စစ်တပ်ပိုင်လုပ်ငန်းနှင့် ဆက်ဆံမှု ရပ်ဆိုင်းမည်ဟု စင်ကာပူ ထိပ်တန်းစီးပွားရေးလုပ်ငန်းရှင်ပြော

ဖေဖော်ဝါရီ ၉၊ ၂၀၂၁
M-Media

-မြန်မာစစ်တပ်နဲ့ ဆက်နွယ်နေတဲ့ ​ဆေးလိပ်လုပ်ငန်းမှာ ရင်းနှီးမြှုပ်နှံထားတာတွေကို ပြန်ထုတ်တော့မယ်လို့ စင်ကာပူ ထိပ်တန်း စီးပွားရေးလုပ်ငန်းရှင် လင်ကာလင်က ပြောကြားလိုက်ပါတယ်။

ဟောင်ကောင်အခြေစိုက် ဂိမ်းပစ္စည်းကုမ္ပဏီ Razer ကို ပူးတွဲတည်ထောင်ပြီး လက်ရှိဒါရိုက်တာလည်းဖြစ်တဲ့ လင်ဟာ မြန်မာနိုင်ငံအခြေစိုက် ဆေးလိပ်လုပ်ငန်း Virginia Tobacco မှာ စင်ကာပူကုမ္ပဏီ RMH Singapore Pte Ltd ကနေတစ်ဆင့် ရှယ်ယာအနည်းငယ် ဝင်ထားတာပါ။

Virginia Tobacco ကုမ္ပဏီကို RMH Singapore Pte Ltd က ရှယ်ယာ ၄၉ ရာခိုင်နှုန်း၊ မြန်မာစစ်တပ်ပိုင် စီးပွားရေးလုပ်ငန်း ‘စီးပွားရေးဦးပိုင် လီမိတက်’ က ၅၁ ရာခိုင်နှုန်း ပိုင်ဆိုင်တာ ဖြစ်ပါတယ်။

အာဏာသိမ်းစစ်တပ်နဲ့ စီပွားရေးဆောင်ရွက်မှု ရပ်ဆိုင်းဖို့ တောင်းဆိုမှုတွေ ရှိလာပြီးတဲ့နောက် လင်က Virginia Tobacco က နေ သူ့ရှယ်ယာတွေ ပြန်ထုတ်တော့မှာဖြစ်ကြောင်း​ ပြောကြားခဲ့ပါတယ်။

“လတ်တလော မြန်မာနိုင်ငံမှာ ဖြစ်ပျက်နေတာတွေကြောင့် ကျွန်တော် တော်တော်လေး စိုးရိမ်ပူပန်လာတယ်”

RMH မှာ ၃ ပုံ ၁ ပုံပါထားတဲ့ သူ့ရဲ့ရှယ်ယာတွေ ပြန်ထုတ်ဖို့ နည်းလမ်းရှားသွားမယ်လို့ လင်က ထည့်သွင်းပြောဆိုခဲ့ပါတယ်။

ဖေဖော်ဝါရီ ၁ ရက်နေ့က စစ်အာဏာသိမ်းမှု မြန်မာနိုင်ငံမှာ ဖြစ်ပွားပြီးတဲ့နောက် နိုင်ငံကာအသိုင်းအ​ဝိုင်းဟာ စစ်တပ်ရဲ့ စီးပွားရေးလုပ်ငန်းတွေအပေါ် ပိုမိုအာရုံစိုက်လာပြီး ဒီလုပ်ငန်းတွေနဲ့ ပူးပေါင်းထားတဲ့ နိုင်ငံကာကုမ္ပဏီတွေကိုလည်း အဆက်အသွယ်ဖြတ်ဖို့ တိုက်တွန်းတာတွေ ရှိလာပါတယ်။

ဂျပန် ဘီယာကုမ္ပဏီ Kirin Holdings က ဦးပိုင်နဲ့ ပူးပေါင်းဆောင်ရွက်မှုကို ပြီးခဲ့တဲ့ တစ်ပတ်မှာ ရပ်ဆိုင်းခဲ့ပါတယ်။

စီးပွားရေးဦးပိုင် လိမိတက်ဟာ ကျောက်စိမ်း၊ ရေနံ၊ သဘာ၀ဓာတ်ငွေ့၊ ဘဏ်လုပ်ငန်းအပါအဝင် မြန်မာနိုင်ငံက ထိပ်တန်း စီးပွားရေးလုပ်ငန်းတော်တော်များများကို လုပ်ကိုင်နေပြီး ကာကွယ်ရေးဦးစီးချုပ် ဗိုလ်ချုပ်မှုးကြီး မင်းအောင်လှိုင်နဲ့ ထိပ်တန်း ဗိုလ်ချုပ်တွေက ချုပ်ကိုင်ထားတာ ဖြစ်ပါတယ်။

ပြီးခဲ့တဲ့နှစ်တွေအတွင်း မြန်မာနိုင်ငံမှာ အဓိကရင်းနှီးမြှုပ်နှံတဲ့ နိုင်ငံတွေထဲမှာ စင်ကာပူလည်း ပါဝင်ပါတယ်။

Ref: The Star