ကိုဗစ်ကာကွယ်ဆေး ကောလဟာလများကို Facebook တင်းတင်းကြပ်ကြပ် ကိုင်တွယ်မည်

ဖေဖော်ဝါရီ ၉၊ ၂၀၂၁
M-Media

-ကိုဗစ်ကာကွယ်​ဆေးနဲ့ပတ်သက်ပြီး သတင်းတု၊ သတင်းမှားဖြန့်နေတဲ့ အကောင့်တွေ၊ပေ့ချ်တွေကို တင်းတင်းကြပ်ကြပ် ကိုင်တွယ်ထိန်းချုပ်သွားမယ်လို့ Facebook က ပြောကြားလိုက်ပါတယ်။

ကာကွယ်ဆေးဟာ လူလုပ်ထားတာဖြစ်တဲ့အတွက် ကာကွယ်ဆေးထိုးတာထက် ရောဂါကူးတာက ပိုကောင်းတယ်၊ ကာကွယ်ဆေးထိုးတာ အန္တရာယ်ရှိတယ်၊ အသိဉာဏ် ချို့ယွင်းနိုင်တယ် စတဲ့ ကာကွယ်ဆေးမထိုးအောင် ဝါဒဖြန့်တာတွေ ဆိုရှယ်မီဒီယာမှာ ကျယ်ကျယ်ပြန့်ပြန့် ရှိနေတဲ့အတွက် ကမ္ဘာ့ကျန်းမာရေးအဖွဲ့ WHO က ဒီသတင်းမှားတွေကို ကိုင်တွယ်ထိန်းချုပ်ဖို့ ဆိုရှယ်မီဒီယာ ကုမ္ပဏီတွေကို ပြောထားပါတယ်။

Facebook ရဲ့ မနေ့ကထုတ်ပြန်ချက်မှာ ဒီလိုသတင်းအမှားတွေကို သေသေချာချာ စီစစ်ဖို့ ​Group ကိုင်တွယ်သူတွေကို အသိပေးသွားမှာဖြစ်ပြီး၊ ကာကွယ်ဆေးမထိုးအောင် ပြောကြားမှုတွေကို Instagram မှာလည်း တင်းတင်းကြပ်ကြပ် ကိုင်တွယ်သွားမယ်လို့ ဖော်ပြထားပါတယ်။

ဘယ်နေရာမှာ ဘယ်အချိန် ဆေးထိုးလို့ရလဲဆိုတာ အပါအဝင် ကာကွယ်ဆေးထိုးပေးတဲ့ စင်တာတွေရဲ့ သတင်းအချက်အလက်ကို အသေးစိတ် ကြည့်ရှုလို့ရတဲ့ လုပ်ဆောင်ချက်တစ်ခုကို Facebook က အခုတစ်ပတ်အတွင်း ထည့်ပေးသွားမှာပါ။

“ကျွန်တော်တို့ရဲ့ မူဝါဒတွေနဲ့ ကိုက်ညီတဲ့ Covid-19 အကြောင်း၊ ကာကွယ်ဆေးအကြောင်းပြောကြားမှုတွေကို အပြင်က အချက်အလက်စစ်ဆေးတဲ့သူတွေက ထပ်စစ်သွားမှာပါ။ သတင်းမှားတွေ့ရင် ဒါကို သီးသန့်ထားပြီး ဖယ်ရှားသွားမှာ ဖြစ်ပါတယ်” လို့ Facebook ရဲ့ မနေ့က ကြေငြာချက်မှာ ဖော်ပြထားပါတယ်။

​ကာကွယ်ဆေးမထိုးရေး ဝါဒဖြန့်မှုတွေဟာ ​Facebook ပေါ်မှာ လွန်ခဲ့တဲ့ နှစ်အနည်းငယ်ကတည်းက တည်ရှိခဲ့တာ ဖြစ်ပြီး ခွင့်ပြုပေးခဲ့တဲ့ တစ်ချို့ကြော်ငြာတွေမှာတောင် ကာကွယ်ဆေးနဲ့ပတ်သက်တဲ့ သတင်းအမှားတွေ ပါလာတာ ရှိခဲ့ပါတယ်။

လက်ရှိမှာ ဒါကို တိုက်ဖျက်ဖို့အတွက် Facebook က ကြိုးစားနေပါတယ်။

Ref: Aljazeera