စစ်တပ်နှင့် ရဲတို့၏ အကြမ်းဖက်ဖြိုခွင်းမှုကို ကုလအတွင်းရေးမှူး သတိပေး

ဖေဖော်ဝါရီ ၁၅၊ ၂၀၂၁
M-Media

-ဆန္ဒပြပြည်သူတွေကို စစ်တပ်နဲ့ရဲတို့က အကြမ်းဖက် ပစ်ခတ်ဖြိုခွင်းတာဟာ လုံး၀လက်မခံနိုင်စရာဖြစ်ပြီး ငြိမ်းချမ်းစွာ စုဝေးခွင့်ကို အာမခံပေးဖို့ ကုလအတွင်းရေးမှူးချုပ် အန်တိုနီယို ဂူတာရက်စ်က ပြောကြားလိုက်ပါတယ်။

မြန်မာအရေးနဲ့ပတ်သက်ပြီး ကုလအတွင်းရေးမှူးက ကြေငြာချက်တစ်စောင်ကို
မနေ့က ထုတ်ပြန်ခဲ့ပါတယ်။

“လုံခြုံရေးတပ်ဖွဲ့တွေက အကြမ်းဖက်တာ၊ ခြိမ်းခြောက်တာ၊ အရှက်တကွဲအကျိုးနည်းအောင်လုပ်တာတွေ ရှိတယ်ဆိုတဲ့ သတင်းတွေ တက်လာပါတယ်။ ဒါဟာ လက်မခံနိုင်စရာပါပဲ”

မြန်မာနိုင်ငံရဲ့ လူ့အခွင့်အရေးဆိုင်ရာ ကုလအထူးကိုယ်စားလှယ် သောမတ်စ် အန်ဒရူးကလည်း စစ်ခေါင်းဆောင်တွေကို မနေ့က Twitter ကနေတစ်ဆင့် သတိပေးခဲ့ပါတယ်။

“ညဘက် စီးနင်းတာ၊ ဖမ်းဆီးမှုတွေ တိုးလုပ်လာတာ၊ အခွင့်အရေးတွေကို ပိတ်ပင်တာ၊ အင်တာနက်ဖြတ်တောက်မှု ထပ်လုပ်တာ၊ ပြည်သူတွေကြားထဲကို စစ်ကားတွေလွှတ်တာတွေဟာ မြန်မာပြည်သူတွေအပေါ် စစ်ပွဲကြေငြာထားသလိုမျိုး စစ်ခေါင်းဆောင်တွေက လုပ်နေတာပါ။ မျှော်လင့်ချက်မရှိတော့ဘူးဆိုတဲ့ အရိပ်အယောင်တွေလည်း မြင်နေရတယ်။ ခင်ဗျားတို့လုပ်တာတွေကို ခင်ဗျားတို့ကိုယ်တိုင် ပြန်တာဝန်ခံရမယ်ဆိုတာ ဗိုလ်ချုပ်ကြီးတွေကို သတိပေးလိုပါတယ်”

ကုလအတွင်းရေးမှူးချုပ် အန်တိုနီယိုဂူတာရက်စ်က နိုင်ငံရေးခေါင်းဆောင်တွေ၊ အစိုးရတာဝန်ရှိသူတွေ၊ ပရဟိတသမားတွေနဲ့ မီဒီယာသမားတွေကို ဖမ်းဆီးတာ၊ အင်တာနက်ဖြတ်တောက်တာတွေက အလွန်အမင်း စိုးရိမ်စရာကောင်းတယ် ထည့်သွင်းပြောဆိုခဲ့ပါတယ်။

ကုလအဖွဲ့ဝင်နိုင်ငံတွေအနေနဲ့ မြန်မာပြည်သူတွေရဲ့ လူ့အခွင့်အရေး၊ အခြေခံလွတ်လပ်ခွင့်တွေကို ကာကွယ်ဖို့အတွက် မိမိတို့ရဲ့ဩဇာကို အသုံးပြုဖို့ ဂူတာရက်စ်က တိုက်တွန်းခဲ့သလို၊ ဒီမိုကရေစီ၊ ငြိမ်းချမ်းရေး၊ လူ့အခွင့်အရေးနဲ့ တရားဥပဒေစိုးမိုးရေး စတာတွေ ထွန်းကားအောင် ကုလသမဂ္ဂရဲ့ ကြိုးပမ်းမှုကို မမှိတ်မသုန် ဆက်လက်ဆောင်ရွက်သွားမယ်လို့ ပြောကြားခဲ့ပါတယ်။

“အထူးကိုယ်စားလှယ် ခရစ္စတင်း ရှာရနာ ဘာဂီနာကို လက်ခံနိုင်လောက်တဲ့ အနေအထားတစ်ခုမှာ မြန်မာနိုင်ငံကိုလာပြီး၊ အခြေအနေတွေကို ကွင်းဆင်းကြည့်ရှုခွင့် အလျင်အမြန်ပေးဖို့ စစ်ခေါင်းဆောင်တွေကို အထွေထွေအတွင်းရေးမှူးချုပ်က တိုက်တွန်းခဲ့ပါတယ်” လို့ ပြောရေးဆိုခွင့်ရှိသူ စတီဖင် ဒူဂျာရစ်က ပြောပါတယ်။

Ref: UN News