ချလိုက်ပါတယ်။

အတိဒုက္ခရောက်နေတဲ့ ပါလက်စတိုင်းပြည်သူ ၅.၇ သန်းလောက်ကို ကုလလက်အောက်ခံ UNRWA အဖွဲ့က ဦးစီးဦးဆောင်ပြု ကူညီနေတာ ဖြစ်ပါတယ်။ ယူအေအီးဟာ ၂၀၁၈ ခုနှစ်နဲ့ ၂၀၁၉ ခုနှစ်တွေမှာ UNRWA ကို ကန်ဒေါ်လာ ၅၁.၈ သန်း လှူဒါန်းခဲ့ပေမယ့် ၂၀၂၀ ခုနှစ်မှာတော့ ဒေါ်လာ ၁ သန်းသာ ရှိပါတော့တယ်။

“၂၀၂၁ ခုနှစ်မှာ အရင်တုန်းကအတိုင်း ပြန်လည်ကူညီဖို့ ကျွန်တော်တို့ မျှော်လင့်ပါတယ်” လို့ အေဂျင်စီရဲ့ ပြောရေးဆိုခွင့်ရှိသူ ဆာမီ မာရှာရှာက ပြောပါတယ်။

ဒီကိစ္စနဲ့ပတ်သက်ပြီး ယူအေအီးဖက်က ထုတ်ပြန်တာမျိုး မရှိသေးပါဘူး။

ပြီးခဲ့တဲ့နှစ်အတွင်း အာရပ်နဲ့ မွတ်စလင်ကမ္ဘာက အစ္စရေးနဲ့ သံတမန်ဆက်ဆံရေးထူထောင်တဲ့ နိုင်ငံ ၄ နိုင်ငံထဲမှာ ယူအေအီးလည်း ပါဝင်ပါတယ်။ ပါလက်စတိုင်းခေါင်းဆောင်တွေနဲ့ ပြည်သူတွေကတော့ ဒီလုပ်ရပ်ကို ပြင်းပြင်းထန်ထန် ရှုတ်ချခဲ့ပါတယ်။

သမ္မတထရမ့်လက်ထက် အမေရိကန်ဟာ UNRWA ကို ထောက်ပံ့မှု လျှော့ချခဲ့ပြီး လက်ရှိသမ္မတ ဘိုင်ဒန်ကတော့ ပုံမှန်အတိုင်း ပြန်လည်ထောက်ပံ့သွားမယ်လို့ ပြောကြားထားပါတယ်။ အမေရိကန်ဟာ UNRWA ကို တစ်နှစ်ကို ပုံမှန် ကန်ဒေါ်လာ သန်း ၃၀၀ ကျော်လောက် ထောက်ပံ့တာ ဖြစ်ပါတယ်။

Ref: Aljazeera